43歲蕭正楠落力做家庭煮夫 細心照顧三餐 太和街市傳授買餸心得

原文刊於：東方新地

大爆黃翠如生活「呢啡」 蕭正楠睇少眼都出事

黃翠如雖然是千億千金，但她為人貼地率性，不用開工做回自己，蕭正楠不止一次撕破老婆真面目，踢爆黃翠如原來有很多不為人知的生活習慣。先由人類最基本的生存需要飲食開始，有時黃翠如開工很忙，一日三餐就會很求其解決，蕭正楠需要很小心地照顧她，例如她在早上買了一個飯盒，但吃不完就會留至下午再吃，結果最後忘了吃，晚上就直接帶回家，因為不想浪費她會繼續吃那個飯盒。蕭正楠會跟她解釋飯盒擺放了一日不能再吃，然後會親自下廚煮東西給黃翠如吃；此外黃翠如甚至會一支水飲三日，同樣都要蕭正楠提醒她，隔了一日的水都不可以再飲，幫她倒掉並幫她重新斟另一樽，放入她的開工袋內，因為每逢黃翠如一開工，就會把所有事都會忘記得一乾二淨，蕭正楠睇少眼分分鐘都會出事。

身為無綫當家花旦的黃翠如，出鏡如彩雀，私底下卻甚為「呢啡」，蕭正楠曾經大爆老婆一對襪可以穿幾天才洗，他通常會在黃翠如不知情之下，幫她更換一對乾淨的襪子，平時在家亦經常要執拾她亂放的東西，雖然老婆麻甩又冇手尾，但蕭正楠竟覺得這些事是他們夫妻間的情趣。

老公無限縱容地獄廚神黃翠如

一個願捱一個願打，蕭正楠自認識黃翠如便擔起照顧她的責任，相反黃翠如亦樂於被照顧。對於婚後幸福度倍增，黃翠如曾公開表示與老公蕭正楠沒特別相處之道，只是對方放任她去做自己喜歡的事情：「佢縱我，多過我縱佢，佢從來唔會改變我任何嘢，所以我哋一路嘅相處都好舒服。」有老公縱係就係幸福，不過黃翠如好似永遠都唔識長大，而蕭正楠就當佢女咁湊，遇上忙拍劇日夜顛倒的日子，蕭正楠時刻擔心老婆一日三餐溫飽，開工前會煮定嘢畀佢食，又要確保屋企有足夠的糧餉，38歲人連煮碟雞翼都可以變成黑炭雞翼，難怪蕭正楠如此放心不下。

近月疫情下開工日子大減，蕭正楠本來想放手讓黃翠如體驗生活學習自理，不過成效似乎不太理想，據知情者透露：「翠如自小都係瘦蜢蜢又多病痛，成日都話見暈，仲一啲運動細胞都冇，四肢好似唔協調咁，其實未有疫情阿蕭（蕭正楠）已經成日拉翠如一齊做運動，希望佢唔好咁孱弱，點知郁兩郁佢就頂唔住周身痛，之後疫情殺到就更加冇郁動啦！冇得出街留喺屋企抗炎，阿蕭就日日煮好嘢畀翠如食，真係飯來張口，習慣咗好難改，依家翠如更加依賴個老公。試過阿蕭要開工拍劇，翠如話去街市買定餸煮飯，結果佢買埋啲即食嘢，阿蕭對老婆煮到餐正常飯完全冇期望，間中翠如都有試吓煮，不過佢係真正嘅地獄廚神，阿蕭笑住話食翠如嘅嘢只係為咗生存。」

黃翠如動作片搞唔掂

做主播出身的黃翠如，牙尖嘴利口才了得，由有線過檔無綫八年，主持旅遊節目上位再拍劇做女一，所有角色都係文戲多，動作場面絕無僅有。主要原因是黃翠如天生硬骨頭，莫講話打戲，拉筋都搞唔掂，又怕佢體弱容易受傷，所以近年很少監製敢搵佢拍要打打殺殺的劇集。

黃翠如欠缺自理能力 蕭正楠傳授買餸之道

蕭正楠前年於《萬千星輝頒獎典禮》台上宣布與黃翠如已在新西蘭註冊結婚，又當眾邊咀老婆邊表白：「多謝你令我學識去照顧人，令我學識做個更加好的男人。」好男人一做便兩年，蕭正楠甚為享受做全能老公，黃翠如就繼續依賴，日常生活不能沒有蕭正楠。

黃翠如做人妻唔識煮飯連買餸都搞到一鑊粥，好彩有個入得廚房
的廿四孝老公做她的最強後盾。日前黃翠如出席完新劇《過街英雄》的
宣傳活動，即返回大埔康樂園愛巢會合蕭正楠，二人駕車到大埔太和
邨街市，現場所見，蕭正楠熟晒地頭，師奶上身帶住黃翠如行勻成個
街市，教她如何挑選平靚正海鮮，買了新鮮蜆、蟹、魚之後，又買了
大量丸類及各種打邊爐食材，兩公婆邊行邊商量默契十足，疫情下黃
翠如更慎防錢有毒，把所有買餸錢及找回來的錢都放在一個透明的密
實膠袋內，自理低分王防疫冇甩轆措施仲做足，應該加分。

被催生B例牌回應：順其自然

蕭生蕭太買完餸即返家準備打邊爐撐枱腳，過二人世界雖溫馨，但傳宗接代的使命搞足兩年都未成功，令二人經常被追問生Ｂ問題，為此蕭正楠曾回應：「其實大家都有共識，都希望會發生，但我相信佢首先要暫時放棄佢嘅事業……一切順其自然。」蕭正楠再補充話如果真的生B，他相信需要更加小心，即使黃翠如榮升人母都係甩轆兼求其，樽奶擺三日會再繼續飲，蕭正楠怕BB塊面會變綠色，他相信到時要同時照顧兩個人，責任會更大。唔生B可以有十萬個理由，蕭正楠呢個理由好充份，都係等黃翠如自理能力升呢先再去諗生仔，不過蕭太今年10月已經39歲，蕭生要加速鞭策老婆先得喇！