世界冠軍畢華流 大富翁必勝攻略

世界冠軍畢華流 大富翁必勝攻略

全球最受歡迎策略圖版遊戲(board game)「大富翁」(Monopoly)誕生80周年,陪伴着幾代人成長,全球超過10億玩家。大富翁的成功,在於棋例簡單卻變化多端,大人細路只要動動腦筋,善用金錢和交易,都有機會獲勝。

「大富翁世界大賽」9月舉行在即,亦適逢80周年,再度掀起大富翁熱潮,1996世界冠軍、著名作家畢華流(本名吳漢源)讚大富翁老少咸宜,自己都愛用大富翁教仔,現年12歲的兒子、就讀名校皇仁書院中一的Napoleon,自小跟爸爸切磋,從中學識計數、談判等策略,更愛上玩其他版圖遊戲練腦筋,對讀書都有幫助!

畢華流太太(右)間中有一齊玩大富翁,但經常忘記棋例,索性為兒子打氣,打敗高手爸爸。
畢華流太太(右)間中有一齊玩大富翁,但經常忘記棋例,索性為兒子打氣,打敗高手爸爸。

逐點破解謬誤
大富翁你我都玩過,但好多人玩之前都沒睇清楚說明書,一直都玩錯,畢華流強調,正統官方玩法從頭到尾只有一個,「以美國、英國版嘅英文official棋例為準。今時今日出咗好多特別版,加咗啲特別棋例,嗰啲叫variant (另例),都係官方玩法,但唔係正統。當然你買咗番屋企,自己鍾意點玩都得,呢啲叫做household(家用)玩法。」

至於好多人誤解的棋例被稱為misconception,「總括嚟講有四個觀念:official、variant、household、misconception。」相信最多人玩的應是misconception,他指出最常玩錯的例子有第一圈不買地,「即鬥快轉完一圈第二圈先開始買,其實棋例從來冇講過。」

畢華流現實中有做小投資,但他不追求發達,只想做個逍遙人,「賺100萬都唔夠玩一局開心。」
畢華流現實中有做小投資,但他不追求發達,只想做個逍遙人,「賺100萬都唔夠玩一局開心。」

他指坊間最大誤解是起屋策略,「錯誤起屋係破壞遊戲精義,遊戲名叫Monopoly,意思解專利,根本唔係直譯大富翁,當然大富翁呢個名都譯得好好,譯到個目的出嚟,最終勝利就係要做大富翁,令對手破產。遊戲共有8套顏色組,即有8個monopoly,玩家要集齊同一顏色組嘅地先可以起屋,例如集齊三塊橙色地,好多人以為要踩番自己塊地先可以起屋,同埋要逐間起,其實只要輪到你,你有錢又集齊同一顏色地,就可以一次過起多間屋,甚至起酒店!」正因好多人玩錯,所以一局玩極都玩唔完,其實只要一奪得某個顏色組的專利而起屋,就會打破僵局進入大直路,好快分出勝負!

大富翁80周年香港版
大富翁80周年香港版

玩法三大謬誤
1.第一圈禁買地
別浪費時間,一開始就買地吧!

2.踩自己地才可起樓
-必須先集齊某顏色的地;
-起樓可在自己擲骰前進行,不論身在何方,甚至在獄中,也可以起屋;
-每次起屋數目不限,但必須平均分配,如三塊地上建屋的數目可以分別是333或233或443,但不可以是234或244。

3.停Free Parking可獲累積獎金
它純粹是一個讓大家喘氣的地方,總之踏中該格沒事發生。那些將稅收全放在Free Parking然後先到先中獎等皆是全無根據。

阿仔學爸爸深藏不露
畢華流自小學接觸大富翁,鑽研遊戲數十載,起初一如其他人玩錯,直到上中學有足夠英語能力睇英文版棋例,才恍然大悟正確玩法,真正領略到遊戲的精粹,一有比賽就去參加,與各區高手較量。「我喺香港地區賽贏咗兩次亞軍、一次冠軍,我寫咗本《蒙地卡羅戰記》講番我點贏地區賽,我一熟咗棋例就可以一贏再贏,仲要鑽研賽制,有次比賽限時45分鐘激死我,俾多10分鐘我都贏,最後得亞軍,唔同賽制要配合唔同玩法。」

12歲的兒子Napoleon都是小小大富翁,小學開始跟爸爸學玩,熟讀爸爸所著的攻略,「一個人嘅長處都想傳俾下一代,所以阿爸就教我玩大富翁,佢嘅技術真係好高超,你唔知佢到底想點,應變能力好高,例如佢一心想拎橙色組,但當時形勢拎橙色比較冒險,就改拎黃色組。」要集齊某個顏色組, 單靠擲骰機會低,Napoleon明言必須懂得與對手交易,「遊戲精義係要做交易, 好多時某隻色自己得一張,其他喺對手度,你要諗點說服人哋做交易。」

