好老公

【你老公有冇咁做?】好老公6件會做的小事!

熱話

廣告

近日爆出嘅「安心」偷食事件,引起全城關注,許志安隨即被人話係賤男!唔少女仔都好想嫁到個好老公,希望感受到另一半對自己嘅愛。其實女仔係好需要安全感,只要男方願意做到以下幾件事情,女人就大可以放心,而且可以放心咁同自己及其他人講「嫁啱人喇」!

撰文:Kammy|圖片來源:Instagram

好老公6件會做的小事

1. 主動向對方報到

好多女人都有疑心病,最緊張就係自己有冇安全感,成日都好怕對方偷食!呢個時候啲女人就會冇啦啦偵探上身,喺度左Check右Check,唔少夫妻更因為咁而覺得不被信任,反而令感情狀況變壞。

如果老公會主動向對方報到,除咗係對感情負責任,亦係對呢段感情同對對方嘅一份尊重。真正嘅好老公,會主動向你坦白,唔會畀你擔驚受怕、唔會畀你因為某一發現啲咩嘢而難過,更唔希望彼此吵架分開,所以會主動做出令你放心嘅事,唔需要你問東問西。

2. 會製造浪漫驚喜

好多男人都話自己唔識浪漫,其實浪漫唔一定要洗好多錢,有時只係喺重要嘅日子食餐飯、陪對方散下步、買啲小禮物就已經畀到驚喜對方。如果真係冇時間,好男人/好老公都會花小小時間去同你傾陣電話,有時陪伴就已經係一種「浪漫驚喜」,令女方感受到自己被愛。

3. 同你分擔家事

依家好多屋企都係兩公婆一齊做嘢,所以家事都唔再好似以前咁只係是但一邊做晒。如果你老公會同你一齊分擔家裡嘅所有事,好似係做家務、去超市入貨等,唔只令女方感受到自己被重視,仲會令彼此嘅感情都會升溫,而且係個真正嘅好老公!

4. 所有錢畀你管

作為一個好老公,其中一樣就係畀晒所有錢老婆管。好多男人都覺得,畀晒錢老婆會好冇自由,同好唔型。不過,其實老婆掌管啲錢,除咗可以幫對方草錢,對老婆嚟講不論係經濟上或是感情上都會有好大嘅安全感。所以,如果你老公願意將所有賺到嘅錢畀你管,佢真係十分愛錫你!

5. 愛屋及烏

好多傳統大男人都會覺得,女人嫁得畀自己就唔可以成日返去娘家,反而要老婆聽晒自己同夫家嘅家人話。不過,如果係真正嘅好老公,首先會對你嘅父母當成自己嘅屋企人一樣,愛屋及烏,而且仲會成日陪你返娘家,娘家有咩要求都唔會拒絕,唔只畀你覺得自己嫁啱人,就連你屋企人都會好放心!

6. 遇上咩事都唔會嫌棄你

好多男人都會用唔同事去嫌棄女方,好似嫌對方煩、肥、阻住佢做嘢等,有時仲將責任歸咎到女方身上。另外,更有啲男人因為面子,唔肯承認自己嘅錯,貶低女方嚟抬高自己,呢啲男人真係十分唔要得!

如果係真正嘅好老公,佢首先唔會嫌棄你任何嘢,會大方接受,而且會鼓勵你去做你喜歡做嘅事,尊重對方,會承認自己嘅錯,仲會喺其他人面對稱讚你添!你哋又搵到個好老公未呀?