【超強勁祛濕湯】 牛大力土伏苓粉葛蘿蔔豬骨湯

【超強勁祛濕湯】 牛大力土伏苓粉葛蘿蔔豬骨湯

天氣濕濕笠笠,總係會令人覺得好易倦兼周身唔舒服,所以又係時候要煲返個超強勁嘅祛濕解毒湯水。
牛大力土伏苓粉葛豬骨湯之前都煲過好幾次,今次同店主姨姨傾開,佢就教我加埋紅蘿蔔一齊煲,話出嚟會甜多啲啲,小朋友又會鐘意飲多啲。既然係咁…就緊係要試下啦~

撰文&圖片:小小豬Kinsey | 編輯:Chloe

牛大力土伏苓粉葛蘿蔔豬骨湯

牛大力有助補虛潤肺,強筋活絡,治療腰肌勞損;

土茯苓除濕解毒、通利關節,有效治療皮膚痕癢;

粉葛有清熱下火、生津之效,尤其對於骨火、胃火盛者功效顯著,而且仲可以治療熬夜頸背筋骨酸痛;

扁豆可以健脾和中,消暑化濕;

赤小豆就利水除濕,和血排膿,消腫解毒;紅蘿蔔有健脾助消化、潤燥明目;

陳皮理氣健脾、燥濕化痰;蜜棗止咳潤肺、化痰平喘功效。(網上資料)。

材料:

牛大力一條、土伏苓一個、粉葛一個、紅蘿蔔一條、赤小豆一兩 扁豆一兩、豬骨$50、陳皮一角及蜜棗4粒~


牛大力、土茯苓都係買新鮮嘅,可以係街市濕貨店買到~

買嘅時候同店員講飲嘅人數,佢地就會幫忙執相關份量,而且仲會幫忙處理添~

做法:
牛大力、土伏苓及粉葛由於已經切好晒,所以用水沖洗幾次~

蜜棗、赤小豆及扁豆浸洗一陣~

陳皮浸軟刮囊~

豬骨洗淨,隨水開始汆水~



煲內加入約4L水,然後加入陳皮~

待水滾後加入所有材料~

繼續用大火加蓋煲約30分鐘~之後轉慢火加蓋煲多2.5小時~

最後加鹽調味,就飲得啦~

店主姨姨真係冇介紹錯,加左紅蘿蔔之後成煲湯都甜左啲啲,少左啲豆味,小小豬都自動自覺要添飲呀!
溫馨提示:
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!

更多精選內容