「靚媽廚神」梁雅琳  教你潮行街市

「靚媽廚神」梁雅琳 教你潮行街市

最近網上瘋傳一張唐寧湊仔行街市相,獲網民大讚靚女賢淑,這類老婆娶得過!靚媽湊仔行街市大有人在,媒體廚師梁雅琳(Hilda),為了丈夫Felix和11個月大女兒鄺晞婷(Ellie)炮製健康住家飯,每日要湊女行街市買餸。她笑言自己個街市look似唐寧,以簡單方便為主,又不失儀態。一年前,Hilda挺着8個月巨肚接受本刊訪問,一年後的今天,帶同Ellie與我們見面,轉眼已11個月大,而Hilda的身形,從大肚到產後,一點贅肉也沒有,全賴其飲食之道。她烹調堅持採用新鮮食材,盡量不落鹽,利用豐富食材入味,令每道餸菜健康又味美。

運動型衣着

身為廚師的Hilda,主打多菜少肉健康菜式,要食物發揮自身味道,一定要用最新鮮食材,盡量每日到街市選購,「最多擺兩至三日,每次買少少。唔新鮮嘅蔬菜會水分流失,食落霉霉哋,味道冇咁清爽,影響口感。」Hilda指在職媽咪忙碌,難以每日到街市入貨,可在購買肉類方面節省時間,「肉類可以買夠一星期分量,去肉檔一次過買排骨、豬扒同攪碎豬肉,再用保鮮袋分番每餐分量,擺入冰格,可以儲存一至兩星期,其餘日子剩係買菜,慳番好多時間。」

Hilda表示作為精明媽咪,街市最經濟實惠,但好多女士怕污糟,還要拖着小孩,感到十分不便,Hilda教大家又潮又實用的打扮行街市,「首先唔好用膠袋,自己帶個靚靚環保袋,要夠大夠闊,物料最好防水,擺完海鮮都易清洗。我會着得sporty一點,加對沉色波鞋,唔怕污糟又易襯衫,再加條孭帶孭住囡囡行。」她指背包都是好選擇,前面孭BB,後面孭背包,前後平衡行得更舒服,「孭一邊袋好易跣落地。」

多與檔主溝通
靚女買餸點都有着數,好多檔主都會搭多條葱,提供最靚的食材,Hilda笑指與外表無關,最重要多與檔主溝通,熟稔後一定有着數,「例如煮肉,邊part肉最靚、煮咩好?檔主係最清楚,一次過話晒俾你聽,佢哋切牛切豬,邊part最爽口,邊度啱煲湯,佢哋最熟㗎啦,唔怕問喎;買菜都係,你唔識睇都可以問檔主,今日咩菜最新鮮、最時令,一定最甜最靚。」做生意可能會慫恿你買貴菜喎?「都唔會㗎,佢哋都想啲客長遠幫襯佢,呃你一次,就會無咗個客啦。」

三種材料煮糊仔
11個月大的Ellie現時主要食糊仔,為免她將來偏食及重口味,Hilda自創多款愛心健康糊仔,每款用三種材料打勻,「每種材料有自己味道,混埋一齊味道已經好豐富。」Hilda最近在sundaykiss.com開blog分享了多款糊仔餐單,例如銀魚杞子海帶粥,含有豐富鈣質及蛋白質,健康又低脂,而且味道鮮香、帶點天然鹹味的海帶含大量碘、優質蛋白質和不飽和脂肪酸,可防甲狀腺問題。而另一餐單黃椒薯茸瘦肉粥,繼續主打三種食材,其中燈籠椒含豐富維他命及食用纖維,對BB腸胃十分好。

很多家長對孩子偏食束手無策,對蔬菜好抗拒,Hilda指烹調方法都有影響,「好多家長只會蒸菜、烚菜,當小朋友食過炒菜同煎炸食物,就覺得烚菜無味,點算呢?烚菜時可以用雞湯、雜菜湯,或者用蒜茸清炒蔬菜,蒜頭同洋葱係天然味精,一爆開就好大陣香味。」新鮮蔬菜加上適當烹調,就可以改變孩子對蔬菜無味的印象。

