奶奶恨抱孫出大招 偷偷刺穿Condom 最終更搞出人命

奶奶恨抱孫出大招 偷偷刺穿Condom 最終更搞出人命

老友記好多時做嘅嘢同用嘅手段,身為年輕人嘅我哋真係不能理解。美國一個奶奶為咗家族唔好絕後,將仔仔同新抱調離屋企,自己就偷偷哋走去刺穿仔仔用嘅避孕套。正當奶奶諗住落手之時俾新抱發現咗,新抱仲得知原來奶奶唔係第一次咁做。後來新抱去驗身嘅時候發現自己真係有咗BB,但呢位新抱就表示就算BB出咗世,都唔會俾佢見嫲嫲咁話。

撰文:叮叮 |資料來源:reddit|圖片:新傳媒資料庫|編輯:YIU

奶奶反對夫婦二人不育嘅決定

早前一個美國網民喺Reddit討論區分享咗一件奶奶令到佢嬲到震嘅事。事緣係呢位女網民係已婚,但係同老公就有共識唔想生BB,希望一直過二人世界。喺啱啱過去嘅聖誕節,佢地兩公婆決定同奶奶坦白,講佢哋唔想生BB一事。點知,奶奶聽完之後即刻發曬癲咁話佢哋兩個唔可以唔生㗎,佢哋唔生家族血脈就會斷㗎喇!奶奶發完癲之後,大家即刻冇曬心情繼續慶祝聖誕節,但大家都低估咗奶奶想抱孫嘅決心。

 

奶奶假借煮飯名義

今個月初,奶奶登門拜訪,話係嚟煮晚餐俾個仔同個新抱食喎!突然間,奶奶就同呀仔講話買漏咗個材料,於是叫呀仔揸車出去補買返啦,呀仔就不以為然,真係揸車出去買。點知醉翁之意不在酒,奶奶之意不在煮飯,奶奶只係假借煮飯為名順理成章去呀仔屋企,然後使出一招調虎離山之計,將呀仔調離屋企,加上新抱仲未放工返到屋企,所以呀仔屋企就得返蠱惑奶奶一個喇!

蠱惑奶奶於是就走到去呀仔同新抱嘅睡房,攞咗呀仔包避孕套出嚟。諗住做咩?梗係唔係諗住用個避孕套啦!奶奶原來係諗住篤穿個避孕套,等呀仔同新抱嘿咻嘅時候自己就有機會得償所願喇!點知呢個時候,新抱放工返到嚟,見到奶奶揸住個避孕套,仲要好似想刺穿佢咁喎!新抱未出聲,奶奶已經開口反駁話「我咁樣都係為咗頭家咋!」新抱都未開聲講野,奶奶已經雞咁腳咁揸車逃離案發現場喇!仲差啲車親新抱隻腳㖭呀!陰功!

呀仔同新抱決定唔再理奶奶

新抱慶到火屎咁,即刻打俾老公仔呻。經了解之後相信奶奶係獨自犯案,老爺並不知情,故判老爺無罪釋放。而奶奶則判隔離刑,禁止奶奶以後再踏足個仔同新抱嘅屋企,就連奶奶嘅電話呀仔同新抱都唔會再聽,新抱仲喺Facebook unfriend咗奶奶㖭呀!仲有就係,由於新抱相信奶奶並非首次犯案,犯案技巧純熟,所以擔心自己真係會意外有咗,所以走咗去預約驗孕。

 

奶奶搞出人命

之後,新抱真係驗出有咗BB,新抱同老公商量過後之後決定會將個BB生出嚟,不過有BB呢個消息佢哋兩公婆就唔諗住話俾奶奶知,而且就算第日BB出咗世,佢哋都唔會俾BB見奶奶。老公知道老婆咁委屈之後,就走去搵呀媽興師問罪,點知呀媽死不悔改,揚言話:「我咁樣都係為咗頭家咋,新抱如果真係有咗你哋要多謝我呀!」、「如果新抱真係有咗,我一定要係第一個知!」新抱見奶奶咁癲就諗住報警備案啦,但又衰在當時奶奶篤穿嘅安全套物證都冇曬,佢地唯有更改屋企門鎖同安裝閉路電視啦!同埋唔排除如果奶奶再嚟騷擾佢哋,佢哋會尋求律師協助,禁止奶奶再嚟騷擾佢哋一家。

更多精選內容