陳豪疫市咖啡品牌擴展進軍保險界 為愛妻特製女王專屬咖啡
陳豪疫市咖啡品牌擴展
陳豪在劇集《殺手》中，曾說過飲咖啡反映高尚生活品味，他創立的咖啡品牌「Blooms Coffee」，近日與保險合作設立首個精品咖啡專櫃。陳豪不諱言「敢」於嘗試的營商理念：「我敢於創新，努力去讓顧客嘗試每一個可能性，讓他們真真正正去感受精采的每一日。」
為愛妻特製女王專屬咖啡
身為「愛妻號」的陳豪又可有為太太陳茵媺特製「專屬調豆咖啡」呢？陳豪笑說：「哈哈哈，Aimee！She is my Queen！我當然會為她特製專屬調豆咖啡，可以告訴給大家知，她的咖啡一定是世上獨一無二的！」
陳豪疫市繼續有工開做足防疫措施
自今年初新冠肺炎殺入香港，各行各業都步入寒冬，電影同演唱會全面叫停，不少藝人同幕後收入同樣大幅下瀉，要攜手共渡難關，幸好，電視業務稍有運行，無綫連月來就繼續開劇，一班藝人可以繼續有工開。正在趕拍《陀槍師姐2020》的陳豪，在疫情開工拍劇的他亦緊張做足防疫措施，戴口罩雙重保護，在口罩內攝多層紙巾，每拍完一個鏡頭，都緊張戴回口罩，又不停用搓手液搓手相當緊張，慎防有機會把病菌帶返屋企。
簽包薪經理人約 停工繼續每月出幾十萬糧
早前政府頒下「限聚令」，開有咖啡店的陳豪，生意雖受影響，但絕世好老公兼好爸爸，就得上天眷顧成為逆市奇「爸」，商業演出減少卻繼續有錢落袋，與陳豪同拍《陀槍師姐2020》的一班演員如羅仲謙、宣萱、洪永城及鄧佩儀等，就對繼續有高收入的「疫市奇爸」陳豪表現羨慕。據知情者透露：「拍劇開工時間長，大家停機都會圍埋傾偈，成班工作人員都好羨慕阿Mo（陳豪），因為呢排商業活動停晒，大家冇晒搵外快機會，傾開先知阿Mo係無綫最高薪藝人，就算佢拍咗嘅兩套劇，《殺手》同《愛美麗狂想曲》仲未出街，佢都唔使擔心，因為佢簽嘅係包薪經理人約，就算冇工開，一樣個個月出幾十萬糧，相比要靠外快增加收入嘅藝人，真係同人唔同命，大家又點會唔羨慕佢！」
為家人拒絕向外闖 陳豪獨養一家九口 無難度
2018年底，盛傳古天樂與蕭定一分別向陳豪招手，不過，獨力擔起頭家的他，家庭開支不少，為求穩陣就放棄外闖機會，寧願留在無綫穩紮穩打，有指成功以3,000萬同無綫續約。據知情人士透露：「阿Mo形象好，又畀人時尚有品味感覺，咁多年嚟都係廣告客嘅寵兒，有時一星期都出幾個活動，好多唔同層面嘅廣告又畀佢擸晒，為咗留住呢隻金蛋王，無綫都計晒數，阿Mo喺正黃金時間續約，佢咁搵到，當時經濟又好，薪酬特別高，只係佢續約半年左右，香港就遇上政治風波，加上呢幾個月新冠肺炎肆虐，唔止香港，外地同內地啲工作都停晒，咁嘅時勢，佢冇受影響真係行運。」
