【止咳秘方】白蘿蔔蜂蜜糖漿

【止咳秘方】白蘿蔔蜂蜜糖漿

轉天氣,啲診所就最好生意㗎喇!我哋早排全家病晒!不停咳咳咳,夜晚瞓覺咳得特別厲害,搞到冇覺好瞓呀!咳咗成個星期,最後響網上搵到個止咳小偏方,其實連日本節目都有推介過,估唔到咁快見效,第二日已經冇晒咳喇!一定要將呢個神奇嘅止咳秘方介紹畀大家呀!

撰文&圖片: 晴朗媽媽 | 編輯:Chloe

神奇止咳秘方 白蘿蔔蜂蜜水

【止咳秘方】白蘿蔔蜂蜜糖漿

材料:
白蘿蔔 1條
純天然蜂蜜 1樽

就係咁多,冇㗎喇!係咪好easy呢?^^

做法:

1. 將蘿蔔去皮洗淨

【止咳秘方】白蘿蔔蜂蜜糖漿

2. 抹乾蘿蔔上嘅水份

【止咳秘方】白蘿蔔蜂蜜糖漿

3. 將蘿蔔切粒

4. 將蘿蔔粒放入玻璃樽內,唔駛放滿,大約去到樽嘅一半就ok

5. 倒入蜜糖,唔駛蓋過晒啲蘿蔔粒,以樽嘅一半為界線

6. 用匙羮輕輕攪拌後,扭蓋封口

7.跟住就成樽放入雪櫃冷藏約5小時~

【止咳秘方】白蘿蔔蜂蜜糖漿

只係用咗半條蘿蔔+半樽蜜糖~

淨番嘅唔想嘥,索性倒晒落一個兜度,一次過整埋佢!

搞掂之後,包好保鮮紙,放埋入雪櫃冷藏~由於時間關係,5個鐘已經過去喇!XD

見唔見到冷藏前(左)同冷藏後(右)嘅分別呢?啲蘿蔔粒縮咗水,釋出咗蘿蔔水,所以蜜糖睇起上嚟多咗,亦都變稀咗~

從上望落去分別會大啲,冷藏前(上)明顯見到晒啲蘿蔔粒響蜜糖之上,冷藏後(下)就沈晒落去蜜糖水度喇!

嘩!開蓋嘅一刻,湧出強烈蘿蔔氣味,好想快啲試下味呀!

食用方法:

1. 倒出半杯蘿蔔蜂蜜水

2. 加半杯暖水稀釋

3. 搞掂!話咁快就飲得喇!

【止咳秘方】白蘿蔔蜂蜜糖漿

偏方老少咸宜,無論大人、小朋友都啱飲㗎!我哋唔客氣喇!

飲完一杯已經覺得喉嚨舒服咗~

除咗飲蜜糖水之外,食埋啲蘿蔔粒功效仲好呀!

我覺得蘿蔔粒味道就好似醃漬蘿蔔,脆卜卜,幾得意!

但晴朗就唔係幾識欣賞喇!上面第3幅圖已經可以講明一切~XD

不過佢哋都好鍾意蜜糖水嘅味道,好快就飲完一杯。我都覺得好清甜,幾好飲!^^

一日飲4-5次,夜晚瞓覺已經冇再咳喇!第二日再飲多一杯,咳就好番晒!好神奇呀!

白蘿蔔對氣管好,可謂蔬菜人蔘!品味辛甘,可用於治療多種疾病。既可理氣化痰、生津止咳,亦可補腎益氣,緩解咳嗽。而蜂蜜味甘,具有補中緩急、潤肺止咳、潤腸燥、解毒、美容養顏等功效。二樣加埋一齊,可以話係治療咳嗽嘅絕世秘方呀!

白蘿蔔蜂蜜水可治喉痛聲沙、咳嗽氣喘、支氣管炎等症狀。如果乾咳、痰咳、夜睡咳、喉嚨乾或喉嚨痛,不仿試試!寒熱咳都飲得!上網查過,原來日本人都好興用呢種方法止咳。不過要明白每個人體質唔同,未必對個個人都會產生效用。如果有效,飲一兩次已經明顯咳少咗㗎喇!咁簡單易整,就算去旅行咳起上嚟都可以即刻買材料整嚟飲啦!既方便又有功效,實行要常備一樽看門口呀!

小貼士:

– 一定要用純正天然蜂蜜
– 浸製嘅器皿要用玻璃樽,唔好用膠樽
– 飲嘅時候加暖水就得,如果用太熱嘅水會破壞蜂蜜嘅營養

– 偏方具有潤肺功效,老人家或慢性支氣管炎嘅人飲用效果更為顯著
– 1歲或以下幼兒不宜食用蜂蜜,可以麥芽糖取代蜂蜜
– 不建議孕婦飲用,因為飲過多蜂蜜水可能會導致體溫下降,怕會影響埋bb
– 放雪櫃,可保存1-1.5個月。如果想期限耐一啲,加多啲蜂蜜可存放兩個月

 

坊間嘅止咳化痰方法都好多,好似陳皮水、洋蔥水、蒜頭水、川貝燉雪梨、燉枇杷…其實久咳真係好折磨人,尤其係小朋友一咳,媽媽嘅心就離一離。希望今次介紹呢個小偏方可以幫到大家啦!

更多精選內容