《大時代》方敏 楊羚仔女讚做得好!

《大時代》方敏 楊羚仔女讚做得好!

神劇《大時代》重播至今高潮迭起,方家接二連三遇害睇到觀眾好肉緊,其中細妹方敏被姦染性病,最終跳樓自殺一幕,重看多次依然震撼。飾演方敏的楊羚是悲劇女角,現實中卻是方家成員中,家庭最美滿的一位。她自2000年婚後淡出娛圈,育有一子一女湊成「好」字,已分別13歲及9歲,相對她的方家兄姊,大哥劉青雲婚後沒兒女,大家姐吳詠虹離婚獨力撫養女兒,二家姐李麗珍情海翻波,加上玲姐藍潔瑛靠綜援獨自生活,楊羚的確幸運得多。
重看神劇,楊羚沒太大感覺,訪問當日劇情播到她被強姦染上性病住院,她淡然道:「哦,咁我都就死喇喎,今晚要睇吓!」由於深夜重播,一家人只逢周五睇一集,看到的集數戲分亦不多,但仔女不介意,依然讚媽咪做得好好!

台前幕後有團火

《大時代》在深宵重播掀起熱潮,風頭勁過三線劇集,劇中人物再受追訪,楊羚都笑說:「依家嘅訪問仲多過以前呀,我做埋你哋唔做㗎喇,好忙呀。」多謝楊羚俾面《Sunday Kiss》。
當年楊羚演繹敏敏這個內向學生妹角色,覺得好易做,現重看才覺得自己原來未夠好,「當時我覺得唔難演,都係做番學生啫,我仲好年青,依家睇番其實做得唔係咁好,有啲場口可以做好啲,經驗真係要慢慢累積。」她最難忘是當時的拍攝團隊好有火,「呢套劇嘅拍攝氣氛好好,所有人都好認真,你會感覺有團火喺度,大家好團結好想做好呢樣嘢,點樣令到呢場戲好啲,唔係大家嘻嘻哈哈好心散,完全冇。」

楊羚淡出後忙於照顧小朋友,只間中客串電影及港台劇集飾演媽媽角色,不過仔女好支持媽咪做戲,希望多看她的演出。
楊羚淡出後忙於照顧小朋友,只間中客串電影及港台劇集飾演媽媽角色,不過仔女好支持媽咪做戲,希望多看她的演出。

藍潔瑛最老友

眾多演員中,楊羚與藍潔瑛最老友,未入行已彼此認識,當她是大姐姐般,「我哋好細個就識,佢成日同我哋一齊游水一齊玩,大姐姐咁樣,佢入娛樂圈又早過我,拍《大時代》嗰陣佢教我點做戲。」兩人皆已淡出娛圈,雖然少見面,但仍保持聯絡,「大家都住得遠(楊住元朗,藍住赤柱),我又拖住兩個細路,所以都好少見面,都係幾個月會電話聯絡,互相問候近況,佢會問吓我啲小朋友點呀,我都係希望佢精精神神、開開心心就得。」
楊羚當時仍是新人,頗受TVB重用,《大時代》之前有幾套劇集如《不再少年時》、《我愛玫瑰園》、《公私三文治》及《義不容情》等等,大部分做小妹妹角色,所以得到好多前輩演員愛錫,去到《大時代》就有大哥哥劉青雲關照。「佢好好㗎,我記得佢俾本教演技嘅書我睇,有時又會提點我,呢場戲如果咁做係咪好啲呢?我好鍾意同佢合作,係一個好好嘅大哥哥。」她笑謂沒問青雲攞電話,所以拍攝完畢兩人就沒聯絡,直至2009年電影《竊聽風雲》兩人重逢,「雖然我哋冇同場拍戲,但我哋有日一齊對稿,大家就嗌『嘩,真係好耐冇見呀!』」

楊羚喜歡帶仔女到戶外家庭樂,出一身汗放電,並認識生態環境,「室內只係人造環境,去郊外接觸大自然可以幫助思考,好似去沙灘玩,順便教佢環保知識。」
楊羚喜歡帶仔女到戶外家庭樂,出一身汗放電,並認識生態環境,「室內只係人造環境,去郊外接觸大自然可以幫助思考,好似去沙灘玩,順便教佢環保知識。」

47歲懶運動變肥

習慣早睡早起的楊羚坦言,重播時間太夜好少開電視,只能逢星期五一家人排排坐收看,每星期睇一集,咁咪甩晒劇情囉?「由佢哋甩囉,反正都唔係集集有我,你估我係劉青雲咩,佢哋淨係想睇我咋嘛!」仔女對劇情一知半解,楊羚為人善忘反而好少講劇情,細女Christy指多數由爸爸解釋:「爸爸話係講唔知乜嘢,係講股份嘅,套劇係23年前!」楊羚笑言逢星期五播出的集數好少自己,沒機會討論劇情,懷疑仔女有沒有睇到自己,「嗰幾集好少我㗎,我只係過吓鏡,主要係講劉青雲沉迷買股票咋嘛。」訪問當日亦正值星期五,方敏已被丁益蟹強姦,臨死前戲份漸重,仔女終可以欣賞媽媽的精采演出。

