歡樂天地九展試業 80後童年回憶返哂嚟

歡樂天地九展試業 80後童年回憶返哂嚟

歡樂天地返嚟啦!對於很多8、90後而言,歡樂天地是其中一項不能磨滅的童年回憶,講起跑馬機更會會心微笑。可惜抵不住激烈競爭和長年虧損,這個充滿無數歡樂的地方於90年代尾終告結業。事隔廿年,經過重重難關,歡樂天地終於在九龍灣試業,重新與大家見面!除了多款經典遊戲,如射大板牙和跑馬機,還有新的遊戲機,大人細路都啱玩!想回憶當年的各位不能錯過了。

撰文:大仁生活|編輯:Vicky

自從數月前帶SY去九龍灣歡樂天地夾公仔後,他已經不停問我:「歡樂天地幾時開呀? 幾時有得去玩呀?」

上官方facebook專頁更有半年沒有更新,本來說的是2018年底會重開,但遲遲「冇聲氣」,終於有傳媒上月出了試玩了⋯⋯我們當然急不及待去回味一下兒時玩意啦,誰知某一個星期一下午去到⋯⋯大家都失望嘆氣大叫:「點解冇開嘅?」

後來,店來店員隔著玻璃門跟我說:「我哋只係開星期五、六、日試業,平時唔開㗎」;有得玩,我們又怎會死心呢,一於4日後的星期五再戰童年回憶!

SY及子子都非常興奮,但仍不及同行的魚子媽,她在門外說:「我以為一個星期七日,有三日就去荔園玩,有三日就係歡樂天地⋯⋯我最鍾意玩⋯⋯」(唔好意思⋯⋯不如,我哋入去兌錢玩囉,之後你再慢慢講啦)

一走到歡樂天地,子子媽便說:「玩呢個(保齡入洞 Jungle Balls),我以前玩一個幣一次,依家三個幣一次,又唔係通脹咗好多咋喎」

從前我記得拋出去要輕輕力「Chok一Chok」,那才會可以掉入較高的洞取得高分,不過,可能太久沒有玩⋯⋯已不能回復當年勇了。

保齡入洞 Jungle Balls 要3個代幣。

SY:「次次唔係零分就係10分,不如玩第二樣囉」

我:「玩跑馬仔啦,我想玩呀! 」 但原來現在要最少三人才可以開局⋯⋯SY:「我哋咪三個人囉」

原來測試中的遊戲要等待工作人員才開機,而且工作人員還會當上評述員一直形容賽事。(當然,業餘的絶對不能與鍾志光比較⋯⋯我唔睇馬,我知KAI叔唔講馬)

最後由好勝SY勝出,子子媽:「真係唔抵, 輸咗畀個十歲𡃁仔⋯⋯咦⋯⋯原來跑馬仔贏咗有獎喎!」

SY:「毛毛心心筆袋 (送畀姨姨啦)」子子媽:「唔洗敬老啦,你要啦」(講真又真係太少女系嘅)

跑馬仔:8個代幣。職員會在一旁擔任評論員。

射大板牙有新有舊,子子媽:「我要玩最經典個樣嗰款!」;子子眼界非常了得,限定的6發炮彈,全部將大板牙打倒! Yeah!

射大板牙:4代幣。

推保齡球。小朋友們很大力的推,結果都失敗,我也想玩,SY:「爸爸,你玩一次好啦,要6個幣咁貴⋯⋯」;要用輕輕陰力,估計真的要用一球試力,第二球才可發揮水準⋯⋯我今日只有一次機會,結果當然⋯⋯太大力了。

歡樂天地
推保齡球:6個代幣。

小朋友大力士,SY:「4個銀咁貴,不如唔好玩啦」;子子:「我想食珍寶珠喎」,說時遲那時快,子子已經打中了珍寶珠的一格!

SY:「我又要打(你頭先又話貴嘅?)貴都要打呀!」當SY入了代幣,還在等待猶豫中,此時機械不停發出「叮叮叮叮」聲,SY問:「可以打得未呢?」當機械聲停止了,他大力打出去⋯⋯機械全無反應⋯⋯哦!原來要在限時內打出鎚仔的⋯⋯阿仔你打得太遲,玩下一個遊戲吧!

珍寶珠:4個代幣。

圓筒執波波!130CM以下小朋友走入大圓筒內,以一分鐘時限,鬥快執由天上面掉下來的波波。

最高紀錄是162,子子執了75個波波,出來的時候大叫:「點解又話係天上面掉落嚟,全部都係我係地下執嘅,攰死我啦!」

圓筒執波波:4個代幣。

用腳踩敵人!剛才的SY因為高於130CM, 所以不能走進去, 但這些用腳玩的只限重量, 他出名瘦削, 我估計他廿歲前都不會過限制的重量啦!

在限時內,用腳踩死所有敵人,中途踩禮物更有獎賞⋯⋯完成第一關1300分就可以去第二關,但有人只去到1290分⋯⋯我:「哎呀!你差10分就可以過關啦!」;SY:「爸爸!但係我好攰啦!」

用腳踩敵人:5個代幣。

歡樂天地門外的夾公仔,早於大半年前已經可以玩,我們半年前也玩過一次,不過是食白果收場。

估不到場內有更豐富的玉桂狗散紙包,Tomica車夾,而且只是3個代幣,SY簡直歡喜若狂!

SY:「我夾呢個車仔⋯⋯」第一次他把由橫放的車仔,夾到變直豎狀態,之後第二次一夾便把車仔揮了出來!YEAH!好嘢!SY:「6個幣咋⋯⋯2次我就夾到呢個車仔啦!我好開心呀」

夾公仔機:3個代幣。

SpaceBasketball 即是迷你的射籃球,上下兩個活動的籃球架,有機會可以上層取分後,再在下層同時取分旳。

兩個小朋友說,我哋不如合作,一齊打破138分啦!他們很似摩打手的不停撳撳撳撳撳,子子更加連腳也配合節奏加強速度似的。結果最後2秒,他們真的破了紀錄,取後140成積。

SpaceBasketball:3個代幣。

子子:「我哋成為咗最佳成績啦!」; SY:「歡迎大家嚟玩攞更高分數,做最佳成績!」

我們兩家各兌換了$100,由16:45 一直玩至18:00,很化算,很不錯,但遊戲機大部份估計都是國產機,(講國語的),子子媽:「我覺得欠了當年的回憶,而且多咗一陣味道⋯⋯(SY:老人徐?)土味呀!」

話雖如此,但聽說昨天子子媽一家三口又再戰歡樂天地,並成功推中保齡球贏到索柏公仔!真羨慕,我都要去再挑戰先得!

PS: 試玩不設遊戲券,但觀察換領禮物,也不算便宜,好像三色原子筆要440票,普通原子筆350票,不過,有分會員與非會員的分別,看來要真正開幕後才可能清楚一切,到時會不會兌換票數量會加價呢?

歡樂天地

地點 : 九龍國際展貿中心B1層118-132號舖

開放時間 : 11am – 8pm(試業期間只開放星期五、六、日)

大仁生活facebook

更多精選內容