梁朝偉

【老婆視角】劉嘉玲親自操刀 梁朝偉瞬變「花美男」

娛樂

廣告

藝人梁朝偉(偉仔)同劉嘉玲結婚多年,但二人一直都唔會高調曬恩愛。近日,偉仔同嘉玲一齊到日本賞櫻花,嘉玲就分享自己幫偉仔親自操刀嘅「沙龍照」,相中偉仔企喺櫻花樹旁,仲大放電眼,唔少網民都讚偉仔好靚仔,直頭係「型英帥靚正」!

撰文:Kammy|圖片來源:Instagram

劉嘉玲親自操刀梁朝偉瞬變「花美男」

講起梁朝偉,一直以嚟人人都大讚偉佢係「男神」,更係演藝圈中嘅型男之一。偉仔同嘉玲於2008年喺佛教國家不丹舉行婚禮,結束長達20年嘅愛情長跑,二人雖然低調,但一直都係圈中數一數二嘅恩愛夫妻。

網民:偉仔喺嘉玲面前先咁溫柔

近日,佢哋兩公婆就一齊去咗日本賞櫻花,嘉玲仲親自幫偉仔揸機影相,大晒「老婆嘅視覺」。相中嘅偉仔企喺櫻花樹旁,化身成「憂鬱型男」,對住鏡頭放電眼,真係睇張相都畀佢電親!

嘉玲以「春風拂面」嚟形容老公,唔少網民都立即留言,大讚偉仔真係好靚仔,指偉仔「人比花俏」!另外,更有網民表示,偉仔平時畀人感覺好cool,只有喺嘉玲面前先咁溫柔,笑到咁燦爛。

梁朝偉至今已經出道約36年,但佢嘅魅力真係咁多年都冇減退,仲愈嚟愈有男人味添!

另外,除咗「老婆角度」外,嘉玲亦分享咗偉仔幫佢操刀嘅相。呢張「老公角度」,嘉玲攞住兩隻公仔同櫻花一齊影相,成個「大細路」咁,令平時高貴嘅嘉玲露出一點童真,睇嚟只有偉仔先會成日見到呢一面嘅嘉玲!