「劉華契仔」張頴康 麥雅緻  今周誕七磅B女

「劉華契仔」張頴康 麥雅緻 今周誕七磅B女

范根、樊庚、范發……與姓范角色甚有緣的TVB上位小生張康,原來兩年前已成家立室,太太是《東張西望》主持、落選港姐麥雅緻(Angie),今個星期,二人將迎接首個小生命,重約七磅多的女嬰,暫未取名,友人取笑謂:可叫「張范X」、「張X樊」,阿康笑言當然不會那麼兒戲,名字會找改名師傅負責。

18歲他挾着劉德華契仔之名入行,雖有演出機會,但一直星運平平,華仔遂引薦他入TVB訓練班,從頭學起,近年他終於冒出頭來,還得到了姻緣,在TVB結識麥雅緻,拍拖四年決定拉埋天窗。在搏殺期生兒育女,不怕影響事業嗎?你契爺也曾保護形象而瞞婚?阿康即斷言:「我想做演員,唔係做明星,有咗家庭我個人更踏實,對演戲都有幫助。」

不敢請教劉華湊女
張康2006年加入TVB前,簽約劉德華的天幕製作有限公司,成為旗下藝下,劉華開show會帶同阿康表演,開戲又預他份兒,連拍賀年照都一齊,自此阿康被傳媒封為「劉華契仔」,那麼阿康的女兒會否與劉華上契?他笑笑口否認道:「我都唔係叫佢契爺,我都係叫番華哥,唔係真上契嘅,傳媒講啫!」

華仔兩年前誕女劉向蕙,阿康個女即將出世,僅細向蕙兩年,可以一齊玩喎!阿康說:「我都冇見過佢個女,好神秘,華哥我都冇機會見,佢依家又唔唱歌喇,以前佢都會上TVB《勁歌金曲》,初初我入TVB見佢仲多,佢每次上《勁歌》,我就過一廠搵佢,佢仲成日鬧我,點解塊面花晒,咁我啱啱拍劇爆完反應彈,我都唔想㗎!啲反應彈向住我塊面爆!佢就叫我好好睇住自己,做嘢要小心啲……」

兩人近年雖然少見面,但華仔對阿康仍處處關愛,阿康大婚當日,華仔人不到禮到,獻上全場最大封人情,「結婚前上咗舊公司探同事,咁佢知道咗,就好識做喇。」阿康沒透露有幾大禮,但今次生女不敢再通知華仔,「費事喇,結婚收咗咁大份,BB又再收,唔係幾好。我好怕佢塞嘢俾我,塞利是呀,我唔好意思收,不過我諗佢都知嘅,或者等個女出世後,我先返舊公司講聲啦。」

「契爺」贈戲飛追女仔
華仔在阿康的姻緣上,亦間接做紅娘,若非當年推薦阿康入TVB,他不會遇到Angie,「嗰陣訓練班出嚟,台慶要排舞,佢喺排舞室外行過,冇化妝,佢望住我笑一笑,我覺得呢個女仔嗒得杯落喎,就開始留意佢,上網search佢啲嘢。」更全靠「契爺」兩張戲飛贈券,促成兩人首次約會,阿康回憶道:「我哋係社交網站friendster add做friend,一年後佢先主動同我講
嘢,因為佢鍾意聽《新香蕉俱樂部》(新城電台節目),我有份做主持,但調咗時間,所以佢就開始問我嘢,我叫佢add MSN,講咗幾句我又話好憎打字,不如你打俾我啦,講咗一輪電話,見到枱面有兩張《投名狀》嘅飛,係華哥啲贈券,就約咗佢出嚟,哈哈!」

陳豪屢勸請陪月
阿康近兩年劇接劇,漸漸由跑龍套晉升男配角,年初兩線劇《舌劍上的公堂》樊庚和《貓屎媽媽》范發,以及剛播完的《愛我請留言》電單車男何志安,皆表現搶鏡。新劇《陪著你走》與陳豪、胡杏兒合作, 阿康戲份增加, 日日與陳豪開工,開口埋口傾大肚經,阿康笑說:「阿Mo日日喺耳邊哦住我,叫我請陪月啦,請啦請啦!真係爭好遠㗎!」身旁的Angie補充:「佢嘅經驗話,有多個人真係好好多,但我哋屋企已經好多人,阿爸阿媽、工人姐姐,我覺得OK
啦。我父母會專登喺美國番嚟,爸爸照顧我三個月,佢煮嘢食好叻,媽媽就留個幾月。」

