50歲彭羚圓夢做教練林海峰放水百萬支持老婆

Jul 25 2019

九十年代樂壇天后彭羚，在98年事業巔峰期下嫁才子名DJ林海峰，不久即封咪退隱，多年來低調絕跡幕前，全心做林太相夫教女，只在12年激罕出山為黃偉文作品展擔任嘉賓，再開聲大受歡迎，被大小娛樂公司高價搶邀出山開騷，但最終因為老公落閘復出無望。不過，轉眼兩個女林泳及林清，今年已經19歲和15歲，女兒唔再黐身， Cass（彭羚）終獲老公林海峰放生發展事業第二春，不過並唔係復出再上舞台，而係開Studio做健身教練。近年迷上新興的Gyrotonic運動（又稱禪柔運動或脊椎螺旋運動）的她，原來一直有做教練心願，據悉阿Jan（林海峰）已放水百萬Cass搞健身中心圓夢，支持索老婆將健美秘笈傳授他人，唔使齋留喺屋企做「家嫂」咁沉悶！

原文：東方新地|圖片：新傳媒圖片、IG|編輯：Sunday Kiss

林海峰放生兼放水彭羚終圓夢

曾經橫掃大小樂壇頒獎禮,跟鄭秀文鬥得難分難解的樂壇天后彭羚,95年更同時奪無綫《最受歡迎女歌星》、《叱咤樂壇女歌手金獎》、《新城勁爆女歌手》及港台《優秀女歌手》四個大獎,事業攀上高峰,不過, Cass選擇在98年事業巔峰期嫁林海峰,更在02年約滿唱片公司後封咪退隱,全心全意照顧家庭。

勤做運動的彭羚，外貌身形都 keep得甚 fit，完全睇唔出已經50歲，拍埋19歲大女林泳身邊，更似足姊妹花。

被娛樂公司大灑金錢力邀復出，彭羚始終不為所動，寧願將全副精神照顧家庭，日前就見她一個人乘坐七人車去金鐘太古廣場買戲飛，之後再坐車去跑馬地一間銀行處理財務，勞心勞力打理頭家！

反對老婆出山

成功將彭羚私有化,結婚時已開腔話「高位入市」的林海峰,長揸潛力股老婆,即使再多利誘,多年來都封盤堅拒老婆出山再唱。12年Cass 激罕為黃偉文作品展復出,雖然只擔任兩場嘉賓,但風頭一時無兩,大小娛樂公司爭相重金搶Cass出山開演唱會,不過,最終因為過唔到老公一關而作罷。據知情者透露:「Cass一路都有歌癮,但阿Jan好大男人,唔想老婆再拋頭露面,嗰次做完Wynan(黃偉文)個騷,出嚟反應超級熱烈,好多人搵Cass出山開演唱會,佢都有𦧲咗老公一排,話想當玩票性質咁玩吓,不過,阿Jan好快已經落閘唔畀,話啲女仲細,如果復出要兼顧嘅嘢唔少,點都會分心,想Cass專心睇實頭家,賺錢啲嘢交畀老公做就得,Cass好尊重老公,知道阿Jan唔鍾意,佢完全唔會再諗!」

會合女兒

之後彭羚再趕去中環會合大女林泳，在街頭等女兒的 Cass，不停發短訊，之後母女一齊行街。

開Studio教人健身

甘為林海峰做小女人,放棄復出專心做好林太角色的彭羚,一直深得老公愛錫,除掌管家中財政大權,早年阿Jan 的全部名車,都以Cass 名字和生日做車牌,而全副精神放在家庭上的Cass,就經常被拍到湊女返學,陪女放狗及一家人溫馨出埠,夫妻結婚廿一年都咁恩愛。不過,轉眼兩個女都開始大,19歲大女林泳更會在暑期後到外國升學,15歲細女林清亦有自己的同學圈子,既然女兒不再困身,Cass亦想趁50歲圓夢,原來Cass一直有開Studio教人健身心願。

兩母女去咗ifc睇衫，愈嚟愈年輕的Cass同阿女一樣主攻運動衫，母女有商有量。

據知情者透露:「一路以嚟Cass都好鍾意做運動,近期更加迷上咗一種新興運動Gyrotonic,因為可以透過伸展運動,修緊同修靚全身肌肉線條,又可以強化肌肉同脊骨,對身體好多益處，Cass一玩就好鍾意，做咗一排仲覺得成個人都健美輕鬆晒，佢好用心鑽研運動技巧，話希望將來可以教人，阿Jan為咗氹老婆，仲訂埋器械喺屋企整咗間健身房，等Cass可以每日喺屋企做運動！」

全心照顧家庭做賢妻良母,早前彭羚就同老公一齊陪細女林清去買鞋,兩母女揀鞋時非常合拍,Cass細心在旁畀意見,又逗得女兒笑唔停。

大展柔軟身段

除咗打造家裡私人健身室，阿Jan深知老婆心意，已答應放生畀老婆發展事業第二春，月前Cass開通IG帳戶同粉絲分享健美之道，不時親自示範這種新興運動，大展柔軟身段，引來不少回響。據知情人士說：「咁多年嚟Cass打理頭家頭頭是道，照顧老公同兩個女又細心，阿Jan當然知道老婆為自己犧牲好多，依家兩個女開始大，老婆又搵到自己新嘅興趣，佢知Cass好想喺教人健身方面發展，講明會無上限出錢支持，呢排Cass都頻頻撲撲開始籌備。」

見到靚款即攞畀女兒試穿,睇 Cass手上拿著不同鞋款給女兒看,就知呢位賢母超級廿四孝!

處理家裡大小事

瓣數多多的林海峰，近日忙於籌備九月《是但噏》棟篤笑，彭羚就繼續做「稱職林太」，日前便一個人出動為家人處理大小事務，完全不用阿Jan操心，除咗去金鐘太古廣場買戲飛，之後再去跑馬地一間銀行處理財務，搞咗個幾鐘，便乘七人車到中環會合大女林泳，唔知係咪啱啱游完水，林泳頭髮仲有啲濕，已經19歲的她身形纖瘦高䠷，更曬得一身健康古銅膚色，同媽咪黑白配孖咇行街更似足姊妹花。而另一日， Cass則同老公林海峰陪細女林清出動買鞋，對照顧女兒及打理頭家事事上心，相信就算出關再工作，照顧老公和兩個女始終先係Cass 終身事業，娶得如此好老婆，阿Jan當然可以十萬個放心！