潤腸通便 決明子菊花茶

潤腸通便 決明子菊花茶

專欄

廣告

好多小朋友都鍾意食煎炸熱氣食物,但又拒抗飲下火涼茶。呢個決明子菊花茶清甜易入口,清熱之餘可以紓解眼睛周圍壓力,最重要係可以幫助體內排毒。如果小朋友有便秘問題,就不妨飲多兩杯啦。

撰文&圖片:小小豬的成長日誌 | 編輯:Chloe

簡易護眼茶 決明子菊花茶

菊花同甘草就成日都會用到,菊花可以清熱及有明目嘅作用;甘草有助清熱解毒及補脾益氣(不過就唔可以落太多,如果唔係就變左有毒)。

材料:

菊花 適量

決明子 一湯匙

甘草兩片

依個就係決明子,我都係第一次接觸,所以即刻上網搵資料,原來係可以促進新陳代謝,有降血壓及膽固醇效果,還能紓解眼睛周圍壓力,淡化黑眼圈,如果有便秘困擾,也能幫助體內排毒~

做法:

將決明子、菊花及甘草稍微沖洗~

 

同一時間用熱水焗下個燒燜杯/暖杯,蓋好蓋,暖杯備用~

暖杯約15分鐘之後,倒左啲水,將所有材料放入~

加入熱水,蓋上杯蓋燜約15-20分鐘,不過我想出味啲,我焗左30分鐘先飲~

焗完就可以飲得,不過如果飲慣甜味嘅朋友,可以等茶至室溫後加入少少蜜糖飲用(我自己就冇加蜜糖,都覺得夠味)~

其實我覺得同普通嘅菊花茶味道都係差唔多,不過就多一份甘味,飲落都唔錯呀!焗完一杯之後,可以反覆加熱水沖泡,可以有繼續飲,直至味道變淡為止。我用依個分量飲左一個上午,都可以話KEEP到四杯左右呀!

 

簡單少少材料及一隻保溫杯就得,真係既方便又簡單,非常啱各位靚靚上班一族,返工時飲水飲到悶可以焗杯嚟飲,好過成日飲啲唔健康嘅飲品嘛!

 

溫馨提示:由於材料都涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

雖然做法簡單方便,不過並唔係人人都適合飲菊花茶,由於菊花茶性寒,免疫力比較低、脾胃較為虛弱,如孕婦老人就要慎飲啦。

BY 小小豬的成長日誌