買男BB衫暗示陀仔？胡杏兒：BB性別只有屋企人知

撰文：Kayla｜圖片來源：胡杏兒Instagram、TUNGSTAR

之前有傳媒影到胡杏兒同奶奶一齊喺連鎖時裝店買藍色BB衫，今日胡杏兒就現身解畫，話佢只係買BB衫俾屋企以前個工人姐姐：「佢（工人姐姐）同我預產期一樣都係7月，真係好神奇！」

Brendan唔知BB性別

胡杏兒話，BB性別現時只有屋企人知，就連仔仔Brendan都唔知：「其實佢唔知自己就嚟做哥哥，佢會攬、錫我個肚，但唔知入面有個人，只係覺得個肚好得意，會摸吓錫吓，好奇怪我個肚咁大。可能等第二個BB出世，先教他做哥哥。」胡杏兒表示，就連「胡說八道會」幾位好姊妹都唔知BB性別，非常神秘！

之前胡杏兒帶埋仔仔Brendan同鍾嘉欣High Tea，幾個星二代第一次見面，難免有啲唔熟悉。胡杏兒話當佢喺仔仔面前抱Kelly（鍾嘉欣女兒）時，發覺仔仔好似有啲呷醋：「佢呆咗，但冇大喊。」胡杏兒又話覺得做老二好慘，全部用品都要執哥哥手尾。

第二胎想順產

第一胎揀自然分娩嘅胡杏兒，第二胎都想順產，但胡杏兒話最近睇返自己生Brendan時嘅影片，就愈來愈覺得恐懼：「我最近開始重溫第一次生B嘅影片，事關今次都想順產，所以要做定心理準備，但諗起那種痛就覺得有點啲恐怖，所以好想盡快卸貨。」

胡杏兒首晒孕照

胡杏兒之前一直被傳有身孕，加上夫妻二人曾揚言會好好努力造人，終在年頭宣佈懷有第二胎，並留言：「豬寶寶終於加入，李氏農場可以開張了！」

圖中可見，胡杏兒穿上黑色泳衣，其孕肚明顯，而且上圍豐滿不少，不少網民都大讚胡杏兒「佗得超靚」。

另外，胡杏兒亦上載同兒子Brendan在水中對望的照片，Brendan更擘大口望實媽媽，十分可愛！胡杏兒更表示，自己十分喜愛這張相！

胡杏兒佗B照開工

早前雖然胡杏兒正佗著第2胎，但當時仍在橫店拍攝新劇《末代廚娘》。近日劇集終於煞科，胡杏兒亦有時間可以好好休息。

大仔驚喜現身

胡杏兒在這段日子一直都身在內地，必定很掛念寶貝仔Brendan，而近日家人更安排囝囝來到橫店探班，給胡杏兒一個驚喜。胡杏兒在社交平台上載跟囝囝的背影，胡杏兒表示，Brendan第一次來橫店非常興奮，更興奮得一直在片場內跑來跑去，十分可愛！

佗B鼻變大疑又生仔

胡杏兒雖然已宣佈懷有第二胎，不過就未有公佈胎兒性別。早前，她就在社交平台貼上大頭照，指鼻子又變大：「懷孕了還是要好好做運動的，我會選擇健身單車，滑步機或者瑜伽，出一身汗非常舒服，你們會選擇什麼呢？ PS: 為甚麼我懷孕鼻子會變大，別人就不會呢？」

不少網民都認為胡杏兒二胎是男胎，更粉粉留言：「聽說懷男孩鼻子才會大」、「如果生仔好似會變大」等，不知道胡杏兒會否真的生個細佬給Brendan呢？

翻查過去的照片，胡杏兒佗第一胎時鼻子確實比以往大，當時網民都一致認為胡杏兒在佗仔，最終誕下男胎Brendan！