4款蟲草花湯水 潤肺補腎護肝 抗氧化 防衰老

4款蟲草花湯水 潤肺補腎護肝 抗氧化 防衰老

蟲草花是近代才出現的食材,古典從未記載,其性質滋補而不溫燥,大部分人士都適合食用。蟲草花本身味道充足,用以入饌可減少使用調味料,變相減少鈉的吸收,對血壓有益。而且這種食材有健脾益肺、補益肝腎之用,脾胃血氣較弱的人可適量食用。跟住blogger小小豬媽咪煲以下4款蟲草花湯水啦,步驟夠哂簡單!

撰文:小小豬Kinsey|編輯:Vicky

蟲草花功效

蟲草花

其實蟲草花嘅功效則和蟲草差不多(當然佢地兩者價錢差好遠啦),兩者都有滋肺補腎護肝、抗氧化、防衰老、抗菌抗炎、鎮靜、降血壓、提高機體免疫能力等作用。而且蟲草花不寒不燥,具有補肺、補腎和護肝養肝的功效。

1.蟲草花雪耳粟米紅蘿蔔素湯

蟲草花

蟲草花就有滋肺補腎護肝、抗氧化、防衰老、抗菌抗炎、鎮靜、降血壓、提高機體免疫能力等作用。而且蟲草花不寒不燥,具有補肺、補腎和護肝養肝的功效;粟米就可以益氣補脾;紅蘿蔔就有助健脾消食,同埋化痰解毒;雪耳有助潤肺、潤膚同養顏嘅功效;乾百合能夠解毒、安神、治療咳嗽失眠,對女性來說還能夠很好的抗衰老;腰果能夠健脾補腎及止久渴;椰棗有豐富鎂鐵,食物纖維同埋胡蘿蔔素。另外佢嘅糖分係單純糖,所以就更加容易消化吸收,可以減輕腸胃負擔。(網上資料)

材料:

蟲草花 1両
栗米 2條
紅蘿蔔 2條
漳洲雪耳 1両
乾百合 1両
腰果約 1飯碗
椰棗 4粒
蟲草花
做法:
1. 蟲草花浸軟身之後,然後要擠乾水份
2. 雪耳浸透,然後剪去硬蒂再剪細舊。我自己就比較鐘意用漳洲雪耳,因為佢就好爽身,而且煲幾耐都唔會淋身,咁個湯都唔會變成漿糊咁啦
蟲草花

3. 椰棗、乾百合及腰果浸洗一陣
4. 紅蘿蔔洗淨去皮切件
5. 粟米洗淨切段
6. 煲內放約3L水,待滾後加入所有材料(雪耳除外)
蟲草花
7. 繼續用大火加蓋煲約15分鐘
8. 然後加入雪耳
蟲草花

9. 再轉慢火加蓋煲多1.5小時
10. 最後加少少鹽調味就飲得啦~
蟲草花
雖然雪耳係好味又有益,不過都要再提多大家煲過嘅雪耳一定要即日食/飲晒,如果隔夜,經過一夜嘅浸透,佢就會放出一啲有害物,到時就有益變有害啦!

2.蟲草花螺頭烏雞湯

蟲草花

烏雞含有大量蛋白質,而膽固醇含量極低,是高蛋白、低脂肪的滋補佳品。而且烏雞所含有嘅DHA和EPA物質還可以提高兒童智力,經常食用可以有效調節生理機能,提高人體免疫力。
材料:
蟲草花 1兩
螺頭 2兩
淮山及杞子 各1兩
烏雞 半隻
瘦肉 約$20
做法:
1.點解用烏雞又要加瘦肉?因為烏雞本身都帶點燥,所以加點瘦肉可以中和返,另外加左瘦肉啖湯係會甜好多呀。由於我都幾怕煲雞湯嗰一陣油,所以我會將雞都除去個皮及剪去一啲肥膏。
2.乾螺頭就先用清水浸泡過夜,等佢浸至軟身

3.烏雞及瘦肉洗淨汆水備用
4.所有藥材用清水浸泡幾10分鐘
5.煲內放約4L水,待水滾後就可以加入所有材料
6.待再次滾起後,繼續用大火加蓋煲約30分鐘
7.再轉慢火加蓋煲多1個半小時
8.最後加少少鹽就飲得啦(真係少少就得,因為啖湯係勁足料呀)

3.蟲草花淮杞芡實水鴨湯

蟲草花

依個 蟲草花淮杞芡實水鴨湯 都好有益處,有調補氣血及滋補五臟功效,對體弱多病,痰多咳嗽小兒都好有益處,而且各樣食材性質都好溫和,所以好啱一家大細飲用呀! (網上資料)

水鴨有助補中益氣、消食和胃,利水消腫及解毒之功,對病後虛弱、食欲不振有很好嘅食療功效。另外,由於水鴨嘅肉味鮮甜且含脂肪少,所以啖湯煲好後都唔會好油膩呀。

材料:

蟲草花 半兩

淮山 1兩

杞子 1湯匙

芡實 1兩

薑 2片

瑤柱 3粒

急凍水鴨 1隻

做法:

1. 水鴨解凍後先切開兩邊,然後清洗好內裡(正常急凍產品都內裡仲仍有少量內藏血塊,不過唔洗緊張,因為都好易清洗呀)

2.洗乾淨後就切開四件,然後汆水備用

3.瑤柱浸軟;薑片拍鬆;其他食材浸洗一陣

4.煲內放約3L水,然後隨水加入薑片

5.待水煲滾,然後放入所有材料

6.再煲滾後用大火加蓋煲約15分鐘

7.之後轉慢火加蓋煲多1.5小時

8.最後加少少鹽就飲得啦

4.蟲草花螺頭節瓜瘦肉湯

蟲草花

蟲草花就有滋肺補腎護肝、抗氧化、防衰老、抗菌抗炎、鎮靜、降血壓、提高機體免疫能力等作用;螺頭滋陰潤燥補肝腎;節瓜具有清熱、清暑、解毒、利尿及消腫等功效;淮山健脾開胃,其他好處為治療久泄久痢、肺氣虛燥、及消渴尿頻等症;紅蓮補脾止瀉,益腎澀精,養心安神;蜜棗止咳潤肺、化痰平喘功效。(網上資料)

材料:

節瓜 兩條

蟲草花 一両

乾螺頭 一両

淮山 一両

紅蓮 一両

蜜棗 三粒

瘦肉 約$40

蟲草花

做法:

1.乾螺頭就先用清水浸泡過夜,等佢浸至軟身。

2.蟲草花及其他藥材就浸洗一陣。

3.節瓜刮去外皮後切件。

蟲草花

4.瘦肉洗淨汆水。

5.煲內放約2.5L水,待水滾後加入所有材料。

6.待再次滾起後,繼續用大火加蓋煲約15分鐘。

7.然後轉慢火加蓋煲多1.5小時。

8.最後加鹽調味,就可以飲得啦!
溫馨提示:
由於個別人仕體質不同,所以大家記得煲之前了解下自己,如有疑問,請先向註冊中醫查詢!

更多精選內容