張達倫

【繼父唔易做】張達倫愛屋及烏:我永遠當佢係自己個女

娛樂

廣告

藝人張達倫早年以《愛·回家》「嚴謹」一角成功入屋,佢同太太Kimmy早前更一齊參加由車婉婉主持嘅節目《1+1+1》。張達倫喺節目中透露,自己作為爸爸兼繼父,對囝囝同繼女一視同仁,更喺節目中再次讀結婚誓詞,令太太十分感動!

撰文:Kammy|圖片來源:Instagram、節目截圖

在對的時間重遇

現年40歲嘅藝人張達倫,曾參演《愛·回家》「嚴謹」一角而為人熟悉,劇中嚴謹玩世不恭,但現實中嘅張達倫卻係一名暖男。張達倫同太太Kimmy於2016年結婚,二人婚後育有一子張凱碩,以及Kimmy同前夫所生嘅15歲繼女Chloe,一家人生活幸福。

張達倫喺節目中透露,Kimmy係哥哥讀酒店課程時嘅同學,當時對Kimmy印象最深就係對方嘅一頭短髮,但當時兩人都各自有男女朋友,其後Kimmy更曾與一名外國人結婚,育有一個囡囡Chloe。

幾年後,二人回復單身後再度重遇,更因有共同興趣而撻着。

愛屋及烏張達倫:我永遠當佢係自己個女

要做爸爸本身已經唔容易,而且要學習做「繼父」呢個角色更加唔係人人都可以勝任,但張達倫就以「繼父」同「朋友」嘅身份去同繼女Chloe接觸,佢曾經表示:「我哋關係十分之好,我同佢好似朋友,我都大唔透。喺呢個時代唔可以再用長輩同後輩之分,小朋友唔會想同你溝通,佢哋已經成日對住部電話,你再敦起個款佢哋睬你都傻啦,所以我同佢會保持朋友關係。」

張達倫喺節目中指,佢認為繼女雖然同自己冇血緣關係,但佢唔覺得有咩問題,更揚言「我永遠當佢(Chloe)係自己個女」,因為繼女係太太生命中一部份,如果唔接納根本就冇資格話愛對方。

太太無懼從前經歷 勇敢再婚

Kimmy係重遇張達倫之前已經有過一段婚姻,車婉婉問到Kimmy點解會咁勇敢投入第二段婚姻,會唔會怕再重蹈覆轍,Kimmy坦言對從前嘅經歷唔會有恐懼,更因達倫嘅孝順性格而令佢對婚姻有信心。

張達倫自擬結婚誓言 感動太太

張達倫表示,二人當初決定結婚係因為想生小朋友,雖然係目的明確,但達倫由求婚到結婚個刻所做嘅行動都絕不馬虎,因為佢認為呢個唔只係一個過程,而係對太太嘅承諾。

張達倫喺求婚時更對Kimmy唱出許志安嘅《你的男人》,當中一句歌詞「愛情令缺點有了知音」達倫認為好重要,因為每個人都唔係完美,好幸慶自己嘅缺點搵到人去接納,而呢個人就係Kimmy,佢令自己願意去學做一個真正嘅男人。

我盡力學習成為男人

有了你我會做事認真

珍惜一個人

終於改變一個人

愛情令缺點有了知音

你就是動力成全人生

(許志安《你的男人》)

到結婚誓詞更係張達倫一手包辦,由於佢哋兩公婆都熱愛行山,達倫就引用佢哋其中一次嘅行山經歷作比喻,只要有對方喺身邊,以後有咩困難都可以一齊度過,令Kimmy感動流淚,真係好Sweet呀!

曾因囝囝忽略老婆

張達倫坦言,囝囝出世後因為將成副心機都投放喺囝囝身上,而一度忽略老婆,慢慢就開始反省自己嘅行為,認為要平衡兩方面,咁樣先可以維繫到夫妻間嘅關係。

視繼子女如己出 圈中7位 後父後母

1. 雷頌德

音樂才子雷頌德(Mark)早前與太太梁家玉(Jade)出名恩愛,原來二人在結婚時,Jade與前夫已育有一子。愛子深切的Jade直言:「當時如果他不接受兒子,或不疼愛他,我一定不會跟他結婚。」由於雷母亦是帶著自己再婚,Mark非常理解Jade當時的想法。於是,Mark在求婚前先向Jade的兒子Sean預告婚訊,並得到他的真誠祝福。梁家玉曾表示,雷頌德向來視自己為Sean的朋友,而非繼父,這種相處模式亦令二人關係非常要好。

2.楊卓娜

楊卓娜下嫁「廣告燈箱大王」楊志翹後,更成了兩個女兒舒婷和舒雅的後母 ,丈夫因早年喪妻,遺下兩名女兒,後來卓娜成了她們的手工藝老師,繼而認識丈夫,舒婷和舒雅既是父母的女兒,更是父母的紅娘。早前,她曾在節目分享與家人相處之道時,更一度感觸落淚。她說:「我好希望佢嘅繼母會同佢哋媽媽一樣,俾到同等分量嘅嘢佢哋。雖然我先生嘅前妻已經唔係度,但係我同時都感受到佢做人媽媽嘅心情。每當我見到小朋友唔開心時,更加明白到作為人母嘅感受。」同時,她認為愛能解決一切煩惱,「我覺得愛同包容可以解決所有問題,但係呢種『愛』係一定要好無私、唔可以比較、唔可以拎去爭寵,係要包容。」

3. 徐若瑄

徐若瑄(Vivian)嫁給新加坡富商李雲峰後,2015年生下兒子Dalton(小V寶),儘管已晉升幸福人母,對老公和前妻所生下的女兒仍疼愛有加、視如己出。Vivian曾被網友批評誕下兒子後,經常公開自己親生仔照片,而不再Post丈夫跟前妻所生的女兒照片:「最討厭看到妳們這種後母、整天只發自己親生的孩子」,結果佢在社交網站上反擊:「女兒已經步入青春期,有自己的同學,也到了會注重自己的形象和隱私階段,因此,每要發有關女兒的照片,都需要詢問過女兒的同意,這是我該做的基本尊重。若不夠了解,請不要任意批判別人的人生,更何況,女人何苦為難女人。」帖文一出得到唔少網民正面回應。

4. 葉倩文

葉蒨文跟林子祥結婚多年一直無己出,只有林子祥跟前妻吳正元所生的兒子林德信(Alex)和女兒April作為繼子女。雖然不是親生子女,但葉蒨文仍非常愛錫佢哋,繼仔林德信仲話會同葉蒨文傾心事添!

5.范姜

鍾鎮濤與拍拖17年的女友范姜2014年結婚,二人的女兒鍾懿與鍾幗更擔任花女,而前妻所生的一仔一女都有出席,一家六口非常熱鬧。范姜更話自己係優良後母,視鍾鎮濤同前妻所生嘅子女鍾嘉浚及鍾嘉晴如己出。

6.章子怡

章子怡同老公汪峰於2015年結婚,佢哋除咗育有一女醒醒之外,仲有撫育汪峰同前妻葛薈婕所生嘅囡囡小蘋果,而子怡更一直當小蘋果視如己出咁咁愛錫。章子怡第一次見繼女小蘋果時,對方一開始就接受佢仲已經叫佢做「媽媽」,令子怡開心不已,更透露對方從未排斥過自己,而自己就「很心疼她,骨子裡心疼她」。