超強神隊友護航陪入產房產子

超強神隊友護航陪入產房產子

上回說到,因為BB頭部愈來愈落,壓著我直腸,我超想大解,但因為未開夠度數,不可以用力,更不可以痾(「痾」是指「推個BB出來」),否則會逼傷子宮頸。

撰文:我家恐龍Do Re Mi|圖片:新傳媒資料庫|編輯:YIU

產房等待子宮頸一度一度地開

 

但想像你個肚本來已經十級痛,不幸地還遇上十級肚瀉,你是否恨不得立即萬馬奔騰滾滾長江地解放?但偏偏你要忍,等待子宮頸一度一度地開,期間經歷一次又一次每三分鐘便痛一分鐘的陣痛。我癲到不停慘叫,雙腳不由自主地撐來撐去,這個時候,「笑氣」已經不是太幫到我了。

產房等待子宮頸一度一度地開
產房等待子宮頸一度一度地開

超強神隊友護航陪入產房

原來十級陣痛不是最慘,是忍屎才是最慘 !但幸好老公臨危不亂,無被我個癲樣嚇壞(可能已經見慣),除了緊緊捉住我隻手,還不停鼓勵/命令我「忍住,唔好痾」畢竟在人意志最薄弱時,他強而有力的聲線成為我最大的支持!雖然不知道可以如何忍,但我知道唯一可做就是盡力忍!

超強神隊友護航陪入產房
超強神隊友護航陪入產房

期間我自然穿水了,感覺是在極痛之下逼爆了氣球般,「噗」一聲之後一浸暖流大量湧出來(其實唔痛的,因為陣痛已經蓋過一切),又水又尿之下身體超級冷,感謝姑娘及老公不時為我加氊子及蓋氊子。

時間一分一秒地過去,姑娘再入來檢查,終於開⋯⋯夠⋯⋯十⋯⋯度⋯⋯啦⋯⋯可以痾啦(推個BB出嚟)!

但係⋯⋯我,我,我⋯⋯便秘呀!

姑娘再入來檢查,終於開⋯⋯夠⋯⋯十⋯⋯度⋯⋯啦⋯⋯可以痾啦
姑娘再入來檢查,終於開⋯⋯夠⋯⋯十⋯⋯度⋯⋯啦⋯⋯可以痾啦

我陀大女時胎位比較高,她個頭亦只是落左三分二盤,(之後我還發現她頭圍比其他初生BB略大)唔知關唔關呢啲事,抑或我唔夠氣生(之前兩晚完全瞓唔到),總之差唔多成個鐘還是得個吉。
期間我聽到老公不停開聲為我祈禱,又在我每次用力時好似打氣團咁叫我「出力呀!」肉緊之情仍瀝瀝在目。

已經一個小時了,大女個頭(其實是頭髮)還是只見到少少,我一唔用力又縮返入去,救命!老公就不停說:「用力,差少少咋!!見到啦,⋯⋯唉呀(因為又唔見左)⋯⋯」

我竟然覺得他好煩!我夠知要用力啦,可以生嘅我都生左啦!於是下次當他又大聲叫「用力」時就一拳中落他心口:「收聲呀!」,然後我見到兩個助產士呆左,老公就好委屈地按著心口,一兩秒後我回過神來,心想:「我仲咩打人呀?老公都係鼓勵我姐!」唯有道完歉後繼續努力啦!

情況緊急險用儀器吸/鉗BB出嚟

好,又重新上路,老公跟我說豬B(大女乳名)也很努力,因為BB心跳機的顯示在我每次用力時也出現變化,大女也在移動她的身體,她正配合我的動作!我默默唸著:豬B加油呀,我們一起加油!#此時此刻我真的覺得我們三個人一條命!
因為已經過了一個小時有多,情況開始緊急,醫生也進來了,表明再生唔到就要吸或者拑BB出嚟,真是嚇死我啦(因為聽聞吸BB出嚟好痛㗎,要兩邊都剪會陰放個吸盤入去先),我唔可以比呢樣嘢發生係我身上㗎!突然充滿鬥志!

就在醫生替我壓住個肚,我又用力(本身三下呼吸為一組的動作我就喺呢刻出盡力變五下為一組),心中呼求主耶穌幫助我呀!加上助產士的順勢一剪,我就突然聽到「哇啦哇啦」好夠中氣好激動的BB哭聲(可能個女都投訴緊我生咁耐),呀⋯⋯我真是生到呀?完全不敢相信!(生出來嗰一下是沒有感覺的)

而我一直認為我會感動大哭,誰⋯⋯知⋯⋯沒⋯⋯有⋯⋯我第一個感覺是:我終於唔痛可以去瞓覺了(之前兩晚無瞓呀大佬!)

感謝超強神隊友

BB已經被護士抹乾淨,做了檢查,帶上帽子包上被子了,而我第三產程也完成亦縫好針,我問老公為何還呆呆的待在我身邊?去幫BB拍拍照嘛,他才「哦」一聲去了。事後我問返他,他才道出原因:「不想我覺得『他有了女兒便沒有太太了』」,所以想仍然待在我身邊支持我!我⋯⋯真是感動得眼淚在打圈!謝謝這位可能是世界上最好的陪產者!

更多精選內容