【二次懷孕33W】照結構後發現胎兒腎盂漲大點算好?

【二次懷孕33W】照結構後發現胎兒腎盂漲大點算好?

之前我係網上分享,產檢發現胎兒腎盂漲大問題之後,有唔少準父母都pm我佢哋,話胎兒都有同樣問題,亦都好擔心後續要點做,所以今次我會分享我兩胎bb都出現腎盂漲大問題,同埋之後既處理。腎盂漲大簡稱「腎仔大咗」,好多時大家透過20週照結構發現兩邊腎大細不一,多數一邊體積正常,一邊體積明顯大啲。

 

我第一胎照結構,發覺皓皓腎盂漲大,腎大小數字可以比大家參考吓,正常一邊係0.34cm,不正常係0.56cm。當時我哋當然好擔心啦,不過醫生講返,20週胎兒器官發展未完善,所以有機會尿液未能順利完全排清,所以要繼續睇住情況而定。

【媽咪二次懷孕33W】照結構後發現胎兒腎盂漲大點算好?

而今次第二胎照結構時,正常一邊係0.29cm,不正常一邊係0.44cm,當時醫生講正常係0.4cm內,所以我哋知道又係同一狀況出現,所以都要再觀察。

【媽咪二次懷孕33W】照結構後發現胎兒腎盂漲大點算好?

由於我登記係威院分娩,所以兩胎我都有同健康院及醫院講返,所以未生bb前,佢哋已經安排我係大概三十至三十二週照超聲波同安排醫生講解,其實未生b前照,主要想睇返BB出世後,是否需要再做檢查。

 

第一胎醫院照個時,左右兩邊腎大小大概差四倍,一邊係0.2cm,另一邊係0.88cm。而今胎一邊係0.22cm,另一邊係0.52cm,明顯睇到兩胎既腎盂大小分別。

 

第一胎皓皓照到腎盂漲大左右分別比較大,所以佢係出世到宜家兩歲幾後都做咗好多次檢查,最簡單照肚肚檢查都做咗兩三次,其他就屬於較深入檢查,好似插尿喉放顯影劑照腎超聲波,仲有係血管注入顯影劑做檢查,不過當時皓皓真係太細,以上兩樣過程係好痛苦,聽到佢喊我心都痛埋,不過為咗佢好,所以都無辦法啦⋯⋯

 

暫時,第二胎喬喬出世後都會有醫院跟進,不過今次應該只會做啲較簡單檢查,相信唔會好似哥哥個時咁恐怖!

 

皓皓出世到宜家,威院一直有follow,去到宜家,大概一年一次覆診,整體跟進得好好,所以如果大家胎兒有同樣問題,都可以唔洗太擔心!而準媽咪唔需要自責係自己問題造成,因為腎盂漲大係屬於胎兒自身發展其中一環,而做成腎盂漲大,亦唔係由母體造成嫁!!

 

以上希望幫到各位同樣受胎兒腎盂漲大問題困擾既準父母啦!!

 

懷孕中看到筋肉寶寶的成長,令我更期待二胎BB的加入!

每週小煮意食譜、二寶日常點滴、親子好去處、大家記得要follow呀!

喜歡玩IG的朋友記得Follow:kylife.babies

面書專頁:Kylife與二寶之日常

 

更多精選內容