鎖定目標!青衣戲棚掃街必食十大小吃

鎖定目標!青衣戲棚掃街必食十大小吃

青衣戲棚夜市又返嚟啦!今次天后誕夜市由即日起至五月廿二日(星期五),一連五日喺青衣市政大廈旁舉行。記者於首晚親身直擊,場面墟冚到如台灣夜市,數十檔街頭小食眾首一堂,好不熱鬧!但同時遊人如鯽,檔檔最少排半個鐘,莫講話要食晒,幾個鐘內要巡勻咁多間都有難度,今次編輯就為大家精選咗以下十檔最吸引嘅小吃攤檔,大家不妨同朋友一人排一間,就可以最短時間食到最多嘢喇!速報!

望住呢條黑壓壓嘅人龍,唔止似台灣夜市,更似年宵花市!
望住呢條黑壓壓嘅人龍,唔止似台灣夜市,更似年宵花市!
嚟戲棚戲肉唔係睇戲,係掃街,仲要相機食先呀!
嚟戲棚戲肉唔係睇戲,係掃街,仲要相機食先呀!

 

青衣戲棚簡介

每年農曆三至四月,青衣都為「真君誕」及「天后誕」而設臨時戲棚,同時在場外設有數十個熟食攤檔。早前的四月尾五月初的舉行的「真君誕」夜市,意外地吸引了不少人前往「掃街」,而幾日的pop-up夜市結束後,大家仍意猶未盡,反而更期待今次於同場舉行的「天后誕」夜市,大家由即日起至22日,每天傍晚至凌晨一時,可以到場趁墟,免費入場。

每年青衣都有兩次夜市,依家已經係第二輪。
每年青衣都有兩次夜市,依家已經係第二輪。
甫一進內就見到各大小攤檔,實在吸引呀!
甫一進內就見到各大小攤檔,實在吸引呀!

下一頁:原隻西瓜汁 + 秘製燒鮑魚

#1 冰鎮原隻西瓜汁

呢檔用原隻迷你西瓜仔,開蓋後用電鑽嚟打爛西瓜肉成汁,夠晒搞鬼,所以全場呼聲最高,條龍長排長有!加上天時暑熱,行到身水身汗時吮一啖,絕對醒神!價錢方面,一隻都係廿八蚊,唔算太貴。

wm220__MG_6758

wm220__MG_6857

wm220__MG_6863

 

#2 秘製燒鮑魚

辛苦得嚟志在食,掃街都可以食好啲嘅,好似呢串鮑魚淨係睇都令人流口水啦,燒起上嚟啲秘制醬汁真係引死人!一串有兩隻都係卅蚊咋,平均十五蚊有一隻飽魚食呀,邊度搵呀?

wm220__MG_6771

下一頁:重慶水餃 + 泰小食

#3 重慶水餃

係西瓜汁隔籬呢檔都見人龍,場內鮮見賣湯水餃,重慶式口味有辣有唔辣,大大煲長烚長有,廿八蚊一份已夠兩至三人淺嘗。記者於首晚見到條人龍都好長吓,同朋友一邊排西瓜一邊排水餃就啱喇!

wm220__MG_6726

 

#4 泰小食

呢檔泰小食應該係場內唯一泰式小食檔,佢嘅泰式拼盤唔錯,蝦餅、魚餅及春卷等每樣有啲,四十蚊一份已經可以同朋友開心share,另外仲有蟹鉗同埋豬頸肉,雖然有人龍,但唔算太長,食得過。

wm220__MG_6834

wm220__MG_6848

下一頁:無名串燒 + 蒜爆王

#5 無名串燒

嚟得夜市,烤肉串燒從來都係主角,呢檔串燒雖然行不改名咁有型,但淨睇人龍誇張度同埋聞住啲燒烤味嚟搵,相信你唔會搵唔到!各式肉串十四蚊起,司華力腸就十六蚊條,價錢合理,可一次買多幾串同朋友仔狂擦!

