一家之煮黃淑儀 住家飯養大四子女

一家之煮黃淑儀 住家飯養大四子女

逢星期日收看TVB飲食節目《吾淑吾食》,黃淑儀(Gigi姐)每集煮出創意家常菜,簡單好吃,人情味濃,觀眾跟食譜之餘,亦感受到一份溫馨。對Gigi姐來說,烹飪的動力來自家庭,「見到家人食得開心,自己都會好開心。」家人永遠是她的第一位。

Gigi姐經歷兩段婚姻,20歲下嫁比自己年長一倍的劉芳剛,誕下一女一子德藍和德政,但婚姻僅維持八年結束,1981年,她與醫生徐景清再婚,再誕兩子肇麟和肇平,更嫁雞隨雞移民加拿大,直至仔大女大才回港復出,近年獲邀主持飲食節目,把自家餸菜公諸同好,連一向不愛下廚的仔女,也為媽媽改變,甚至煮大餐孝敬她,令她感到很窩心。

兩段婚姻 四名子女
Gigi姐與第二任丈夫徐景清結婚33年,至今恩愛非常,她覺得丈夫最難得是對四子女一視同仁,「佢凡事都諗兩個細路哥先,移民前佢哋仲係跟劉芳剛,直到我哋移民,徐景清提出帶埋兩個細路一齊移民,佢哋係時候去外國讀書,佢哋一聽到即刻話去!劉芳剛都同意。」

大女和二子自父母離婚後,沒受太大影響,媽媽常強調一句︰「即使父母分手,唔可以一齊生活,但你哋永遠係我仔女。唔需要喺細路面前講點解父母分手,第日大個就明白,所以即使徐景清出現,仔女都冇抗拒。」

1984年,Gigi姐與徐景清再誕下兒子肇麟,打算三個夠晒數,豈料四年後意外懷有細仔肇平,Gigi姐笑說︰「呢個仔叫徐意外,哈哈哈!」四個仔女兩個姓氏,但相處打成一片,肇平與大家姐相距18年,沒代溝不特止,家姐拍拖更帶細佬同行,肇平回憶道︰「細個成日同家姐一齊,爹哋媽咪出去做嘢應酬,家姐負責湊我,帶我出去玩。」Gigi姐笑指有大女幫手,減輕湊仔負擔,「大女同我管晒佢哋,女仔做大最好呀!」

二哥I.T.遊戲界紅人
肇平陪大家姐拍拖,與二哥則愛打機。二哥德政是I.T.人,是著名社交遊戲公司Gaia Online創辦人之一,為事業離家赴美打拚多年。Gaia Online於2003創辦,總部設美國矽谷,註冊用戶超過2,600萬,大受當地年輕人歡迎,一如多個小型網站及apps,小本經營做得有聲有色,被大公司睇中提出高價收購,但德政沒為錢變賣心血,Gigi姐代解釋︰「嗰陣佢只得廿幾歲,佢話如果賣掉,攞咗筆錢就要退休,同事冇工開,所以佢決定唔賣,只係俾人入股,佢繼續留喺度做。」肇平揚言負責試玩哥哥公司所有遊戲,提供意見改進,以前放暑假更到哥哥公司幫手,「其實爸爸玩得仲多過我,除咗媽咪,全家都鍾意打機。」

細仔有志入行
至於三子肇麟同是I.T.人,擔任工程師,主力研究機械人,肇平大讚兩位哥哥都好smart,但自己最大興趣不在I.T.,有意步媽媽後塵從事演藝事業。數年前臨到大學選科時,下決心轉讀加拿大Vancouver Film School(溫哥華電影學校),一讀兩年。肇平坦言受媽媽影響,愛上演戲,「媽咪每年喺溫哥華做舞台劇,由細到大跟媽咪到後台幫手,我鍾意個氣氛同環境,覺得好好玩。細個都有喺學校做舞台劇,又同哥哥、朋友搞project,拎部camera亂拍嘢,好多幕後工作都做過,包括導演、writer。」Gigi姐指阿仔拍片大無畏,「同朋友揹住部機拍bungee jump,傻o架!」

