胡楓四代同堂 曾孫最聰明

胡楓四代同堂 曾孫最聰明

做藝人,魚與熊掌難以兼得,事業紅透半邊天,但愛情、婚姻未如人意;半紅不黑的,疊埋心水結婚生仔,組織美滿家庭。82歲影視長青樹胡楓(修哥),卻兩者兼得。

修哥取藝名楓樹的「楓」,因楓樹一年四季都是紅色,喻意在娛樂圈「長紅」,廿歲入行的修哥,已經紅足60年。事業起步不久,便迎娶「修嫂」呂詠荷,至今牽手走過57個年頭,膝下有個大家庭:5個仔女、6個孫、1個曾孫,今年8月將迎接第二個曾孫。能夠四代同堂,修哥坦言好幸運,工作之餘,閒時弄孫為樂,但他強調絕不言休,「希望可以同曾孫玩多啲,不過工作係我生活一部分,我好享受,所以唔會退休,哈哈。」

下月迎接次名曾孫
從影60年,修哥由靚仔小生,演到做父親、祖父,現實中他更進一步,上到「太公」級,6個孫兒皆已長大成人,最大30歲,最細16歲,曾孫則1歲8個月。他首次帶同最大的兩名孫女、兩名孫女婿及曾孫公開亮相,拍攝難得的三代照。整個訪問,他最開心就是與小小的曾孫關淦名玩耍,教他說話、玩公仔、砌積木,全程掛着冧爆笑容,「呢個曾孫好得意,我好鍾意,經常同佢玩。平時佢上嚟我度,一見到我就叫『太公』,哈哈。」修哥大讚淦名好聰明,年紀小小已認得所有家庭成員,識叫太公、太婆、公公、婆婆、舅公……好犀利!

八月底將有多一人叫他「太公」, 大孫女呂洛蔚(Christine)正懷孕七個多月,已照到是男嬰,改名會收集家人意見再決定。Christine在自己生日當天公布懷孕消息,修哥得知再喜獲曾孫,笑不攏嘴,她指修哥非常開明,沒有顧慮太多大肚禁忌,「佢唔係迷信同古老石山嘅老人家, 冇咩嘢唔俾我做, 只係叫我唔好踎低, 驚整親BB,有啲傳言話唔准拎剪刀,太誇張,公公唔信呢啲。」

孝順孫每週陪飲茶
大曾孫關淦名是修哥的二孫女呂施蔚(Sabrina )和孫女婿關健浩(Kinho)所出,淦名自小在大家庭長大,培養出外向性格,Sabrina說:「佢唔怕人,個個抱佢都得,唔會喊。」很多仔女及孫兒長大後有自己生活,幾個月,甚至過年才探長輩一次,Sabrina卻好孝順,每星期帶同淦名上修哥家中兩三次,「公公工作比較忙,好少一齊出去玩,多數上去佢屋企一齊食飯、出去飲茶。」

修哥仍活躍螢光幕,所有劇集、節目包括廣告,家人必定捧場,連淦名都是他的小粉絲,「阿仔見到廣告有太公,就會指住講『太公呀,太公呀!』」Sabrina笑稱,羨慕公公有份參與《三個小生去旅行》,「我問做乜唔帶埋我同阿仔去呀?一齊去玩吖嘛,哈哈!」

最愛拍片留回憶
半世紀以來,修哥湊過三代小孩,5個仔女、6個孫、1個曾孫,但當中湊得最少,卻是自己仔女一代,「當時我冇咩時間理佢哋,都係太太同工人照顧,我媽媽都有幫手湊。」當時修哥正值演藝事業黃金期,到孫一代,事業已屆收成期,騰空到更多時間湊孫。

隨着時代進步,修哥努力upgrade自己,學習新科技,與孫兒一代溝通,「到孫一代,我時間鬆動啲,可以經常同佢哋玩和溝通,有啲孫喺外國生活,我識用視像會議同佢哋溝通。」修哥不單止識玩視像、用WhatsApp,更是孩子們的攝影師,從錄影帶年代至數碼相機、智能手機,修哥不斷增值自己,「依家就係用呢啲相機啦(指着攝影師的單反相機),為咗《三個小生去旅行》而買嘅, 喺嗰邊影風景video,操作好簡單咋嘛,唔使學㗎,一開個掣就得㗎喇!」

