細數圈中6對閃電離婚夫妻
撰文：Kammy｜圖片來源：Instagram，微博，Youtube截圖，新傳媒集團圖片庫
圈中6對閃電離婚夫妻
1. 吳志誠何艷娟
近年最轟動嘅莫過於係吳志誠何艷娟「閃結閃離」。現年27歲、2014年港姐季軍何艷娟（Katherine），喺去年7月同當時66歲嘅澳博營運總裁吳志誠入紙申請結婚，大家以為呢段相差40年嘅爺孫戀修成正果，但昨日何艷娟突然喺IG宣佈離婚，仲話喺和平氣氛下分開，兩人婚姻只係維持8個月。其後何艷娟與吳志誠更發聯名聲明，內容如下：
「為免不必要的揣測和誤會，其實我們早在去年已經分開 ，各自也有各自的生活，但不論私底下或出席公開場合我們一直保持好朋友關係。我們感謝彼此的相知相遇。我們的關係從來沒有涉及任何金錢上之考慮或因素。我們是在互相諒解和友好的情況下決定分開的。我們重申分開並沒有任何金錢的糾紛。我們再見亦是好朋友。」
當年何艷娟當選港姐後，和同屆港姐冠軍邵珮詩和亞軍王卓淇參與澳博的宴會而認識對方，吳志誠對何艷娟一見鍾情，男方展開熱烈的追求攻勢，送鑽石首飾作見面禮，好闊綽。而二人正式交往後何艷娟富貴逼人來，雖然在無綫只係藝員仔，平日出入有司機接載，身上名牌亦不少，深得澳博男友寵愛，早在16年何艷娟便以一千八百萬買入君臨天下一個單位，首度做業主已經係買豪宅，有指該豪宅正是未來老公吳志誠送贈的訂情禮物，而同吳志誠入紙登記註冊，兩人亦同報半山麥當勞道豪宅。
來自北京的何艷娟，是港大法律系畢業生，14年當選港姐季軍的她，同屆冠軍是邵珮詩、亞軍王卓淇。參選亦令何艷娟人生改寫，14年以港姐季軍銜頭，出席澳博活動邂逅未來老公吳志誠，拍拖三年多爺孫戀開花結果。
吳志誠身家豐厚，保守估計逾30億港元，回顧二人拍拖期間，何艷娟於IG出post從不會post她與老公的合照，而本刊去年就拍得何艷娟跟戴著口罩的吳志誠拍拖，何對女友呵護備至，何艷娟唔介意帶埋阿媽同行！
何艷娟雖然帶埋阿媽，同老公吳志誠拍拖行超市，不過，何母亦好識做，間中會企開啲，唔想妨礙女兒拍拖。同未來老公即使年齡相差40年，一樣冇代溝，全程黐實商量買啲乜，非常甜蜜。
吳志誠對老婆非常體貼，見老婆攞住大袋物品，即刻搶住幫手攞，絕對唔使老婆操勞，何艷娟亦可輕鬆邊行邊飲嘢！
同身家「億億聲」的吳志誠拍拖後，何艷娟生活亦變富泰無憂，不時坐遊艇出海，又學畫畫。雖然演藝事業發展平平，何艷娟婚前婚後經常周遊列國，而且打扮亦富貴。
2. 周潤發 余安安
要數閃婚閃離嘅夫妻，一定要數周潤發同余安安！余安安曾經喺節目上透露，自己早已喺1976年拍《池女》時便認識周潤發。其後，二人因工作再重遇，當時余安安正值事業高峰期，每日都好忙，好想揾人依靠，加上周潤發突然向自己求婚。余安安表示：「我當時覺得幾有feel，所以就嫁。」
結果，二人於1983年就閃電結婚，當時仲有電視直播佢哋嘅婚禮，轟動一時。
不過，當時只得23歲嘅余安安認為太衝動，二人都未到適合結婚嘅年紀，亦見唔到將來，所以佢哋最終都和平理智地分開，結束只有9個月嘅婚姻。
3. 呂良偉 周海媚
近日播映嘅《倚天屠龍記》中飾演滅絕師太嘅周海媚，其實同呂良偉有過一段情！兩人喺1985年拍《小島風雲》互生情愫，並於1988年同遊美國拉斯維加斯期間，情到濃時更直接在牧師見證下結婚，而周海媚當年只得21歲。不過，結婚僅一年女方便提出離婚。
不過，原來兩人當年只係申請結婚，未有喺一年內完成註冊，所以其實呢段婚姻係唔成立。但事後二人都指冇後悔過有呢後「婚姻」，當時大家都好認真，只係有點糊塗都同太年輕，未知愛情係咩一回事，一齊生活後先發現理想同現實有出入。
4. 關之琳 王國旌
1981年，當時19歲嘅關之琳不理父母反對，喺美國拉斯維加斯下嫁只相識2個月、比佢大16年嘅富商王國旌，關之琳更喺婚後做全職太太，退出娛樂圈，但可惜婚姻僅維持8個月告終。
關之琳當年唔理父母反對，喺美國下嫁只相識2個月、比佢大16年嘅富商王國旌
5. 伍詠薇 翁江培
伍詠薇於1989年喺雜誌周年派對上認識大佢30年、香港安永會計師事務所高級合夥人翁江培，伍詠薇當年參加亞洲小姐更係因為受到翁江培鼓勵。二人相處一年半後，於1990年12月結婚。
不過，伍詠薇同翁江培新婚13日之後，翁江培突然喺深圳因心臟病發被送院搶救，最終都死於心肌梗塞，令當年只得21歲嘅伍詠薇突然做咗寡婦。當時伍詠薇更一度被人指佢剋夫、貪錢，仲誤傳佢分咗一億七千萬嘅遺產，但其實當時伍詠薇三年收入係負數。
6. 劉翔 葛天
運動界都有代表。前中國田徑運動員於2014年喺微博宣佈與演員葛天於9月結婚，不過喺2015年，劉翔喺微博發文宣告離婚：「我與葛天2014年5月戀愛，同年9月結婚，婚後因性格不合，於今天結束這段婚姻，希望今後各自都有更美好的人生，祝願彼此。」
