森美與老婆恩愛24年 首晒合照:揾到個靚女合照

森美與老婆恩愛24年 首晒合照:揾到個靚女合照

森美一直係娛樂圈出名嘅好爸爸、好老公,早前森美同老婆去旅行,好罕有地晒出二人合照,森美仲搞笑留言話:揾到個靚女合照!

宅男女:KM |圖片:森美FB、ig

森美首晒與老婆合照

森美與太太Veronica(陳雅嫻)相愛24年,育有一對仔女,雖然森美經常分享育兒之道,不過絕少提及老婆。日前森美同老婆去日本旅行,首次晒出二人合照!相片中嘅Veronica非常年輕,完全唔似2孩之母,保養得宜!

森美帶太太扮助手出國

森美早前接受訪問時被問到,生活被工作和兒女佔去大部分,仲有冇時間同太太拍拖?:「係少咗嘅,不過可以自己爭取。我最近開始帶團去四國玩,人哋畀我帶一個助手,我就當太太係助手,帶埋佢一齊玩囉!不過呢個助手好唔合格,第一個trip唔記得帶passport,第二個trip就狂買嘢,搞到我推住篋仲要手拎七袋手信同零食!」

森美同太太恩愛23年:我老婆比發嫂要次一級!

問佢哋仲記唔記得第一面見太太嘅情景?第一下過電又係點解?森美憶述:「我一入行就識太太,成23年前,不過仲記得好清楚。第一次見面係商台大堂,佢喺度派緊果汁橡皮糖,周圍問人食唔食,嗰次我係冇食到嘅⋯⋯真係有感覺就係幾個月後我哋呢班DJ訓練班準備上台比賽,我係佢前一個出場,臨出去,佢叫我幫佢綁鬆咗嘅蝴蝶結。條裙係條碎花長裙,個蝴蝶喺佢背後,就係嗰一下,綁出事。」

森美同太太恩愛23年:我老婆比發嫂要次一級!

讚發嫂投資有道

森美笑言:「有啲男人對太太好著迷、時時刻刻都覺得太太好好,但我又唔係喎。我係成個大叔咁款,日日見親佢就吟吟沉沉,吟佢呢樣吟佢嗰樣。但出去開工十幾廿個鐘,又會好掛住佢,不過打去就係粗聲粗氣咁問:『做緊咩吖?』見唔到太太時,我成日都有一個畫面,就係一間花店、佢好仙氣咁坐喺度,幫人包吓花、同客人傾吓偈⋯⋯唔知點解係花店,佢都冇話過想開花店。不過我太太都有個好處,就係知慳識儉,從來要求都唔高、平時又會同我坐廉航出去玩吓。我成日話發嫂嗰啲慳家得嚟又投資有道,我老婆呢啲就淨係知慳識儉守住我啲財,比起發嫂,次咗一級。」

森美同太太恩愛23年:我老婆比發嫂要次一級!

資優

更多精選內容