52歲林文龍獲郭可盈大力支持  做亞視管理層  夫妻相處之道 總要有一個忍讓

52歲林文龍獲郭可盈大力支持 做亞視管理層 夫妻相處之道 總要有一個忍讓

52歲藝人林文龍1987年入行,近年以外援身份幫無綫拍劇,近日林文龍忽然倒戈加入亞視擔任副總裁,由演員搖身一變成為管理層身份,幫亞視革新重振雄風向無綫挑機。林文龍上場即大展拳腳,獲老婆郭可盈大力支持,難得有呢個機會應該去把握,支持老公用心做,一定可以做到成績!老公跑事業,老婆做全職媽媽,照顧囡囡林天若(Tania)。

撰文、圖片:東方新地

林文龍獲老婆大力支持 殺入亞視做管理層

1987年參加無綫超級新星選舉入行的林文龍,近年以外援身份幫無綫拍劇,2016年回巢無綫拍4K劇《不懂撒嬌的女人》,之後再有中港合拍劇《再創世紀》,以及仍未出街的《那些我愛過的人》,套套皆大製作,成為無綫王牌外援,不過,月前林文龍忽然倒戈加入亞視擔任副總裁,由演員搖身一變成為管理層身份,滿肚密計大展拳腳,踏入事業新里程。據知情者透露:「文龍喺娛樂圈三十 年,已經係一線小生,做演員去到一個樽頸位,舊年亞視主席賴彩雲搵佢過檔,並唔係做演員咁簡單,而係搵佢入管理層,做亞視副總裁,直接幫亞視改革重整旗鼓,對未試過做管理層嘅文龍嚟講,的確係一個新挑戰,賴主席好盛意拳拳搵佢,對文龍喺圈中人脈同經驗好有信心,仲答應畀好大自由度佢去發揮,佢考慮咗一段時間,覺得自己都係時候去改變一下規律嘅人生,加上老婆郭可盈大力支持佢嘗試,覺得難得有呢個機會應該去把握,支持老公用心做一定可以做到成績!」

林文龍
林文龍獲亞視控股非執行董事兼聯席主席賴彩雲邀請,擔任亞視副總裁一職,他在加盟記者會上接受主席賴彩雲頒發職員證。
林文龍
由一線小生搖身一變成為亞視副總裁,一月正式上任的林文龍,早前率領亞視團隊舉行新春團拜,除了銳意革新,面對新冠肺炎疫情,更宣布會派發二十萬口罩給香港市民,又捐出千萬到武漢抗疫。

老婆強勢 習慣忍讓吓

老婆就做文龍背後小女人,全心做全職媽媽照顧家庭。林文龍 同老婆都係artist,有好多嘢都成為一個焦點。提及外間覺得太太比較強勢,林文龍 就話事實上老婆嘅性格係比較strong啲,但佢覺得兩個人喺埋一齊係必須要調節一下。「其實我都好strong,開頭我同佢一齊嘅時間直頭日日都火星撞地球,日日頂撞,撞到好攰,慢慢發覺不如我試吓忍讓吓啦,總要有一個忍讓㗎,問心講,到今日,佢性格上一定係strong過我,咁咪氣度啲,讓吓囉,就係因為咁,所以好多外面嘅人,包括傳媒嘅報道都會覺得個女仔好strong,個男仔就忍、就佢,就會將個主導位擺咗喺佢度,但對唔住,我唔會為咗呢啲嘢澄清,因為呢個係我同佢兩個人嘅相處,我唔需要同其他人交代。」

