炒米茶

坐月炒米茶+上奶炒米茶9款食譜

懷孕前後

廣告

坐月炒米茶是媽媽生產後的必備良品!今胎生二寶坐月,同上胎的確好大分別,上胎都有老公、媽咪、老爺奶奶同工人姐姐幫手,但今胎好多嘢都要一腳踢。疫情之下就連叫媽咪過來幫輕下都要三思,皆因之前同樓有人確診,為保障大家安全同健康,都係親力親為好啲。好彩嘅係有咗第一胎嘅經驗,知道應該點去預備燉湯同坐月炒米茶俾自己。亦感謝媽咪一早幫忙炒定咗啲炒米同黑豆俾我坐月用,藥材方面奶奶都預早幫我打點好。

Pack炒米茶方面就有小JM幫手同我一齊Pack一齊分擔,而JM爸就負責幫我整燉湯坐月飲。媽咪成日都話坐月坐足100日先係最好。上胎我坐月都係坐足100日,所以今胎亦唔例外。

今胎我主張餵母乳,希望可以保持心情放鬆、愉快同盡量多休息以助上奶!

今次小JM媽媽就為大家介紹多款坐月及上奶炒米茶,希望可以為各位人奶媽媽打打氣!

坐月炒米茶 – 媽媽必備良品

九款坐月米茶+上奶米茶
三色坐月炒米茶

三色坐月炒米茶製法:

1. 先洗淨白米、紅米、黑米或糙米,待乾

2. 再用白鑊將米炒約十分鐘至微微金黃即可

*白鑊,即係無任何油鹽糖既調味*

待炒米攤凍之後就可以用器皿盛載,以便日後用來沖「米水」之用,所以建議有時間可以一次過炒定多啲,唔駛要用先炒咁麻煩。

米的功效:

紅米:養心、補血

黑米:補腎

糙米:健脾補脾

媽咪話坐月要飲炒米茶飲足100日,咁自然會想要多啲口味同變化以保持新鮮感,唔駛下下飲埋同一款咁悶呀嘛。

今次坐月都飲過不下八款炒米茶,頭一個月主要以坐月炒米茶為主,第二個月就開始會飲下上奶炒米茶當轉下口味。

九款坐月米茶+上奶米茶
頭一個月主要以坐月炒米茶為主,第二個月就開始會飲下上奶炒米茶當轉下口味。

坐月炒米茶:

第一星期主要以陳皮炒米茶為主。

材料介紹:

陳皮:健脾、行氣,順產開刀都啱飲

圓肉:止血安神、益心脾、補氣血

杞子:補肝腎、益精氣、改善面色、明目安神

南棗:補中益氣、養血安神

黨蔘:補中益氣、健脾益肺

1. 三色炒米 + 陳皮

2. 三色炒米 + 陳皮 + 圓肉 + 杞子

3. 三色炒米 + 陳皮 + 圓肉 + 杞子 + 南棗 + 黨蔘

4. 三色炒米 + 陳皮 + 圓肉 + 杞子 + 北芪

九款坐月米茶+上奶米茶
三色炒米 + 陳皮 + 圓肉 + 杞子 + 北芪

上奶炒米茶:

我由第五星期開始先飲上奶炒米茶。

1. 三色炒米 + 黑豆 + 無花果

九款坐月米茶+上奶米茶
三色炒米 + 黑豆 + 無花果

2. 三色炒米 + 黑豆 + 陳皮 + 黨蔘

3. 三色炒米 + 黑豆 + 通草 + 黨蔘

九款坐月米茶+上奶米茶
三色炒米 + 黑豆 + 通草 + 黨蔘

4. 三色炒米 + 南棗 + 沙蔘

5. 三色炒米 + 陳皮 + 通草 + 南棗

九款坐月米茶+上奶米茶
三色炒米 + 陳皮 + 通草 + 南棗

因為今胎自己坐月,所以會預早包裝好啲炒米茶,方便一包包拎來煲。

九款坐月米茶+上奶米茶
今胎自己坐月,所以會預早包裝好啲炒米茶,方便一包包拎來煲。
九款坐月米茶+上奶米茶
請小幫手一齊Pack炒米茶包,順便當係親子活動啦!

我係臨生二寶前,就已經同小JM一齊Pack咗頭一個月份量嘅坐月炒米茶,到飲到差不多就再請小幫手一齊Pack炒米茶包,順便當係親子活動啦!小JM仲可以從中學識分辨其中一啲材料添,仲知邊啲可以即食~

九款坐月米茶+上奶米茶
圓肉就例牌會被小JM偷食打斧頭。