Bob享盡女人福 九月添第三個女

育兒

廣告


Bob近年密密做,為養家亦為興趣,育有兩女林霏兒(霏霏)和林熹兒(熹熹)的Bob夫婦,宣布再懷有第三個女,預產期九月中。Bob今次心情輕鬆得多,已有兩次經驗,加上自己工作忙碌,無暇照顧老婆Pearl,至今更未睇過超聲波,預產期前後日子都排滿工作,「可能做做吓嘢,老婆突然生得衝去睇佢。」幸得Pearl明白事理,從沒埋怨老公一句。

忙到沒睇超聲波
搵食的代價,是錯失女兒的成長片段,今次太太懷有第三個女兒,Bob至今未看一眼,太太Pearl笑他創紀錄,「由啱啱懷孕到就嚟生,佢從未見過BB,冇睇過超聲波,完全冇機會睇佢。」聽罷Bob心有歉疚,「陀第一二個女嗰陣,會盡量就我時間,但今次呢大半年,太太要就我,又要就佢,仲要就兩個細路,覺得好辛苦,所以我就冇時間睇。」

有兩次生育經驗,Pearl能自己一腳踢搞掂,但因年紀漸長,今次陀B有少少辛苦,本身有糖尿病的她,懷孕令糖尿指數反覆,Bob非常關注太太的健康,「佢每日要注意飲食,又成日打針,都係為咗生呢個小朋友,屋企所有嘢佢都處理得好好,希望佢身體健康。」Bob最感激太太在女兒面前,為他說盡好話,「好好彩娶到個好老婆、好媽媽,成日同兩個女講,爸爸喺出面做嘢好辛苦,見到爸爸返嚟要錫爸爸,要歡迎爸爸呀,所以我每次返屋企一打開門,兩個女好開心衝出來迎接我,真係好窩心。」

沒追仔壓力
細妹下月出世, 兩位家姐霏霏和熹熹, 已準備好迎接細妹,Bob說︰「佢哋最近畫全家福,有父母、大家姐、二家姐,仲畫埋細妹,又成日問媽咪,細妹幾時出世?我幾時做大家姐、二家姐?佢哋好期待細妹出世,想快啲一齊玩。」一家人開始為細妹改名,霏霏和熹熹都有參與,「應該走唔出幾個名,大女叫霏霏Faye,二女叫熹熹Haye,細女可能都係aye尾,我哋諗晒26個英文字,得兩三個字母夾到,變番中文亦有意思,例如Maye林美兒、Kaye林基兒,或者等出世之後,再問吓長輩同朋友意見。」

Bob六年誕三千金,並非為追仔,「我問番娛樂圈朋友,有三個女嘅父母好少,最近係徐淑敏啦!其實我好期待第三個BB出世,好多人問係咪想追仔?其實我冇咁諗過,我覺得生女好好,我冇傳宗接代嘅心態,因為我細佬兩年前生咗個仔,我林家命脈有人傳承,唔需要我去努力。未生之前太太問過我,係咪想追仔?我話唔想大家有壓力,仔又好,女又好,對我嚟講都係天賜禮物。」