太子參淮山田七瘦肉湯

【增高湯水】田七太子參淮山瘦肉湯!有益脾胃助增高

專欄

廣告

【田七增高湯水】雖然身高好大程度由遺傳決定,但亦可配合飲食、睡眠和運動靠後天增高,發育時期是小朋友吸收增高的好時機。Blogger小小豬推介的這款太子參淮山田七瘦肉湯有益脾胃促進吸收,小朋友後天增高無難度!!

撰文&圖片:小小豬Kinsey | 編輯:Chloe

太子參淮山田七瘦肉湯

親戚朋友每次見到小小豬都總係會話「仲乜佢咁瘦呀?」「仲乜佢咁細粒呀?」「佢依家係咪讀緊一年班?」,真係俾佢地講到我好似刻薄自己個仔咁仲,雖然我已經成日同自己講「我點湊又關佢地乜事?總之我自己知我照顧得豬仔好好就得,個仔精靈聰明就夠」。但…….老實講聽到有時都會十級嬲呀!

唔知點解隻豬仔食極都好似唔多吸收,所以我都好努力咁周圍搵下有冇啲食譜可以幫到手。就係一次同去相熟藥材店入貨時,同店主叔叔傾開,佢就教我煲依個太子參淮山田七瘦肉湯,可以滋補强壯同時又有助增高,而且對脾胃功能弱,身材偏矮及偏瘦小朋友很有幫助。

一聽到咁就緊係即刻執返份材料試下煲俾小小豬飲啦~

田七除可以止血外,尚有通脈行瘀及造血之作用,能促進小朋友發育長高 、提高學習和記憶能力的作用;太子參又名孩兒參,它不是參科植物,屬石竹科植物,有人參功效但力稍弱,很適合小朋友用;而配太子參、淮山、紅棗及雞胸肉同用,能健脾補氣血,對小朋友發育長高有一定幫助;淮山健脾開胃,其他好處為治療久泄久痢、肺氣虛燥、及消渴尿頻等症;紅棗均補心脾、益氣安神。(網上資料)

材料:

太子參 15g

田七 15g

淮山 37g

紅棗 6粒及瘦肉約$30(由於係第一次煲田七,唔知係咩味,所以只係煲約四碗湯份量)~

做法:
1.紅棗洗乾淨後去核~

2.其他藥材浸洗一陣~

3.瘦肉洗淨汆水~

4.煲內放2.5L水,然後隨水加入所有材料~

5.待水滾後繼續用大火加蓋煲約10分鐘~

6.之後轉慢火加蓋煲多2小時~

7.最後加鹽調味,就可以飲得啦~

湯嘅味道對於我同老公嚟講都唔大問題,都係普通藥材湯味咁啦。不過對小小豬嚟講就一定唔係好啱飲,因為田七同太子參煲起都會有淡淡嘅似人參嘅甘味道,小小豬就一向唔多鐘意依個味,所以我都要半氹半威迫利誘之下先飲左兩碗(到第二碗時佢習慣左個味就飲得快好多啦)。
可能小小豬都想快高長大,當佢知道個湯嘅功效之後,就叫我再煲多啲俾佢飲,仲攪笑話唔會再怕嗰一陣甘味添。
哈哈…其實佢唔講我都會再煲多幾次,飲多啲就可以快啲增高增磅嘛!
溫馨提示:
–孕婦及感冒患者不宜飲用!
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!