張頴康 麥雅緻 規律湊女經

張頴康 麥雅緻 規律湊女經

「劉華契仔」、TVB御用「范生」張頴康榮升父親,與港姐太太麥雅緻(Angie)去年5月誕下可愛B女張雅喬(乳名小豆),剛度過一歲生日!回顧這一年經歷,兩人都謂初初超辛苦,傷口仍痛的Angie 半夜起身餵奶,小豆半夜又哭鬧,適逢世界盃舉行,不愛足球的他們被迫邊做球迷邊湊女,Angie 更疑似患上產後抑鬱,情緒極波動,幸好阿康頭幾個月少拍劇可以分擔,從中學識湊女不能被她的作息時間牽着走,父母必須狠下心腸制定時間表,幫女兒培養出規律生活,這樣父母才能輕鬆湊B。

小豆好鍾意照鏡,見到自己會笑呵呵。
小豆好鍾意照鏡,見到自己會笑呵呵。

產後初期爆喊

去年五月麥雅緻臨盆前夕,與張頴康接受本刊訪問剖白懷孕心情,Angie當時俾足老公100分,產前享受女皇式看待,但產後地獄來了,初期的情緒非常波動,她感激老公分擔到湊女工作,沒有他的話情緒恐會崩潰,「我應該唔係抑鬱,但情緒好波動,生完第一個星期,有朋友上嚟探我哋,我以為佢哋探完就走,原來佢哋繼續留低,其實都好小事,但嗰一刻我覺得好喇,佢哋仲留低我又招呼唔到,我好忟自己,突然間爆喊!」

Angie估計受產後賀爾蒙影響,加上日夜顛倒無覺好瞓,大大影響情緒,「第一個星期湊佢覺得好大壓力,驚佢夜晚焗親或者唔夠暖,又驚佢食奶唔夠,佢又成日半夜起身喊,12點一直喊到4、5點,日頭就瞓覺,結果成個人schedule亂晒,加上我坐緊月,所有嘢加埋我就覺得好辛苦,唔可以有外來衝擊。」

888
(左) 一家三口最近去了台北旅行,他們大讚當地育嬰設施好,原來士林夜市有育嬰室,去到燒肉店亦可以即場餵人奶,台灣人也不會投以奇怪目光。 (右) 一家人帶小豆去做BB 界新興的baby spa,幫小豆輕鬆一下。

邊湊女邊睇世界盃

頭一個月兩公婆望天打卦,「幾時唔使再睇日出?人都癲呀!」當時正值世界盃,好多場波開凌晨四點,他們被迫做球迷,同樣有初生BB的本刊攝影師好有共鳴,笑BB偏偏揀正開波時間爆喊,Angie非常認同:「係呀,成隻鬼咁焗住睇波,賺咗架喇,好過睇粵語長片。」
好彩當時阿康正拍攝的劇集《天眼》戲分不多,有較多時間負責「通宵更」,老婆泵人奶出來,他負責餵,「拍《天眼》嗰陣佢啱啱出世,開完廠就去醫院陪老婆,第二朝又返工,之後晚晚幫手湊女,真係瞓都冇得瞓,冇認真睇過劇本,正常都想拍劇戲分多,突然接到呢套戲分唔多,真係好彩,救一救命先,嗰段時間真係好辛苦。」上位中的他一直劇接劇,拍畢《天眼》後接着開拍播映中的新劇《潮拜武當》,角色戲分較重,幸好湊女時間開始穩定,可以安心放下女兒去工作。

陳豪教睇實老婆情緒

一歲大的小豆開始認得人,現場所見小豆最黐爸爸,行開一會小豆就驚到喊,好搞笑!阿康覺得辛苦一點都值得,「啱啱拍完另一新劇《東坡家事》,可以抖個幾月,之後又要上大陸拍清裝劇幾個月,我要把握時間見多啲個女。」

兩公婆親自落手落腳湊女,新請的工人姐姐只是幫手做家務,希望小豆會黐父母多過黐工人,他們連陪月都沒請,一切自己搞掂,陳豪有勸他們請個陪月幫手,但阿康婉拒好意。「阿Mo同我分享得較多,BB出世前佢提我最緊要照顧老婆,睇住佢同BB嘅情緒,到時你會覺得脾氣好臭!佢又叫我請陪月,我想簡單啲就冇請,依家個女都咁大個,都搞得掂吖!捨得使錢有使錢嘅做法,唔捨得使錢有另一做法啦,哈哈!」

