【親子好去處】觀塘免費工作坊 學用酒塞整盆栽

【親子好去處】觀塘免費工作坊 學用酒塞整盆栽

早前見朋友仔係FB報名參加綠在觀塘免費嘅酒塞盆栽工作坊,見個地點同活動又幾好玩,用收集番嚟嘅酒塞,變成迷你盆栽,減廢得嚟又可以綠化家居。(當然…免費都係一個重要因素….哈哈哈)

撰文:小小豬Kinsey|編輯:KM

親子好去處 觀塘免費工作坊

我就當然即刻都跟住一齊報名,幸運地又抽中左,所以三口子齊齊去學整多肉迷你盆栽啦~

每次去完MegaBox行去搭巴士返屋企都一定會路經依個門口,之前都以為係啲某某公司嘅辦工室,如果唔係朋友仔同我分享,我都唔知原來係一個推廣環保教育,同埋投入減廢回收行嘅社區機構~

活動開始之前就先搵啱自己心水嘅多肉植物同埋酒塞~

原本都只係俾小小豬自己整,不過負責姐姐就建議我地一人整一個,齊齊合力美化屋企,所以就準備整三個啦~

係開始整酒塞盆栽之前,負責姐姐仲會同我地講解一下平日點實行環保生活,帶出減廢源頭嘅重要性~

我地大家乖乖用心聽書之後,就可以開始整酒塞盆栽啦~

首先就要用較剪係酒塞中間挖出一個小洞~

要大約挖到半個酒塞嘅深度~

之後就要係個洞裏填泥土~

然後就要將多肉植物放入泥土裏面~

繼續小心填泥直至多肉植物固定位置~

最後用熱熔膠貼上磁石~

我地三口子嘅酒塞盆栽就完成啦~

小小豬係自己半做半幫下都叫做完成,某程度上都唔算難,只係要將酒塞挖一個小洞就最用力,同埋填泥土時又要好小心,因為唔可以整爛個值物嘛!

我地返到屋企仲將小盆栽貼左係小小豬平日塊磁石白板上,佢話就由佢負責照顧添(其實…一星期都只係滴幾滴水,佢都好易做哦…哈哈哈)

聽負責姐姐講佢地每個月都有兩個唔同主題嘅恆常嘅免費環保工作坊,所以我地都打算密切留意佢地個FB,有啱心水又啱時間嘅工作坊就又嚟玩過啦!

其實都唔止係綠在觀塘,”綠在”係各區都有,好似有綠在深水埗、綠在元朗、綠在東區….,如果大家都有興趣都可以係FB打”綠在(自己嗰區)”搵下有冇啱嘅活動參加下。

既可以等小朋友學習環保,又可以參加下免費社區活動(可能有部分係要收取少量材料費),都係一個唔錯嘅親子活動嚟呀!

更多精選內容