wm220__MG_6824

 

#6 蒜爆王

一入場內中央,首見人龍就係呢檔嚟自上水嘅蒜爆王,蒜香飄蕩惹味小食即炒即賣,由雞軟骨、鴨舌、牛肉至魷魚等都有,至全部都係爆炒香口嘢,細份廿蚊,大份或雙拼卅蚊,仲有得加辣!另隔籬仲有檔韓式烤魚乾連埋一齊,口味新鮮少有!由於即叫即炒要等,建議一次過買幾款!

wm220__MG_6710

wm220_2015-05-19_052647

下一頁:鐵板海鮮 + 豬頸肉

#7 鐵板海鮮

黑椒味夠勁,記者想行前兩步影張相都食晒胡椒煙霧,幾乎標眼水!可想而知隻鐵板燒起時,啲海鮮上嚟有幾惹味!大蝦、大隻扇貝及大塊魷魚等都有,聞到都流口水,難怪條龍又係勁長!

wm220__MG_6712

wm220_2015-05-19_045316

 

#8 鐵板豬頸肉

嗚呀!鐵板生煎原塊豬頸肉,靚仔老闆仲要邊燒邊切,啲肉汁係咁流出,蒸上嚟果陣香味真係離遠聞到都不得了!好在呢檔位於場邊位近天橋位置,人龍唔算太多,排一陣就有得食,值得去!

wm220__MG_6777

wm220__MG_6779

wm220_IMAG1605

下一頁:燒生蠔 + 鯛魚燒

#9 燒生蠔加芝士燒菇

呢檔同位於角落場邊嘅燒蠔,雖然瑟縮一角,但人龍卻係全場之冠,由於係生燒需時較長,起碼要排半個鐘先有得食!主打正宗流浮山生蠔廿幾蚊隻,隻隻都肥大多汁,不過唔知點解特登用隻扇貝殼嚟燒?同檔仲有近期好興嘅燒大菇,打隻蛋再加塊芝士係上面半溶拉絲,極邪惡!

wm220_2015-05-19_050839

wm220__MG_6798

wm220__MG_6793

 

#10 鯛魚燒

終於到甜品出場啦!近期好興嘅鯛魚燒係呢度都搵到,熱辣窩夫餅內可揀紅豆或吞拿魚餡,上面再加球雪糕,冰火體驗都係廿蚊咋,平過出面街邊多多聲啦!

wm220__MG_6682

wm220_2015-05-19_051001

下一頁:前往方法

前往方法

講到咁吸引,最後當然係話埋俾大家知點去青衣戲棚啦,其實青衣戲棚就喺青衣市政大廈旁邊,所以四通八達,以下交通方法都可去得到。

港鐵青衣站C出口步行約15分鐘
KMB41A號巴士…尖沙咀東至長安
KMB49X號巴士…廣源至青衣碼頭
KMB44M號巴士…長安至葵涌邨
KMB42C號巴士…藍田鐵路站至長亨
KMB43B號巴士…荃灣西鐵路站至長青
KMB243M號巴士…愉景新城至美景花園
KMB948號巴士…長安至銅鑼灣(天后)
88D號綠色專線小巴…葵芳鐵路站至青衣碼頭

140M號綠色專線小巴…青衣鐵路站至屯門(恆福花園)
308M號綠色專線小巴…青衣鐵路站至荃灣(浪翠園)(循環線)
310M號綠色專線小巴…青衣鐵路站至荃灣(海濱花園)(循環線)
401號綠色專線小巴…青衣碼頭至石蔭
409號綠色專線小巴…長亨至荃灣街市街(循環線)
(上列資料擇自康文署網頁)

青衣戲棚2015
地址:青衣青綠街38號青衣市政大廈旁
日期:5月18日至22日
時間:小食檔下午開始營業至深夜
費用:免費入場

撰文:Pan Lam
攝影:Clay Lam、Pan Lam

更多精選內容