52歲林文龍獲郭可盈大力支持 做亞視管理層 夫妻相處之道 總要有一個忍讓

林文龍

自組新班底 召集上世紀「師奶殺手」埋班

一月已正式上場任亞視副總裁的林文龍,不停有大搞作,除了將亞視大埔總台大裝修,月初在新春團拜更透露會派發廿萬口罩給香港市民,又捐贈千萬支持武漢抗疫,不過,要幫亞視收復失地,自家製作先係王道,現正為公司重整架構及自組新班底的他,近日更密斟昔日一班師奶殺手埋班拍劇。據知情者透露:「加入亞視之後,文龍會參與管理及製作決策,話晒有競爭先有進步,佢做嘢冇顧慮,嚟緊亞視會開劇,佢都唔想馬虎了事,閉關度橋之餘,仲部署挖角,文龍圈中朋友唔少,呢排佢都碌盡人情卡,搵唔少舊拍檔同以前合作嘅同事傾大計,有幕後班底,仲有重量級演員,當中佢就傾緊以前班師奶殺手加盟,好似同佢合作最多最老友嘅歐陽震華、又有以前同老婆拍過唔少劇嘅陶大宇羅嘉良吳啟華,個個都好有份量。雖然啱啱上場,但佢已經瞓晒身,都係為咗想畀多啲驚喜觀眾!」 由演員升呢成為副CEO的林文龍,2020年相信是他人生重要一頁!

林文龍
上年與黃翠如、連詩雅合作TVB劇集《那 些我愛過的人》,劇集未出街,林文龍已 由無綫外援變敵對!

記者直擊 林文龍:「係接觸好多舊拍檔」

記:「上任之後係咪有好多大計?」
林:「現階段會一步步嚟,要砌好基本班底先,我本身要求高,唔一定咁得心應手搵到我想要嘅人,都要慢慢去見,新任主席畀咗好大嘅自由度我,只要我覺得啱嘅就去做,啲錢應使就使,既然佢咁信任我,我更加要認真去做。」

記:「會否爭取入番電視平台?」
林:「現階段唔會,暫時都係做網嘅嘢,同現階段 投資者嘅方向脗合嘅,都係朝著呢方面做!」

記:「今年會唔會製作劇集?」
林:「一定會。」

記:「係咪會挖角?」
林:「記者會之後,有好多工種嘅人主動聯絡我,包括一啲TVB嘅舊同事,佢哋都話依家一啲新嘅約,Artists 係可以去隔籬台工作,咁我哋係一個網台,變咗同一貫TVB落地電視台唔一樣,競爭唔係咁直接!同埋我自己角度睇,我希望可以做到百花齊放,大家互相幫助互相扶持。所以我覺得如果TVB可以 open,打開門畀Artists過嚟拍我會無任歡迎。」

記:「有指你會搵番以前班師奶殺手合作?」
林:「依家都未有一定方案,不過我呢兩個禮拜係接觸好多舊拍檔同舊同事,不斷見佢哋,睇吓嚟緊會唔會合作到!」

林文龍
林文龍回應記者,表示今年內一定會拍劇,仲接觸過好多舊同事!

林文龍目標!「帥奶殺手聯盟」挖角名單:

無綫出品過不少神劇,當中成功捧紅不少師奶殺手, 歐陽震華陶大宇吳啟華羅嘉良經典演出令觀眾難忘。

59歲歐陽震華《壹號皇庭》

92年被監製鄧特希睇中,歐陽震華在《壹號皇庭》擔演律師角色,除了演活專業律師,演出更生鬼搞笑,成功奠定師奶殺手形象,連拍五輯《皇庭》系列,事業上位。

林文龍

57歲羅嘉良《創世紀》

《創世紀》上下兩輯合共106集,是電視史上龐大心力經典作,羅嘉良演的葉榮添,創造無煙城的發跡經過,更成為唔少觀眾追捧的精神偶像,將羅嘉良事業推上巔峰。

林文龍

56歲陶大宇 《 刑事偵緝檔案》

提到陶大宇事業高峰代表作,大家一定記得《刑事偵緝檔案》,由他演出的張大勇與郭可盈演的高婕( Jessie ),二 人更因此成為觀眾眼中的金童玉女。

林文龍

55歲吳啟華 《妙手仁心》

當年經常被定型做奸角的吳啟華,憑著《妙手仁心》一洗壞人形象,他演出的不覊情聖、善良溫柔的腦科醫生程至美,俘虜唔少師奶的心。

林文龍

【恩愛夫妻】林文龍郭可盈 慶祝水晶婚

52歲林文龍獲郭可盈大力支持 做亞視管理層 夫妻相處之道 總要有一個忍讓

更多精選內容