與太太愛足30年 少爺占:命運真的很奇妙

與太太愛足30年 少爺占:命運真的很奇妙

喜歡聽電台節目的人,對「少爺占」這個DJ絕對不陌生,無論是清談節目,還是音樂節目,少爺占總能用一把搞怪得來又帶點磁性的聲音,帶領聽眾走進歡樂的世界。在搞笑背後,少爺占與青梅竹馬的太太育有一子,是名符其實的慈父,經常一家三口齊齊出動,溫馨無比。

撰文:Kayla

攝影:Roy、Q
makeup:krisie wong|hair:johny [email protected] corner (cwb)
圖片來源:Instagram(部分由受訪者提供)

與太太相愛30年

少爺占原名甄子康,是香港著名的唱片騎師(DJ),現年42歲的他在2006年與青梅竹馬的太太Tina結婚,在2014年誕下兒子甄和天(Timmy)。少爺占出道多年鮮有緋聞,當大家以為他還是單身貴族時,在2013年居然在微博上公開向Tina示愛,並爆出早已秘婚7年。

當年少爺占在微博上公佈婚訊,震驚整個娛樂圈。

少爺占與Tina的故事,可以由他們幼稚園說起:「其實我同太太係幼稚園同學,但我對當時嘅記憶好模糊,都係太太後來同我講返先記得。幼稚園畢業之後我哋都冇聯絡,係到中學時先再相遇,咁佢就好叻嘅,中一至中四都讀精英班,又鍾意運動;相反我成績就一般,又冇乜運動細胞。之後中五我哋終於同班啦,就慢慢地發展咗依家呢個故事。」命運就是如此奇妙,兩個幼稚園同學在中學重聚、相知、相愛,到最後攜手建立家庭,一生一世走下去。

Tina(左一)與少爺占(右一)幼稚園時期的合照。

「我哋其實真係唔係好多海誓山盟、高山低谷,但我最記得就係我同老婆本身計劃分階段去環遊世界,玩完就返嚟生BB,點知世界都未環完,就有咗小朋友,所以命運真係好奇妙。」

演活慈父角色

少爺占總是帶給聽眾、觀眾無窮歡樂,有他的地方就自然笑聲滿載。當然,在現實生活中,少爺占也是個幽默的人,在訪問當天把全場的工作人員都逗笑了。問到他平時與孩子的相處,少爺占的目光便稍變溫柔,跟記者娓娓道來他當爸爸後心路歷程。

「未做爸爸之前,我諗嘢唔會好長遠,最多都係計劃一、兩年內會發生嘅事,但做咗人爸爸之後,就會諗未來5年、甚至10年之後嘅事。情況就好似搬屋咁,會諗埋小朋友之後去邊度讀書,喺該區長大對小朋友未來有冇影響,同啲朋友仔住得近唔近,可唔可以早啲約埋出去放電呀,責任感就大咗,唔再係以前得兩個人可以做乜都得。」

「我係一個極度慈父,從來唔會鬧佢,我無論對小朋友、屋企人、朋友都好,都冇一個『鬧人機制』,因為我細個時爸爸媽媽好少鬧我,由得我自己發揮,當然言行、禮貌都一定要小朋友做到足啦!我同我太太嘅角色就係一凹一凸,佢長時間對住個仔,少不免會嚴啲,但我工作已經好忙,對住個仔時間已經好少,仲點捨得鬧佢!」

爸爸是百變超人

少爺占與拍檔Donald在2004年組成「I Love You Boyz」闖樂壇,形象搞笑;在2014年更化身成「朱艷強」,舉行首個個人棟篤笑,認真古靈精怪!少爺占的形象如此百變,未知會否嚇著兒子?

古靈精怪的朱艷強

「而家有啲廣告我都會有空姐造型、大隻佬造型、小朋友造型等,佢都有睇,仲睇到好開心咁講『爸爸,依個係咪爸爸嚟架?』,佢又知道我係扮出嚟,佢知廣告上面嘅爸爸唔係真爸爸,如果有小朋友問佢,『依個係咪你爸爸』,佢就會答『唔係架,假架』。」

「如果人哋問佢知唔知爸爸係做咩,佢就會答係做表演,因為佢由細到大都有睇我嘅演出,係我忠實Fans。不過佢細個時以為我係司機,因為我成日車出車入,而家變咗做表演,個行業即時提升咗!」

少爺占和Donald將會在4月5日至6日在紅館舉行兩場《艾粒紅館激戰》,問到屆時會不會讓Timmy上台來個表演,少爺占就笑指兒子沒有張瞻(張繼聰長子)厲害,上到台肯定會怕怕。

更多精選內容