流感肆虐昨日再增15宗9死     孕媽媽與1歲半仔仔對抗甲流分享

流感肆虐昨日再增15宗9死 孕媽媽與1歲半仔仔對抗甲流分享

近期流感肆虐,衞生防護中心資料,昨日再增15宗成人嚴重流感個案,當中9人死亡。面對流感人人自危,懷孕中的唯媽與1歲半仔仔曾「中招」,有幸今次兩人都不用住院治療,但都想跟大家分享抗甲流的經歷。

撰文、圖片:唯媽|編輯:YIU

孕媽媽與1歲半仔仔b患上甲流

上星期唯b發高燒,最高都成40度,帶佢去睇醫生,檢查咗唔係甲型流感。由於我哋同房瞓,所以我都戴住口罩瞓覺,大概3日後佢就退晒燒,但佢退燒嘅同時,我發現自己發高燒39.3度,去診所睇醫生,順道做埋流感測試,好快就知係甲流。醫生見我懷孕中,好擔心,唔敢開特敏福俾我,即刻寫轉介信俾我入院檢查。本來以為要住院,所以拿拿臨返屋企執嘢,出門口前我仲同唯b講:「媽咪可能要幾日後先返嚟喇。」去到QE急症室,孕婦係屬「次緊急」嘅個案,但因為真係人手不足,又好多病人,所以都等咗大約4個鐘先有得見醫生。醫生問我:點解你要咁傻喺度等,唔叫家庭醫生開特敏福?我坦白講家庭醫生見我懷孕,唔敢開,想我入院問吓婦產科醫生,諗起都好似好傻。

QE婦產科醫生都好好,解釋俾我聽孕婦食特敏福嘅好處係大過危害,所以係可以食同埋要食。結果照一照唯妹,見佢心跳正常就走得;好彩唔使住院,因為大家都知道病床好短缺,人手就更甚啦。順帶一提,孕媽媽高燒係會影響到bb,所以真係要食退燒藥呀!

返到屋企,自我隔離,只能喺cam見唯b… 奈何第二日發現,佢都發高燒,去診所睇醫生,佢!都!中!甲!流!我本身已經病到好冇心機,聽到佢都中,好心痛⋯⋯好彩嘅係,佢嘅精神算ok,仲有心情不停講嘢。唯b嘅特敏福係藥水嚟嘅,返屋企塞退燒藥,食咗兩次特敏福藥水就退咗燒。到今日,touch wood我同佢都冇再發番燒,只剩下傷風咳嘅病徵,算好好彩喇!

唯b的特敏福藥水

 

大住個肚發高燒真係好辛苦,但又要同時擔心小朋友,係仲痛苦⋯⋯大家都要小心身體!出入要戴口罩,避免去多人嘅地方,好好保護自己 !

 

Like our page:https://www.facebook.com/weplaynlearn/

Follow us on Instagram:https://www.instagram.com/kly.chu/

更多精選內容