相隔廿多年,47歲的她一臉童顏沒走樣,與方敏外貌分別不大,只是身形圓潤了,「多謝大家讚賞,好難冇變嘅,我係肥咗,最緊要身體健康同開心。」她透露婚後生活非常健康,keep得好的主要原因是擁有健康生活,「我早睡早起,有好嘅飲食習慣,我又唔煙唔酒,所以一定比以前健康嘅,但我少運動,由細到大運動細胞零雞蛋,好難要我做運動,所以呢個世界真係冇醜女人,只有懶女人,我就係懶嗰個囉!」

Christy喜歡踏單車,但楊羚不敢讓她去得太遠,怕她發生意外,必須要在她視線範圍內玩。
Christy喜歡踏單車,但楊羚不敢讓她去得太遠,怕她發生意外,必須要在她視線範圍內玩。

懶媽媽育成運動小將

懶人未必有遺傳,這個懶女人偏偏生了一對運動健將仔女,13歲大仔Eden是短跑王,其次是踏單車,細女都受哥哥影響愛上這兩項運動,最近在校運會更贏得短跑金牌,楊羚笑他們是兩隻野馬,跑來跑去追到氣咳!「我係郁都唔郁嗰啲人,由細到大最怕郁,可能佢哋嘅運動天分遺傳爸爸。」 Christy近兩年愛上打羽毛球,由媽媽的友人負責教波,大讚她有天分,今年進步神速。「唔願郁」的楊羚愛女心切,閒時都要陪女打波,「幾個星期陪佢打一次咁多啦。」Christy就讀基督教宣道會徐澤林紀念小學小四,來年要應付呈分試準備升中,楊羚拒做緊張媽咪,並謂:「我對個女有信心,我覺得佢OK㗎!」

原本同校的大仔Eden,升上粉嶺直資的基督教香港信義會心誠中學中一,學校面積達17,000平方米,校園寬闊設施齊全,更重要是基督教校風好,老師有愛心作育英才,並非填鴨式一味操卷,功課量比小學少呢。

楊羚指大仔Eden細個比較依賴父母,升中一後面對新環境及新同學,處事要獨立,令他突然成長。
楊羚指大仔Eden細個比較依賴父母,升中一後面對新環境及新同學,處事要獨立,令他突然成長。

愛上南生圍紅磚屋遊玩

自仔女小一起,楊羚便為仔女安排補習,別誤會是虎媽心態,而是幼稚園時期教功課已影響親子關係,寧願讓補習老師負責教導,父母則負責教養及安排活動,親子關係才能維繫得好。「幼稚園教功課已經好勞氣,教寫幾個字都嗌晒交,我冇咁嘅耐性。」
楊羚轉職做玩樂大隊長,家住元朗錦繡花園的他們,四周都是大自然,閒時到附近草地野餐睇湖景,假日到元朗錦田郊區玩半日,有益身心。雖然他們住元朗,但較少到市區行逛,「元朗依家好多人,好多香港人覺得元朗多嘢食,走晒入嚟好迫,所以我哋都係去郊外玩多。」訪問當日楊羚帶我們到附近的南生圍散步,兩母女踏踏單車、沿着小路漫步,剛放學的Christy身心大解放。他們一家人有時前來放風箏、睇候鳥,輕鬆度過周末時光。

楊羚又特別推介錦田紅磚屋的跳蚤市場,52間店舖各具特色,從小物、服裝至家具、掛畫、花店都有,sundaykiss.com也推介過此地。她最愛當中充滿香港地道風味的食店,「過嚟食豬腸粉好好味㗎。」
他們近日亦衝出元朗,跑到烏溪沙睇海星,Christy講起海星好雀躍,即刻展示相片給筆者看,並謂拿起海星的感覺好得意,還用海星砌成了一個大心形,楊羚提醒有興趣前往的讀者,記得要保護海洋生物,「睇吓好喇,唔好帶番屋企喎!」

一家人經常聯同鄰居去草地野餐,一齊BBQ甚至整韓燒,加上大量甜品小食,樂透半天。
一家人經常聯同鄰居去草地野餐,一齊BBQ甚至整韓燒,加上大量甜品小食,樂透半天。

撰文: Ling
攝影: Clay Lam (部分相片由受訪者提供)

化妝及髮型: 舒琴

更多精選內容