【貼地育兒】甘比帶子女做義工 教導子女幸福非必然

【貼地育兒】甘比帶子女做義工 教導子女幸福非必然

大家印象中嘅豪門子女同少奶奶嘅生活應該係點嘅呢?日日出入名人飯堂?經常喺社會上流嘅飯局宴會亮相?咁位列富豪榜嘅甘比(陳凱韻)同佢嘅仔女相信都應該係過住呢啲不知民間疾苦嘅離地奢華生活啦!原來甘比閒時會帶埋一對仔女去做吓義工活動,就好似幾日前甘比就帶埋大女劉秀樺去深水埗派米,希望藉此教識女女幸福唔係必然嘅,要珍惜眼前所擁有嘅一切。

撰文:叮叮|圖片:甘比Instagram、新傳媒資料庫

甘比帶大女派米俾老人家

數日前,甘比帶同家姐陳詩韻同埋大女劉秀樺到位於深水埗嘅「劉葉淑婉紀念自修中心 」(Lady Lau Memorial Study Centre)派贈白米同一大袋新年禮品俾老人家。甘比將活動相片上載到佢嘅個人Instagram,相片中可以見到甘比真誠對待老人家,絲毫冇顯露出對基層老人家嘅厭惡,亦冇因為佢已經榮升做豪門少奶奶而拒絕同基層接觸。

甘比更加喺Instagram表示希望透過今次嘅派米活動可以教識小朋友幸福並非必然嘅,小朋友應該要努力讀書,珍惜眼前所擁有嘅一切。甘比亦寄語希望老人家開開心心健健康康,甘比認真有善心。

無限期月購百張飯卷

甘比曾表示自己做善事嘅方式並唔係每個月定期捐錢去某啲機構就了事,而係會喺讀報章嘅時候發現有人需要幫助,就會聯絡相關人士提供協助。甘比表示咁樣做就能夠好直接咁幫到有需要嘅人,實實在在咁提供佢所需要嘅物質或者金錢。

其中一個例子就係,甘比無限期地資助社企「喜樂餐飲教室」。「喜樂」係一間由單親母親創立嘅社企餐廳,創立嘅原因係呢位單親媽媽希望藉此為自己嘅自閉症女兒同埋其他患病嘅朋友創造就業機會。

早前,「喜樂」嘅故事獲廣泛流傳,貴為豪門少奶奶嘅甘比都留意到呢間社企。於是,甘比自去年11月起將無限期地以「劉鑾雄慈善基金會」董事身分向「喜樂」餐廳購買100張合共價值$5500嘅飯卷,而甘比所購買嘅飯卷則獲轉贈予「劉葉淑婉紀念自修中心」嘅基層家庭會員。甘比此舉一次過令兩批人受惠,可見甘比絕非非一般為出名為做樣而做善事嘅少奶奶。

Posted by 喜樂餐飲教室 Holy Cafe on Sunday, 16 December 2018

貼地育兒方式獲藝人讚好

深水埗派米同買飯卷都只係甘比做過嘅芸芸眾多善事當中嘅其中兩件。甘比每逢節日都一定會帶埋仔女落區派贈禮品同過節嘅物品俾基層市民,例如甘比會喺端午節嘅時候去深水埗派粽俾老人家、喺復活節嘅時候派贈自家製愛心曲奇同蛋糕俾基層小朋友、懷孕四個月照樣接受「雪糕挑戰」(Ice-cream Challenge)為導盲犬籌款。

被問到點解甘比咁醉心於做善事,甘比表示因為自己同老公大劉都唔係出身於富裕家庭,自己細個係喺公屋度長大,所以會飲水思源,希望盡自己嘅能力回饋社會,令貧困人士自力更生,幫助佢哋脫貧。

另外都希望透過帶埋小朋友做善事,令小朋友明白到施比受更有福嘅道理。甘比好多時出席完慈善活動都會將活動相片上載到自己嘅社交網站,表示自己今日好慶幸可以帶埋仔女同一班基層人士交流同埋為佢哋提供幫助,就好似數日前甘比同大女去深水埗派米,甘比都有將相片分享至社交網站,相片引嚟同為父母嘅周汶錡、楊千嬅同蘇永康讚好。

甘比誓不做怪獸家長

早前甘比被問到佢嘅育兒方式,甘比再三強調自己並唔會做怪獸家長或者直升機家長,佢表示自己會尊重仔女嘅興趣,而且唔會強加過多嘅課外活動俾仔女,強迫佢哋學習佢哋冇興趣嘅嘢。此外,甘比又經常同仔女強調佢哋只係一個普通人,傳媒追訪佢哋只係因為佢哋嘅爸爸出名,傳媒希望知道爸爸嘅事。

其實除咗住大屋坐靚車之外,甘比真係盡量令仔女變成普通人一個㗎!因為甘比並唔會將仔女當成王子公主咁寵,出入唔會嚴陣以待,仔女返學放學同埋日常生活都係由甘比呢個媽媽照顧。有時,甘比仲會帶埋女女兩個人去坐地鐵,藉此俾女女體驗平民嘅生活。

更多精選內容