修哥最喜歡叫孫兒扮香港小姐、玩天才表演和唱歌仔,「希望佢哋從小一路成長,有個好好嘅回憶,大個睇番, 原來自己做過呢啲嘢喎,哈哈。對我嚟講,亦係一種享受,睇番佢哋細個得意情形,嗰種開心,真係多多錢都買唔到㗎。」

曾孫似NICAM
講到教育,修哥驚嘆三代轉變之大,以前自己和子女一代,5、6歲才入幼稚園,但新一代小孩未夠兩歲就上學前班、返playgroup,小孩一代比一代叻,「我哋仔女同孫嗰代,都係靠屋企長輩同學校老師教,到曾孫呢代唔同晒喇,幼稚園都未入就要上學前班,唔單止要佢哋早啲從唱歌跳舞學英文生字,仲要上埋樂理班認音符、學普通話拼音,我哋以前邊有呢啲嘢吖。」修哥笑指曾孫兩歲未夠,已像個迷你NICAM,「佢一時同你Hello,一時又用普通話講你好。同佢行街見到有音符嘅嘢,佢會好肉緊咁依依哦哦哼歌仔,我哋細個邊有咁叻吖。」

現今教育:起跑線上偷步
現今教育界常強調一句「贏在起跑線」,修哥覺得直情是「起跑線上偷步」,「除咗安排小朋友上堂,仲要一早安排埋佢哋嘅社交網絡,有成班家長互相認識嘅小朋友陪住長大,可以令佢哋學到嘢之餘,覺得開心好玩,家長又放心喎。」

問到孫女Christine和Sabrina,只打算生兩個小孩,不會像公公般生夠五個,修哥深明時代變遷,「以前啲人興生埋成竇化骨龍,有乜依郁就打鬧。時代唔同喇,依家多數父母都係生一個起兩個止,而且兩公婆要搵食,教育仔女嘅重擔交咗俾長輩,甚至乎家傭姐姐。如果有能力提供到較好嘅學習環境俾小朋友,當然係帶佢哋返學前

班啦,話晒人哋師資係公開兼專業,要英文有英文,要音樂有音樂,要普通話有普通話,總好過要老人家辛苦,又或者將仔女交俾唔係專業教細路嘅家傭姐姐湊吖。」

孫女婿加入:凝聚力好深
孫仔孫女陸續成家立室,各人的另一半加入「胡楓之家」,都感到那股凝聚力,Sabrina的丈夫Kinho,因為太太的關係,每星期都與修哥見面,「自我加入呢個家庭後,嗰份凝聚力我感受最深,我哋同修哥一星期起碼見兩次,一年見百幾次,喺現今家庭好少有。」Kinho與太太初相識時,她從沒提及自己是修哥孫女,直至見到她們的家庭照,「唔似fans同偶像影相,似係識得喎,問番老婆先知修哥係佢公公!」

14個契子女
修哥不但兒孫滿堂,還有14個契子女,包括張學友、黎明、林憶蓮,排第一是區議員方國珊,而最新一個、即第14個契仔是周啟生,上月周啟生為忽略兒子一案聽取判刑,修哥亦陪伴左右,以示支持。修哥一向不愛多談契子女,但坦言能與他們上契,實屬緣分。

修哥對兩位孫女婿亦關懷備至,大孫女婿周正健(Stephen)稱,經常接到修哥的問候電話,非常關心自己與太太,不厭其煩提點「凍喇,着多件衫」,他們做後輩,也沒有這份細心。Christine和Sabrina也不約而同感謝公公,帶給她們一個溫暖的家,「我哋會將呢份愛延續落去,童年對人生影響好大,童年開心,長大後好多嘢都識開心地過,唔會怨天尤人。好多謝公公留低咁多回憶俾我哋,帶俾我哋家庭溫暖。」

撰文:Ling
攝影:黃大立(部分相片由受訪者提供)
場地:Bizzi Kids(www.bizzikids.com.hk、tel: 2441 1444)

更多精選內容