寶寶大過天｜岑麗香為囝排隊爭入名校幼稚園 舉家搬入港島中西區名校網
廣告
樣子甜美的岑麗香，婚姻生活與其外表一樣甜到漏，同金融才俊老公強強結婚後連生兩子，成為幸福少奶。對岑麗香錫到燶的強強，早為遷就老婆把工作基地移師香港，為了讓囝囝可以入到傳統名校或國際學樣，即向陳豪夫婦取經，舉家搬入干德道豪宅！
撰文、圖片：東方新地
岑麗香為工作住近電視城 為囝囝山長水遠搬過海
回流香港，獲選為華姐冠軍與無綫簽約後，岑麗香為方便開工一直住近電視城，在將軍澳區居住。三年前結婚、2019年3月誕下Jacob （吳主軒）不久，岑麗香丈夫強強今年中多次被發現在港島中西區頻頻睇樓有搬屋打算。話咁快，原來已經物色好新居一家三口亦已經遷入，平日強強、香香會帶著囝囝於周日去北角參加教會禮拜，然後齊齊驅車駛回干德道新居。
鬼妹仔性格一拍即合 同陳茵媺密密斟媽媽經
香港地競爭激烈，動輒就話贏在起跑線、一出世排定隊爭入名校幼稚園絕對冇誇張，據知情人士透露，從住足9年將軍澳區搬到去對面海住，香香都係為Jacob著想：「香香同Aimee（陳茵媺）一樣鬼聲鬼氣、一樣喺加拿大回流，佢哋因為陳豪而相熟、因為大肚生B話題多多，成為好友密密斟媽媽經。
向陳豪伉儷取經舉家搬入港島名校網
陳豪兩公婆本來家住大埔比華利山豪宅，年前為咗三個仔女入讀港島區國際學校，全家搬過海入住月租七萬嘅南灣豪宅。香香搬新屋之所以揀喺中西區，就係因為聽從陳豪伉儷嘅意見，貪校網好，無論傳統名校定名牌國際學校都大把選擇。」