大富翁遊戲「契重錢輕」,即首重地契,金錢其次,但畢華流有時做反交易,「你想要契我俾你, 但我要收好高價, 將你啲錢吸晒過嚟,等你冇錢發展。」畢華流一次與兒子和他的朋友玩,就採用這個策略致勝!不過勝敗乃兵家常事,Napoleon都贏過「長勝將軍」爸爸,他沾沾自喜說︰「有次同阿爸、親戚玩,我學識阿爸嗰招隱藏實力,我係最後行,好多地俾人買咗,但少買地契嘅人就多錢,我隱藏咗一張500蚊,阿爸以為我得番好細疊錢,換咗套橙色組俾我,估唔到我原來仲有好多錢發展,反敗為勝!」

畢華流笑稱自己雖然外表肥佬,但腦袋是大隻佬。
畢華流笑稱自己雖然外表肥佬,但腦袋是大隻佬。

致勝策略
1.熟讀棋例賽制
首先要熟讀棋例,怎樣集齊顏色組去起屋,如果要參加比賽,更須熟悉賽制,例如現在地區賽用快速骰子,如果不熟悉的話,就不能取得好成績。

2.認清對手交易
遊戲「契重錢輕」,與對手做交易時,需以地契與地契交換,切勿以契換錢,因為契是無價寶。交易重點要衡量是否值得成交,應補幾多錢換張心水地契,甚至按形勢轉求另一組顏色契。當中更要認清對手,誰願意交易,誰會講大話,你要清楚。

3.玩得有性格
外國有資深玩家形容大富翁是personality game,如果你為人被動,輕易被人游說就好易出局;但亦不宜太強勢,過於獨裁。

4.三間屋策略
三間屋的租金比只起一兩間多幾倍,例如一間屋收10元,兩間屋收20元,三間屋則通常收60或80元,以貴地石澳為例,三間屋已收到1,400元,好過好多酒店呢!

Napoleon 努力學習琴棋書畫,做個文化人,談到琴棋書畫,畢華流即中文老師上身,「琴棋書畫唔代表琴第一、棋第二,只係跟四聲排列,四樣都係文化結晶,係平等嘅。」
Napoleon 努力學習琴棋書畫,做個文化人,談到琴棋書畫,畢華流即中文老師上身,「琴棋書畫唔代表琴第一、棋第二,只係跟四聲排列,四樣都係文化結晶,係平等嘅。」

皇仁仔自學成材
圖版遊戲益智好玩,能訓練腦筋、手眼協調、談判技巧及社交能力,Napoleon除了玩大富翁之外,還有接觸講故事遊戲「Once Upon A Time」和格鬥型的「En Garde」等圖版遊戲,他笑言從不打機,board game更好玩!他特別帶來「Once Upon A Time」作推介,玩法較文靜,將抽到的卡片串連講故事,能訓練說話技巧。

就讀皇仁書院中一的Napoleon,覺得捉棋玩board game對數學科有幫助,「訓練到找贖能力,同埋識計算機會率、百分比等等。」皇仁是首屈一指名校,歷年狀元輩出,因爸爸是皇仁校友,他受惠順利入讀,他覺得學校着重訓練自學精神,發掘更多課本外的知識。「學校功課唔多,但考試題比較深,有啲題目係課本冇,例如科學題,淨係俾幅圖你,問圖中係乜嘢?請舉明。幅圖係一個好大嘅鐵窩輪,但我真係唔知係咩!學校其實係想鼓勵我哋多睇課本以外嘅嘢。」入得皇仁個個皆精英,就是靠出課外題去分高下,「個個都背晒書拎100分點得,梗係要出啲深嘅題目啦。」

mo7
Napoleon 推介的講故事遊戲「Once Upon A Time 」(右)和格鬥型的「En Garde 」(左)。

沒計劃出新書
中文科就不同,比較着重背誦,並會出課外文章考理解能力,他解釋︰「佢會俾一篇古文考問題,你未睇過嘅,淨係俾少少註釋,你自己理解。古文要叻真係要睇多啲古書,試卷後面部分就靠平時睇學校指定課本,例如《論語》等等。」任職中學中文科老師的畢華流覺得兒子自學能力不俗,玩棋以外就是看Discovery Channel和看課外書,Napoleon笑言自己都是爸爸的忠實讀者,「有睇《蒙地卡羅戰記》,係阿爸嘅大富翁秘笈。」還有爸爸所著的漫畫及內容好玩的書籍,長篇作品日後再慢慢再細看。

畢華流近年在文化界減產,未有計劃出新書,「已經過咗我最想寫嘢嘅年代,依家久唔久都會寫啲教材,都係自己教書用,規模好細。」畢華流的書迷聽後會感可惜,或者不久將來會受兒子影響,再復出寫書,甚至由兒子接班也說不定,書迷耐心等待。

撰文:Ling
攝影:Clay Lam(部分相片由受訪者提供)
化妝及髮型:[email protected] MAKE UP
場地:青衣城

更多精選內容