姚嘉妮&林祖輝 建立童裝王國

姚嘉妮&林祖輝 建立童裝王國

姚嘉妮丈夫、前亞視藝員林祖輝近年棄影從商,受聘於體操王子李寧旗下的「非凡中國上市公司」任高級副總裁,長駐北京管理一班國寶級運動員,高薪厚職。不過去年初,祖輝接受本刊訪問時表示已辭工,為了家庭及新生的兒子Kyros,他不得不放棄北京事業,但返港後未有明確方向。相隔年半,祖輝已開展新事業,在童裝界大展拳腳,老婆幫手揀貨,仔女做model,一家人齊心協力。祖輝還計劃大力擴充,由現時一個品牌兩間舖,今年內為四個品牌共開五間,之後每年再開多兩至三間,極速建立童裝王國。

棄京高職 返港湊仔

正當事業如日方中,祖輝打算接嘉嘉和女兒Kyra上北京住,連北京哈羅也取錄了Kyra,此時嘉嘉發現懷有第二胎,放棄了舉家北上念頭,決定留港養育孩子,祖輝說:「對於小朋友成長,香港嘅環境始終較理想,所以決定我返來。」放棄高薪厚職,一切重新開始,細仔Kyros出世後,祖輝要思量新發展,「嘉嘉話如果可以做同小朋友相關嘅嘢就好喇。」與友人傾談下,得悉有幾個知名品牌的童裝生意,覺得有利可圖,「我同拍檔投資咗七、八位數字,未來會不斷擴張,做零售如果得一間舖,好難賺到錢,當做到一定規模,成本攤分咗,賺錢機會先大啲,甚至賺多啲。」祖輝奪得的童裝品牌國際知名,除了Levi’s Kids兩店外,緊接還有Converse Kids,有排忙。

老婆揀貨 仔女做model
講到潮流觸覺,祖輝自覺麻麻哋,需要老婆及友人幫忙,「揀衫好主觀,要估未來趨勢,今年興呢三款,下年想再做但唔興喇喎,太太呢方面就俾到好多意見。」揀完貨都要穿上身,才知是否好看,「啲衫擺喺度未必好靚,但有小朋友着上身,原來效果唔錯喎,所以阿女就係我最佳model。」嘉嘉坦承在生意上,99%由老公一手包辦,自己甚少出力,「我只係睇catalog俾意見,生意上絕大部分係佢搞,我都係湊小朋友同拍嘢。」以前老公在京時,一個月只返港一兩次,每次逗留一個周末,現在再忙都好,每晚都能一家團聚,嘉嘉說:「依家佢自己生意,可以控制到時間,佢比其他人早起身,送完囡囡返學就返工,夜晚六點幾返.食飯,八點幾氹仔女瞓覺,讀bedtime story,之後佢就入書房繼續工作。假日要陪仔女出去玩,佢寧願朝早四五點起身工作,做完就可以全日陪仔女。」

撰文:Ling
攝影:Paul Choi(部分相片由受訪者提供)
場地:[email protected](tel: 2151 9761)、Levi’s Kids

更多精選內容