回顧瑪嘉烈 半全餐生產記

回顧瑪嘉烈 半全餐生產記

懷孕第40W+3D,綿綿終於出世喇,襯現在還有記憶,我要將整個過程回顧生產記錄下來。如果媽媽有任何作動要入院,瑪嘉烈醫院首先會安排媽媽到產房觀察一段時間,例如聽bb 心跳,量血壓,check 宮頸等,再無動靜先能安排上產前病房待產。

撰文、圖片:綿綿媽媽|編輯:TLY

回顧瑪嘉烈生產

產前病房可以開電話及上網,而產房入面就唔可以,如果怕悶,可以帶定書仔去睇,不過會經常聽到隔離有媽媽大叫及生B 既聲音, 其實聽到會覺得好驚好緊張,如果要用電話通知屋企人,可以問姑娘借,另外探訪時間係 12:00pm – 1:00pm, 5:30pm-7:30pm,每次最多只限2個人,不過產前病房可以轉人,而產房就唔可以,所以如果係產房待產都要有心理準備。

生產

突發事情難預計順產變開刀

之前試過一次見紅(4月12日) ,一次懷疑高位穿水(4月22日) ,分別入過2次醫院,最後都係無動靜住左一晚就出院。 到第3次陣痛入院, 終於可以等到綿綿出來喇!

雖然我懷孕時期做了好多準備功夫,但原來有好多突發事情係估計唔到的。 本身預計自已可以順產,最後結果都係要開刀。

陣痛又見紅 感覺如肚痛急屎

4月26日 (40W+1D)
其實係前一晚,已經懷疑自已陣痛,最後綿綿爸爸忍唔住第二晚11:30pm帶我入院,首先觀察一小時bb 心跳及胎動,另外我當時我大約15至20分鐘陣痛一次,而且keep住肚痛急屎感覺,但又唔可以屙,因為姑娘話怕會將bb 屙出來,加上又keep 住見紅,感覺都幾難受。 姑娘話到我痛得密啲先進行宮頸檢查,至小有5-10分鐘一次,所以一直係產房痛住等,完全瞓唔到,等待期間,仲聽到好多人不停按鐘入院,相信呢段時間好多bb 將會出世

 

4月27日 (40W+2D)
其實間唔中都會有醫生或姑娘入來問我,幾耐痛一次,可能我天生勁怕痛, 已經痛標晒冷汗, 跟本都唔知自已幾耐痛一次了,等到上午 7:00am,送早餐來,已經痛到食唔落,當時好似大約10分鐘痛一次, 最後姑娘話轉頭幫我檢查宮頸,但一等就等到10:00am姑娘先來幫我check 宮頸,最後check 左宮頸未開,唯有再等。

呢段時間不停聽到不同媽媽大叫,有d話痛到唔想生,姑娘醫生講「出力」 ,「就得」 等,仲有bb仔喊聲, 我聽到好有壓力, 開始好驚! 直到12:00pm送午餐來,雖然好肚餓,但都係痛到食唔落,我記得綿綿爸爸和奶奶來探我時,爸爸都盡量餵我食,因為我係痛到坐唔到拎來食, 仲有佢地話要食飽啲先有氣力生綿綿。

直到 3:00pm, 姑娘幫我貼上止痛機,可以減輕小小,但仍然都係好有肚痛急屎感覺,而且一痛, 對腳就會亂撑,跟住姑娘叫我多落地行, 希望可以快啲開到度數,最後仲拎埋分娩球比我坐。

已經好努力嘗試, 最後宮頸開左2度。 直到5:00pm 綿綿爸爸再來探我,陪我直到食完晚餐,暫時仲未生得,所以7:30pm綿綿爸爸唯有返屋企等先消息。

8:00pm有醫生入來幫我 check宮頸, 仍然都係得2度, 完全無進展,所以醫生決定即時人手穿水及催生,抽血及落左催生藥後,陣痛會痛得更加密,之後姑娘話可以通知老公來產房預備陪產。直到9:45pm, 醫生幫我打止痛針,及給我聞笑氣,希望可以幫我減輕痛楚,但可能我真係太受唔到痛, 對我來講, 好似一樣咁痛。 我印像中, 綿綿爸爸來到陪我時, 我不停聞笑氣,除左講野九唔答八外,哈哈,仲要聞左2大支笑氣!

陣痛17小時宮頸僅開2度

4月28日 (40W+3D)
直到零晨2:00am綿綿爸爸去左洗手間時候, 醫生就來幫我check宮頸,仍然得2度,完全無進展, 唔通綿綿住得太舒服唔想出來住?還是怕媽媽太痛?因為催生唔成功, 所以要盡快進行開刀手術,到綿綿爸爸回來時,我已經簽晒文件了。 因為要入手術室,所以爸爸不能陪產。

BB成功出世

到2:30am推入手術室半身麻醉,我記得仍然每隔2-3分鐘會陣痛,一痛就會亂撑亂郁,所以打麻醉針時,印像中好似有3至4個人捉住我,最後先順利打到支針,打完針後,成日人突然鬆晒,唔再痛了。 因為我都係半清醒狀態,因之前無瞓過覺,所以我盡量都合起雙眼休息, 但仍然感覺到佢地係我肚度郁來郁去。 無幾耐,聽到綿綿喊聲,姑娘仲抱bb 過來比我望,話係男仔, 出生時間及體重。呢刻雖然好累,但心入面好感動。

綿綿爸爸話等到大約零晨4點幾,姑娘先帶綿綿出手術室,而我差唔多7:00am 係手術室推出來, 令綿綿爸爸好擔心,因為我咁耐未出來,以為我有事。原來醫生係入面要幫我清理手術後功夫及聯針,我印像中推左我係一邊好凍既位置觀察,我仲瞓著左一陣。 最後將我推到產後病房休息。

BB需要在家護病房觀察

我見其他媽媽身邊都有bb係隔離,但因為綿綿出世時有小小發燒,白血球有小小高,怕會有炎症,所暫時要留到家護病房觀察幾日等報告。不過爸爸媽媽可以每日9:00am至9:00pm時間內探綿綿的。 因為麻醉藥未過,所以第一日未落得床, 探唔到綿綿, 唯有靠爸爸去睇綿綿啦! 辛苦晒爸爸通宵頻撲及等候, 又無得休息,又要你擔心我地兩母子, 之後要開始踏入另一個新階段,屋企多了新成員,雖然好多野都會改變,但都希望我地一家三口可以生活得開開心心,幸福美滿啦。

生產

生產

其實我真的好佩服所有媽媽,特別係順產媽媽, 因為我開2度都覺得好難受,何況其他媽媽開到10度, 真係覺得你地好叻, 好偉大。 不過我希望呢篇文唔好令各位媽媽驚左生b啦,為左肚入面小生命,各位爸爸媽媽要加油呀!

生產

綿綿終於安全出世,好感恩。 等左好多年,我終於可以做媽媽喇, 見到綿綿,幾辛苦都是值得的。 其實我仲有好多野想同大家分享,特別係開刀傷口護理及餵奶問題,之後有時間會再寫,歡迎繼續留意我blog文!

生產

歡迎隨時follow”綿綿媽媽”的足跡:

關鍵詞
生產

更多精選內容