兩人婉拒陳豪的好意,但繼續被他游說:「一個月唔得,兩星期、一星期都好呀!」阿康笑他:「我個女好似佢有份咁呀!成個中介公司咁!」其實陳豪和陳茵媺的陪月是朱凱婷介紹,用過後真心覺得好,才推介給阿康,阿康說:「佢覺得陪月俾到初生媽媽應有知識,佢擔心Angie父母30幾年冇湊BB,體能上、技巧上、知識上,陪月都有update嘅專業知識,但我都係覺得順其自然,陪月始終會走,要獨自面對,不如早啲面對喇。」

懷孕八月仍開工
Angie現已懷孕九個多月,本周即將在仁安醫院開刀生,預計B女重七磅多。但她是個工作狂,上月初仍挺着巨肚開工,主持《東張西望》,陳豪和公司路過的黃浩然異口同聲直斥阿康不人道,他高呼冤枉,「茵媺大肚喺加拿大養胎,阿Mo都冇開工,淨係做event,但我哋唔同,唔鍾意坐喺度,Angie好鍾意做嘢,知道今日有訪問、有嘢拍,成個人醒晒!」Angie亦挺身護夫,「我唔做嘢會嗌救命!我放咗個幾星期產假就病喇,好悶呀!我從來未試過唔返工、唔返學,放假都有得去旅行吖,依家旅行都冇得去,漫無目的咁。」

老公晚晚煮飯
不甘於做少奶奶的Angie,指整個懷孕過程算舒服,除了頭三個月作嘔作悶,一直精力充沛,大肚六個月更飛往美國探親三星期,每日與老公拍拖行街,好有腳骨力,直至今個月才見累,BB壓着身體,睡眠質素變差,「BB依家踢得好勁,依家影相都郁緊。」

懷孕頭六個月,阿康正值空檔期,有時間陪太太,家頭細務一腳踢,晚晚煮飯餵妻,他不介意太太是「無飯主婦」,連街市都孤獨行,「佢唔鍾意行街市,因為細個有陰影,試過着住靚裙同阿爸行街市,成個人撻咗落地,條裙污糟晒,自此好憎行街市,淨係去超市。」廿四孝老公起初還鑽研孕婦食譜,但後來捨棄,「啲食譜好刻意,話多吃菠菜幫助BB腦部發育,但我最憎食菠菜,仲叫我食多啲,有冇搞錯!又話咩時期需要咩營養,唉,算啦唔跟喇,飲食均衡就OK。我一向都煮得好清,少油少炒,蒸魚、烚菜較多,醫生都話唔需要刻意進補,戒掉冇益食物就得。」

100分準爸爸
有阿康的細心照顧,難怪Angie話佗B舒服,俾足老公100分,「佢係一個好老公兼準爸爸,懷孕期
間最緊要心境開朗,重要過食補品,佢陪我傾偈、睇電視、玩,已經好開心,心情唔好食乜都唔吸收。」

阿康的細心點只100分,簡直好到加零一,就算當晚開工沒煮飯,都會送住家飯外賣,「呢排我要開工唔得閒煮,我哋就一齊去Angie嫲嫲屋企黐餐,嫲嫲屋企個工人煮飯好叻,如果佢唔想出去,我就去攞飯攞湯俾佢。」嘩,好貼心呀!

阿康笑言自己就是太太的補品,所以她懷孕期間盡量陪伴,「幾年前拍《護花危情》,我返工返得好密,我哋好少見,有日佢皮膚出疹、好乾,好似老咗幾年咁。有一晚唔使拍,我陪佢食飯、傾偈、笑吓,第二朝見佢皮膚好番晒!唔知係咪我力量呢,真係好神奇!所以一知道佢懷孕至六個月,我咁啱唔使拍劇,全程陪住佢,佢就好開心喇。」不過,Angie本周就開刀,阿康要拍劇只能請兩日假陪產,「淨係可以送入院同開刀嗰日,惟有盡量返半日,淨係開夜晚,日頭陪老婆,希望可以放多日接出院啦……」完全感受到兩人迎接小生命的喜悅!

撰文:Ling
攝影:黃大立(部分相片由受訪者提供)
場地:Artichoke canteen(tel:9684 9964)
鳴謝:Brainwavz(headphone)

關鍵詞
kiss vol.160

更多精選內容