梁慧恩Viann嫁入豪門 老爺親手接生

狂嘔五個月
開舖成為她整個懷孕過程中，唯一的寄託。懷孕至今她感到非常痛苦，戒口戒清不特止，還嘔足五個月。「我仲未感受到懷孕的美麗，未到期驗孕我已經嘔，中醫幫我把脈話我有咗，十日咋。」她的孕吐情況嚴重，Arthur笑她嘔到似鬼上身，每日嘔五、六次，誇張到口鼻齊噴，辛苦到想入院，但醫生指情況正常，只勸她多休息，「我就係休息唔到吖嘛⋯⋯」Viann的婦科醫生正是她老爺，雖然她食乜嘔乜，但依然重了60磅，上圍B級升至D級，老爺指她體重已屆上限，「應該係食中藥太補，但個中醫都係老爺介紹。」

胎盤低險大出血

Viann原打算邊陀B邊上學，她正就讀中大生命科學學院環境科學系博士課程，主修珊瑚保育及能源周期，但她嘔到身子虛弱，試過兩次駕車返學作嘔炒車，被迫停學一年。「諗住喺屋企睇paper睇書都唔得，好冇精神，嘔得最犀利嗰陣，望到啲字都想嘔，睇電視都集中唔到，最叻只係睇老夫子，一版六格公仔。」第六個月終於停嘔，開心一個月後，輪到體重急升，身體出現毛病，「我手腕、膝頭、腳踭同背脊都痛，企起身、着褲着裙都要扶，膝頭關節好似肥人咁，行兩個鐘就痛。」懷孕初期她仍有驚險，老爺指她的胎盤位置好低，有出血風險，連打噴嚏都不能，「20周後，BB開始有重量壓着，就會容易出血，如果30周胎盤仲係低，有機會造成胎盤撕裂，嘭嘭聲出血好大鑊㗎，所以我要成日瞓床，好彩20幾周開始上番去，鬆晒！」

撰文：Ling
攝影：Clay Lam（部分相片由受訪者提供）
化妝：Kings@KINGS MAKE UP
髮型:：Terrance@KINGS MAKE UP
場地：貓山皇@銅鑼灣