銀魚杞子海帶粥食譜:http://vipblog.sundaykiss.com/hildaleung/?p=122
黃椒薯茸瘦肉粥食譜:http://vipblog.sundaykiss.com/hildaleung/?p=132

自製無油零食
好多父母慣以零食氹細路,Hilda卻餵囡囡食蕉,更試過因無得食藍莓喊到拆天,以為薯片糖果才有這股魔力!Hilda指囡囡慣以水果當零食,每次出街都會準備多個水果小盒,包括蘋果、藍莓、香蕉等,避免進食BB餅乾,因餅乾經過烤焗較熱氣,寧願自製無油零食,「我用氣炸鍋做無油薯片、薯條,唔落油都做到脆卜卜效果,我煮咕嚕肉都得。」Hilda教路,做無油薯片,可選擇紫心番薯,刨薄片,再放入氣炸鍋即成,毋須落任何調味料,新鮮番薯有甜味,如果嫌淡口可加少許鹽。另外可做水果沙律當小食,重點選擇低脂沙律醬。

口味能自小培養,Ellie食慣媽媽的愛心健康餐,嫌棄街外重口味食品,開始識飲識食,「我試過買標榜健康嘅即食米糊,但食落好甜,應該加咗好多雲呢拿味同糖分,阿女都覺得好濃味,佢唔係咁鍾意,要不斷飲水。」Hilda相信囡囡習慣淡口,將來返學食茶點,都懂得選擇。

餵人奶要堅持
Ellie患有蠶豆症,不能食金銀花及飲五花茶,還有部分中藥材和薄荷,最頭痛是她對牛奶敏感,有些麵包餅乾以牛奶製,必須小心看清標籤。奶類是BB發育重要食品,好彩Hilda能餵母乳,「餵人奶唔係完全因為佢有蠶豆症,我好支持母乳,能夠提升小朋友免疫能力。初初餵人奶好辛苦,但辛苦係值得,依家我都keep住有人奶,會餵到冇為止。」Hilda當初也經歷過人奶不足,好多媽媽都以為自己沒奶水,其實只要不斷讓BB吸吮刺激乳腺,奶水會愈來愈多,「少少都要俾佢啜,一定要堅持下去!」她特別推介有助谷奶的湯水,例如黑豆豬腳湯、魚湯及煲通草湯水。

丈夫生膽石嚇壞家人
囡囡快將一歲,湊女生活開始定下來之際,兩個月前,Hilda丈夫Felix突然生膽石入院動手術,最近才康復,一場大病警惕了兩夫婦,Hilda說:「生活習慣一定要變,我平時煮嘢比較清淡,但佢習慣臨瞓前食雪糕或薯片,一定要戒宵夜、戒肥膩同零食。」

丈夫發病來得突然,入院十多日,Hilda驚覺人生無常,加上女兒還小,很多事情不能「到時先算」, 「有個人突然出事,另一半要撐起頭家。老公出事嗰陣,我好驚好徬徨,我要打理佢模型生意,又要湊女,又要頻頻去醫院睇佢,頭幾日好辛苦,氹完阿女瞓覺,我自己喺張床度喊。」哭完睡醒,Hilda振作起來照顧家人,幸好Felix迅速康復,一家人平安度過難關,「大病之後加強咗溝通,攤開大家想法,包括家庭大小事務、工作、錢銀安排、保險基金、教育等等,人生實在太脆弱,為家人着想,所有嘢都應該未雨綢繆。」

撰文:Ling
攝影:溫俊鏘(部分相片由受訪者提供)
服裝:quarter
場地:煮飯仔Cooking Studio(tel: 2571 5207)
鳴謝:嘉出版

更多精選內容