袁彩雲 榮升校監教外語

在德國出世長大的Fiona和Lina，精通中、德、英、法語，故課程主打四種語言。Fiona指身為中國人，中文不可或缺，雖然身在加國，教女亦以中文為先，「中文係好靚嘅語言，說話優雅，中國人一定要keep番自己語言。」

加國湊女好輕鬆
袁彩雲誕下Alycia後，在港坐月兩個月才帶女返回加國。2009年，Fiona嫁雞隨雞到加國溫哥華生活， 節奏緩慢，生活非常悠閒，坦言「喺加拿大好幸福」，即使誕女後，男主外女主內，她負責湊女一切事宜，也不覺得忙碌，皆因囡囡好易湊，「佢坐得好定，食飯坐足半個鐘，擺佢落遊戲床，又可以自己玩半個鐘，我可以行開一陣做自己嘢。」

10個月大的Alycia正處於摸索期， 對每件事都感好奇，Fiona多帶囡囡到公園、圖書館盡情探索，「我花好多精神同佢玩，加拿大有好多好靚嘅公園，小朋友可以盡情發洩。而當地圖書館開辦好多免費班，我每星期帶佢上堂，跟老師唱歌、聽故事，仲有啲實用收費班俾家長上，好似急救班、BB按摩班、手語班等等，我都有興趣。」Fiona形容囡囡性格屬開朗型，經常笑嘻嘻，「每朝同佢講早晨都會笑，尤其見到嫲嫲最興奮，手腳撐撐，感染嫲嫲都開心咗。」

坐月每日飲米水
出過食譜及主持飲食節目的Fiona，當然重視日常飲食，坐月期間跟足傳統，飲薑醋、雞湯、戒生冷食物，每日飲米水代茶，「炒米加圓肉、紅棗、南棗，每日當水飲，對奶水都有幫助。」坐月飲食稍一不慎，有機會影響身體復元，Fiona

強調蔬菜都要慎選，多食「正氣菜」，「菜心、番茄、西洋菜、芥菜、紅蘿蔔、節瓜、合掌瓜等都可以多吃，但忌吃白蘿蔔、苦瓜，太涼。」

Fiona覺得身體復元幾好，「坐月後身體好似另一個人，返加拿大都唔怕凍，以前手腳好冰。」但她自言未修身，距離最fit時期仍多十磅，現在加緊操fit自己。

姊弟合力辦學
完成了誕女人生大事，Fiona另一大事只是剛剛起步，近一年她涉獵教育事業，與妹妹Lina合資過百萬開辦兒童教育中心Lingo Academy，設美術、音樂及語文班，以英、普、法、德四種語言教學，針對6個月至10歲小孩。Fiona早前首次撇下女兒返港，協助開幕事宜，但她留港一周期間，遇上嚴重時差反應，一到下午就瞌眼瞓，「如果帶埋個女返嚟，佢一定會jetlag！等佢大啲先帶佢返香港。」

袁氏有七姊弟，Fiona是四家姐，Lina排第六，兩人相差八年，童年一起在德國長大，讀書生涯充滿創意，完全沒壓力，她們希望把德國風的教育帶來香港。Lina辭去高薪厚職的iBank工作，轉型發展教育事業，得到家人全力支持。人多好辦事，Lina任校長、教師兼課程設計，身在加拿大的Fiona成為校監，負責給予行政、硬件設施的意見，如裝修色調、衛生等，更幫手宣傳工作；而兩人的弟弟負責科技及電腦，一家人合力辦好教育中心。

針對德瑞面試
Lingo重視德語教學，除了吸納留港德國人入讀之外，還針對有志入讀著名學府「德瑞國際學校」的小孩，打好入學根基，Lina解釋：「德瑞面試以傾談形式，一定要放膽說話，太怕醜唔敢講嘢會fail，課程會透過表演、演講去建立小朋友膽量，加強生字學習。」教育中心部分顧問是德瑞及其他國際學校老師，Lina常與他們傾談，了解國際學校間的教學及入學情況，再加強相關課程，提高小朋友入學機會。

事業剛起步，Fiona和Lina已希望開分校，選址新界，甚至推行義務教學，Fiona說：「新界比較缺乏playgroup，有市場。妹妹以前做iBank都有搞慈善活動，接觸過好多貧苦家庭，希望將來透過義教，幫助更多小孩學習。」

一歲教德文
不論在公在私，Fiona都是校監，在家好好監督女兒的教育，她尤其重視中文學習，「一定要keep番自己語言，我喺屋企都係同佢講中文多，佢喺加拿大生活，英文自然會識，所以一定要教中文，遲吓會帶佢返playgroup學寫字。」好多人話孩子像海綿，盡量讓他們多聽不同語言，愈早學愈吸收，不必怕混淆，精通多國語言的Fiona卻持相反意見，對女兒現時只集中學中英文，「同步學雙語係慢過學單語，如果一次過學多種語言，學習仲慢，所以我傾向先講中英文，大約一歲先開始教佢德文。」

對於女兒讀書方面，丈夫Anthony全權交由太太負責，Fiona暫時偏好加拿大教育制度，競爭小、學習環境輕鬆、校園空間大，但在香港讀書亦有優勢，「喺香港讀書嘅人，吸收能力係好啲，佢哋喺香港讀完，再來加拿大讀好易上手，先學難，再學易係好啲；而且喺香港讀中文程度更加好。不過香港讀書要爭學校，競爭好大，我唔識同人爭嘢，所以好矛盾……」

女仔必學儀態
不過囡囡入學前，Fiona有件事一定要先教，終身受用，「儀態，女仔一定要學好儀態，例如食飯要坐好，唔可以歪歪斜斜、戙高腳，着裙要收一收先坐，同人傾偈要細聲啲，有禮貌。小朋友性格比較急進，學咗儀態會斯文啲，做嘢有耐性，性格都比較聽話。即使將來生多個仔都會教，佢哋代表江家㗎嘛。」

不過，年紀尚小的Alycia未懂禮儀，像個男仔頭，Fiona說：「佢依家坐姿好豪邁、好歎，一啲都唔斯文，等佢兩歲我就開始教，我依家都做緊身教。」Fiona在加拿大曾出任儀態導師，指導想選美的女孩，有專業的媽媽教導，話唔定Alycia將來成為選美新一代。

母女名字測吉凶
袁彩雲與囡囡江軒慧的名字，讀音靚，字面有意思，原來從她們的名字，更能深入看出性格及吉凶禍福。本刊邀請了有現代神算之稱的楊皓雲師傅，為本刊官方網站主持測名節目，以姓名學去預測多位名人及其子女的命運。打頭陣有嘉賓主持袁彩雲，一連三集為她和囡囡測名，拆解她們的性格特質，如何趨吉避凶。

撰文：Ling
攝影： Paul Cho（i 部分相片由受訪者及Yinger Photography提供）
髮型：Kate Shek@Hair Culture