肇平高大靚仔絕對有條件,近日Gigi姐帶他返港參與拍攝《吾淑吾食》,觀察香港拍攝程序,「喺TVB做一年,好過喺加拿大做三年,呢度啲人反應快、速度快,加拿大好單純,節奏好慢,所以我都想佢留低學吓嘢。」

仔女拒生 唔恨抱孫
為湊大四個仔女,Gigi姐放棄香港演藝事業,待在溫哥華照顧家庭,每年只做一個舞台劇及電台節目《芝芝天地》,「湊四個細路太多嘢做,要煮飯、送返學放學,好多濕碎嘢做。」期間TVB不時邀請Gigi姐拍劇,一直遭她拒絕,直到仔女12歲,「當訓練仔女獨立,有段時間請咗兼職清潔姐姐執屋,但我要佢哋自己執番房、洗廁所,學識搞掂自己,喺外國生活都想訓練佢哋獨立,佢哋獨立,我返香港拍戲咪唔使驚囉。」

四個子女長大,44歲大女已婚,仍未有後,三個仔則未婚,Gigi姐唔恨抱孫嗎?「唔恨喎,有當然好,冇亦冇所謂,呢啲係仔女嘅生活,佢哋想點就點,我從來唔太干涉佢哋私生活。」她指大女全心養寵物,寧願養兔子,也不願養孩子,「佢同丈夫討論過唔要細路哥,都好嘅,養細路哥好大責任,係一生一世。」

40歲的二仔與女友同居,未打算結婚,Gigi姐亦從沒催婚,「細路哥大咗有自己世界,只要佢哋開心就得,我成日同佢哋講,唔可以食煙、吸毒,飲酒要有分寸,其餘我就唔管佢哋,俾我發現就大件事喇,我都唔知會點,哈哈。」

珍饈百味不及住家飯
Gigi姐身為「一家之煮」,但沒刻意利用廚房教育下一代,四名子女中,只有肇平喜歡下廚,「佢七、八歲開始就入嚟搞搞震,有時佢開雪櫃見到飯餸唔鍾意,就會自己煮意粉,屋企經常有免治肉俾佢發揮,佢最叻整肉醬意粉。」

不過,近年三兄姊開始體會下廚樂,紛紛徵詢媽媽意見,「我個女拍拖時,突然打嚟問我『媽咪,點樣煲湯?』我話屋企有湯飲呀,原來佢去咗男友屋企,要煲俾男友飲,所以問我要落乜嘢煲湯,佢依家間中都有煲老火湯,煮飯就盡量簡單啦。」

她最驚喜是二仔愛上烹飪,他離家多年後才發覺,珍饈百味也不及住家飯,「呢個仔離開屋企好多年,佢每次返溫哥華我哋就好興奮,一餐食日菜、一餐食韓菜或意菜,突然有日佢話,『媽咪,點解唔喺屋企食呢?』我好開心、好感動,原來佢最鍾意係我煮嘅嘢,離開屋企咁耐,始終覺得住家飯最好,幾辛苦我都會煮俾佢食。」近兩年,二仔埋頭鑽研烹飪,連煙燻爐都入手,「佢鍾意整smoked,自己煮扒煮雞,最近我同肇平去咗三藩市,住喺佢度幾日,佢差唔多餐餐都想親自下廚,一齊煮幾好玩呀!」

Gigi姐大半生在廚房,憑美味餸菜維繫幾代人,不介意畢生做煮飯婆,「識得煮嘢食,又得到家人欣賞係好窩心,會花心思為家人諗菜式,換吓唔同口味,希望佢哋食得開心,自己就會好開心。」

撰文: Ling
攝影: Clay Lam (部分相片由受訪者提供)
化妝: Annie G. Chan
髮型: [email protected] MAKE UP
場地: 圓方出版社

更多精選內容