【暑假活動2019】Sunday Kiss X 海洋公園夏水戰親子遊樂團 等我哋都來探下海賊王先

小朋友必去！小海賊玩水及泡泡派對

夏水戰有咩好玩？今次總共有7個海賊王景點同濕身專區，實有一個啱你玩。
而我哋最鍾意嘅當然係威威天地嘅海賊王玩水專區，有小海賊水花大亂鬥，仲有小海賊泡泡派對，係可以俾小朋友大玩特玩嘅時間呀！

孖寶都表示最喜歡呢度嘅水戰和泡泡派對，因為小朋友可以有機會同其他小戰士一齊展開連場水槍大戰。呢個童樂區設有噴泉迷陣等玩水設施，到處你都可以睇到Cute版「海賊王」角色佈置，度度都係影相位。

除咗小朋友專區之外，家長同大朋友可以挑戰更加刺激嘅「水戰激鬥」，化身成「海賊王」一員去參與一場最經典戰役「頂峰戰爭」。穿過神秘瀑布同水簾隧道，再攞起水槍同各海賊王一齊並肩作戰，四方八面嘅水炮機關瘋狂濕身突襲，真係由頭濕到落腳呀！玩完一場激烈嘅水戰，仲可以匯合路飛、烏索普、索帕等夥伴來個大合照。

大家記得要搵下四周圍嘅經典場景影相位同打卡位，好似「海賊通緝令」、「巨型路飛草帽」、「烈陽號船頭」等。

今個暑假咁多個海賊王經典場景，陪你走過一個熱到溶又涼透心的顛峰水戰，齊齊過一個動感盛夏！

大家仲有機會同一眾海賊王角色見面同影相。把握機會同各角色喺海濱樂園廣場盡情合照啦！

大家留意番見面會每日時間都唔同！

海濱樂園廣場舞林高手表演

記住唔好miss咗一眾舞林高手嘅表演呀，佢地會定時現身海濱樂園廣場，即烈陽號旁邊展開仲夏水花狂舞派對，係強勁嘅音樂中，都唔好忘記要打醒12分精神，小心隨時比人用水槍突襲，睇show 都隨時濕哂身呀。

另外海賊王粉絲都唔好錯過「索柏造型爆谷套裝」呀！兩個見到都好興奮！

好啦，見你兩兄弟下星期就快到4歲生日，今次就送比你地開心下，要好好珍惜索柏呀！

享受海賊王主題美食

今次我哋真係玩到太肚餓啦，一玩完水就去咗嵐灣茶座食「海賊王航海歷險仲夏大餐」，嵐灣茶座位置好易搵，一出上山方向嘅cable car，左手邊就係餐廳啦。

呢set海賊王主題食物，真係睇得出落咗好多心思，頭盤「Soul King布魯克」整得好精緻，當然味道仲好ok啦，酥香炸蝦餅係大人嘅至愛，而跳躍音符形狀嘅蔬菜當然係小朋友嘅焦點所在。

仲有鮮味十足嘅海鮮周打湯。

主菜可以二揀一，有燴海鮮蕃茄意大利飯嘅「芬奇轟拳」，仲有炸薯蓉加上肉嫩多汁嘅紅酒燴牛面珠嘅「我要成為海盜王！」俾你揀。

呢個紅酒燴牛面珠仔真係堅好食，肉嫩多汁，食到大家都停唔到口。

一餐完美嘅大餐梗係要以甜品作結啦，呢個「緝拿路飛」甜品好可愛呀，塊牛油曲奇印有路飛通緝令㗎，再配埋竹炭朱古力慕絲蛋糕，好match㗎！

其實海洋公園啲嘢食都好唔錯㗎！我知道除咗我地今次食呢間嵐灣茶座之外，公園唔同嘅餐廳同小食亭，好似熊貓薈及冰極餐廳等，都有期間限定海賊王便當及單點小食㗎！

溫馨提示：帶定衫褲去換

最後提提大家參加呢個水花四濺嘅夏日慶典，真係要帶定泳衣、毛巾、拖鞋、防水袋裝哂d野入去以保「乾」全，當然仲記得要帶埋防水電話袋，同埋要幫小朋友帶多兩套衫同襪替換呀！
萬一真係唔記得帶都唔緊要，我見到有Pop-up store都有賣海賊王限定精品，海賊王T 恤、防水手機套同防水袋。呢個水戰激鬥濕身指數爆燈呀！呢啲裝備真係必備呀！

仲有好多One Piece角色精品推出，大大隻公仔，以至掌心咁大嘅角色tsum tsum版公仔都有，真係啱哂海賊王fans呀。

今個暑假大家都去盡興一番，同小朋友一齊過開心暑假啦！
海洋公園夏水戰

日期：7月13日 至 9月1日
地點: 香港海洋公園香港仔黃竹坑道一百八十號

我和孖寶的Facebook Page:荔枝與孖寶
我和孖寶的 Instagram IG#:laichimama