同一個老公 肥媽嫁三次

同一個老公 肥媽嫁三次

60歲的肥媽(Maria Cordero)今年再婚!一對璧人飛到拉斯維加斯舉行婚禮,同行有20位親友見證,肥媽更在婚禮上數度爆喊,新郎哥是誰?其實都是同一個男人——結婚15年的丈夫Rick,兩人已是第三次行禮,還連搞兩年。

第一次是肥媽和Rick正式結婚,當年家有白事沒擺酒,肥媽的外籍奶奶一直耿耿於懷,所以去年兩人為老人家補擺喜宴,今次則是Rick為鼓勵老婆而辦。去年肥媽發現子宮生瘤,需做手術切除子宮和卵巢,手術前Rick揚言再娶她,推動肥媽極速康復。一場手術拉近了兩人關係,今年2月,加埋百幾歲的「新人」再度行禮,恩愛得如新婚一樣。

手術後沖喜再婚
為滿足奶奶心願,兼替老公沖喜,去年決定補擺喜酒,「我老公屬豬,上年唔係咁好,睇相佬話最好辦喜事,本來叫啲仔結婚,又推話後年,唔知幾多年後,咁是但啦,我自己嚟囉!我奶奶都87歲喇,唔斟俾佢飲等幾時?斟唔到咪大鑊!」喜事唔嫌多,年尾肥媽發現生子宮瘤,要做大手術切除子宮和卵巢,今次輪到老公為她沖喜,肥媽說:「我入手術室前,老公叫我唔好驚,我係好驚㗎,成晚睇佛書。我朝早七點幾做手術,老公安慰我話無事嘅,你出番嚟我再娶你做老婆,幾時我都娶你做老婆,我就笑問係咪真㗎?佢話係!我醒咗之後,第一件事就問佢『係咪結婚呀?』」

計劃第四次結婚
今年2月肥媽60大壽前夕,與Rick雙雙步入拉斯維加斯教堂行禮,邀請20名親友見證,包括好友劉雅麗。兩人第三次結婚,依然感動得如新婚般,淚流披面,肥媽指今次由老公一手包辦,「拉斯維加斯好正,樓上做騷,樓下係成個教堂,教堂二樓可以買戒指,我老公安排買戒指、訂婚紗,老公未見過我件婚紗,我又未見過老公件衫,當我一開門出來,我老公見到我着嗰件婚紗好開心,佢一路喊,喊到好似新婚咁,仲有見證我哋嘅人都喊,嗰種喊係喜悅,好難得兩個人百幾歲,再由頭行過婚禮,真係好開心。」肥媽想起結婚的喜悅,食過番尋味,正計劃第四次結婚,「我老公話人哋回教可以結四次,我都結咗三次咯,我俾老公做回教人結四次呀,但娶親個老婆都係我咋嘛!」

仔女是怪獸家長
現時肥媽與老公和奶奶三個人在大埔住,一眾仔女和孫兒早已搬離,原來他們都好現實,為入名校搬到尖沙咀、銅鑼灣及中環等名校區,「有拔萃、St. Paul’s、St. Joseph’s,香港政府迫人哋分開囉!呢一代讀書好陰公,數學有數學老師補習,國語有國語老師,英文有英文老師,又彈琴又運動,依家啲細路一出世就返工,發癲㗎,個個都話考狀元!」肥媽只要求孫一代學業合格,反而是仔女要求高,「拎70幾分都要鬧,個個都係怪獸家長!同佢哋講仲話番我,『你唔明㗎喇,追唔上㗎,同以前唔同晒喇!』咁是但啦,我唔識嘛。」肥媽與孫仔孫女每星期見面,但一到考試期,肥媽不會上門探望,以免他們分心,「我一上去佢哋就冇心機讀書,個個喺房出嚟嗌『阿嫲!阿嫲!』要同我玩,又俾嘢我睇,最細個孫成日俾手作我睇,其他補緊習都借尿遁出嚟攬吓我。」

撰文:Ling
攝影:Clay Lam(部分相片由受訪者提供)
場地:煮飯仔Cooking Studio(tel:2571 5207)
鳴謝:嘉出版

更多精選內容