999
(左) 小豆性格大情大性,易笑易喊,見到唔喜歡的東西就會伸脷皺眉,好搞笑! (右) 小豆現有固定小睡時間,父母可以輕易安排做私事。

狠心制定時間表

陳豪可能湊仔好辛苦,以為阿康都一樣,陳豪問他:「點呀,湊BB辛唔辛苦?」阿康竟答好易湊,好開心喎!陳豪聞言呆了!阿康笑說:「佢覺得我竟然湊得掂?哈哈!其實一個月之後我.開始搵到方法湊,就係要set timetable,分配好時間就好易湊喇。」

Angie一位小學同學見她如此苦惱,就指點他們不能跟着BB的時間走,一定要BB按着大人生活,首先要為她戒夜奶、不能一喊肚餓就餵,阿康強調訂時間表必須要狠心,「有一晚我成晚唔瞓睇住佢,就快開拍《潮拜武當》我就成晚睇劇本,喊吖,我由佢喊,我都好痛苦架,好想抱佢,但唔抱得,佢喊到第二日聲都沙埋,過咗三晚之後,佢開始覺得點喊都冇人理就自己.覺,慢慢就戒到夜奶同訂時間表。」現時小豆每三小時食一次奶或粥仔,生活有規律,父母亦可偷時間做私事,好似阿康每朝10時能外出跑步,下午一家人去買餸,晚飯後就親子玩樂時間,這樣輕鬆湊女easy job!

11
父母同為藝人,但小豆睇電視見到媽咪反應大點,爸爸出鏡卻反應冷淡,阿康笑說:「因為媽咪做《東張西望》影住大頭,睇到會開心啲,見我出鏡就淨係識擘大個口。」

曾當幼稚園教師

進食定時了的小豆變得為食,但父母都會堅守時間表,未夠鐘冇得食!Angie讚小豆都好聽話,能坐定定進食、玩耍,不過她幾有性格,是一個大情大性的BB,「你想摸佢未必俾你摸,佢會fing開你,唔可以迫佢㗎!」

Angie開始為她安排上playgroup,正在搜集資料階段,「本來我哋唔想佢咁快返學,但佢到九個月大開始識得多嘢,我發覺佢有啲悶,其實我哋差唔多日日都帶佢出街,但佢好似覺得唔夠,想多啲人陪佢玩。」小豆現階段想父母時刻在身邊,父母一行開就會大哭,Angie指她有分離焦慮,找playgroup都要找些父母一齊上堂的,「同其他小朋友一齊唱歌仔,最好邊唱歌邊摸玩具,例如唱到太陽就會摸太陽玩具,我見過有呢啲班。」她未入行前在美國從事幼稚園教師四年,在美國三藩市州立大學就讀教育課程,對教育小孩有一定知識,但所學的知識卻未能應用在小豆身上。「我返嚟香港十年都生疏咗,但我覺得教人哋同教自己小朋友係兩樣嘢,教自己嗰個係肉緊啲,冇咁嚴厲,我老公又唔嚴,同埋小豆仲細,未識聽人講道理。」

12
場地有好多鴨仔,小豆很好奇點解鴨仔有聲!

睇中蒙特梭利教學

熟悉幼兒教育的Angie負責小豆的教育,揀幼稚園會就近入學,不想浪費時間在車程上,她最近發現救世軍屬下的幼稚園好誇張,小孩未出世就要排隊申請,「救世軍用蒙特梭利教學法,我以前都讀過,主張俾小朋友親手探索,較少從課本學習,我覺得部分課程對小朋友係困難,好似一歲就俾把真刀佢切嘢,但有部分我好buy,好似睇書學習ball,你真係要俾個波佢摸索。」她有意讓小豆學習該套教學法,最少是生活化的教學法,「希望係動手接觸嘅學習,而唔係不斷做功課。」

長遠來說兩人都首要小豆學好中文,十多歲或步媽媽後塵到美國讀書學好英文,兩人異口同聲說:「最重要係睇佢意願,讀多啲書先,將來佢想做藝術家都唔緊要,不過唔好入番呢行喇,工作唔穩定,我哋做過就知辛苦呀。」

000
Angie覺得教自己個女比教其他小朋友難,現在又難與囡囡道理,「早排帶佢出去食飯,佢突然尖叫,我哋已經快啲食完快啲走,行去搭車佢繼續叫,因為佢想爸爸抱,但我哋唔想佢一尖叫就抱,唔可以就晒佢,但又唔可以罰佢,因為佢未識聽道理。」

 

撰文:Ling
攝影:Paul Choi(部分相片由受訪者提供)
場地:Party Fever(tel: 9674 4952)

 

更多精選內容