【親子好去處】鯉魚門親子一日遊

【親子好去處】鯉魚門親子一日遊

油塘經常來,因為公公婆婆就住在這裡,但鯉魚門牌坊,三家村則還只是第二次來…第一次是捉精靈,SY說:「我第三次,學校旅行嚟過一次」

撰文、圖:大仁生活|編輯:Kammy

鯉魚門親子一日遊

1. 鯉魚門燈塔

避風塘泊滿船隻,其實從大本型走過來也不用15分鐘。不過,今日我們則是由旺角乘小巴直逹鯉魚門牌坊的。

由牌坊穿過鯉魚門海鮮街,沿路大大小小的海鮮酒家也會向你招手,而且小街也有不少賣手信的小店…我:「我覺得比澳門官也街更加地道,更好Feel」

穿過鯉魚門海傍道,只要一走出海鮮街,小石灘就在眼前,而著名的鯉魚門燈塔就在一海灘的前方。

阿太:「其實,我三日前嚟影過相…唉!! 我仲跌咗支綠茶同緣子隻拖鞋…諗起就傷心,唔知可唔可以搵得返」

石灘上又有石,,又滿是玻璃碎,我想尋回妳的失物機會微乎其微啦…阿太努力在尋覓,SY和我走了對面的燈塔拍照…

我:「小心啲呀!啲石頭好似好多青菭,好跣呀!」; 細膽的小朋友小心奕奕慢慢寸步移動,之後對我說:「我都係返過去搵媽媽」

但此時原來潮水也開始水漲…SY:「哎呀! 啲水多咗咁多喎,(我:潮漲呀),咁爸爸你都快啲過返嚟啦,唔係一陣間你返唔到嚟呀!」

2.心願樹

離開燈塔,阿太尋回迷你綠茶,但拖鞋卻找不回了…我和SY望見心願樹…我:「同林村一樣有棵許願樹」

SY:「爸爸!呢度鯉魚門叫心願樹喎」忙著許願的小朋友,原來又要最想願望成真買陀螺喎!

3.天后宮

沿心願樹向前行,不用10分鐘便到逹天后宮…就在廟的大石來一幅全家福吧~

我們要穿過天后宮,左邊有數級樓梯,一直走入小村莊,石礦場便準備出現在我們眼前。

當你發現來到一個窄巷,不要以為是掘頭路… SY:「呢度咁窄嘅?」; 阿太:「窄巷上有「矿」字指示喎」

走出窄巷, 再向前行3分鐘,簡直就是由最迫走到最空曠,SY走到石灘大叫:「到啦…到啦…YO~HO~」

4. 石礦場

踏上小小一段山路就是鯉魚門石礦場的巨大石山所在場,超巨型大山,但嶙峋的山石高牆,超級有氣勢…

阿太:「你覺唔覺得似拍武俠片跳山崖咁呀?」; SY:「唔似…我睇愛‧回家都未見」

阿太:「愛‧回家係時裝劇呀! 小朋友」

再向前,我們發現有人在拍攝婚紗照,阿太:「好浪漫呀! (我: 山長水遠走嚟呢度影婚紗相都有?) 你識咩吖…你都無嘅…都唔浪漫」(車!!)

雖然,今日新正頭假期,所以遊人也不少,但身處石礦場還很有與世隔絶的感覺,我愈來愈覺天外有天,山外有山,人實在太渺少。

SY:「爸爸! 我想去玩石仔…你影拍住片先啦」; 而我且欣賞遊人玩航拍,很舒服,很享受…平常

跟鐵人去行山,可能只有高高在上的感受,但這裡感覺很截然不同,因為實在太似穿越時裝與古裝的時空,很有走過隨意門的感覺呀!

頹廢荒涼的石屋也是要排隊等待的打卡位,SY:「爸爸! 我唔入去㗎,我好驚呀! 我企係門口咋…你快啲影得唔得?」 (人人都人,都唔知你驚乜?)

5.海鮮手信街

影了個多小時,太陽也準備落山,我們也離開了…回到海鮮手信街, 遠遠已傳來又香又吸引的燒豬肉乾味道…

年香園餅家有店主一邊燒豬肉乾,一邊大叫:「免費試食,阿Dee 試下啦」

我:「嘩! 你試食都切咁大塊,又任我食,你真係會蝕本㗎喎」; 店員:「你食完覺得好食就會幫襯返我,我又點會蝕本呢?」

對呀! 她說得對,因為實在太香,我們試食完又買了兩袋,輕輕鬆鬆又玩了半日…正呀!!

鯉魚門一日遊

1. 油塘港鐵站A2出口,步行約15分鐘,到三家村(鯉魚門牌坊)

2. 油塘巴士總站,搭14C / 24號綠色小巴至三家村渡輪碼頭

沿鯉漁門海傍道走到尾,便是燈塔。經過燈塔再前行,穿過天后宮步行約8分鐘便到達石礦場。

更多精選內容