荔園實景多面睇 究竟點玩先最抵?

荔園實景多面睇 究竟點玩先最抵?

荔園重現香港,講咗成個月,睇來睇去都係啲舊相或者繪圖,聽日6月26日下午6點,荔園終於開幕喇! 開幕前夕,我哋到中環實地採訪,捐窿捐罅,揭開「荔園」真面目。全個荔園共50個景點,包括有16個趣味景點、6項機動遊戲、22個經典遊戲攤位、4間餐廳及2間禮品店,等我哋率先為大家介紹下啦!

現場直擊精華片段

免費位不容錯過
荔園$10個代幣其實一啲都唔平,但勝在可以免費入場,50個景點中有6個唔駛錢,包括荔園城堡、好時光收集箱、xbox one激fun遊園地、小露寶蛋糕、電子哈哈鏡及卡通大尋寶,入去齋影相就最抵。仲有最正嘅免費節目就係荔園大舞台,有「摺盞燈」工作坊、朱咪咪演唱會、爵士舞及小丑表演等,大部分節目都係免費。

16個景點中,最吸睛當然係吸蕉大笨象、滑稽恐龍屋、荔園城堡同小露寶蛋糕,其他如吹漲動物園、百厭滑梯、夏日溜冰場,不過最令人期待都係全場最貴的魔靈小學,唔好講咁多,即刻睇相先。

大笨象
吸蕉大笨象高4米、闊6米,識得眨眼、發聲及肚皮顫抖等動作,餵佢食蕉會噴水及大便!
大笨象1
餵佢食假蕉就得(1個代幣)
恐龍屋
眼神cute咗好多嘅恐龍屋,以前可以入去玩,依家變咗條瀡滑梯。
恐龍屋1
條滑梯高5米,都幾容易瀡。(4個代幣,6歲以下2個代幣)
小露寶
小露寶蛋糕,4層高的蛋糕塔有66個小露寶公仔,慶祝荔園成立66週年,唔駛錢任你影。

下頁:荔園城堡、吹漲動物園、百厭滑梯、夏日溜冰場、魔靈小學

繼續睇下有咩正景點…

城堡
荔園城堡,塔頂保留紅、藍、綠3色設計,大門中央「荔園」二字以紅色霓虹燈展示,一樣唔駛錢任影。
動物園
吹漲動物園,分「非洲森林歷險」、「靈長類動物」、「東南亞動物」、「鱷魚池」及「雀鳥天地」5個園區,有獅子、老虎、3米高大象、4米高長頸鹿、2米高猩猩、灣鱷及揚子鱷等。(4個代幣,6歲以下2個代幣)
滑梯
百厭滑梯高6米,大人小朋友都玩得。(4個代幣)
溜冰場
夏日溜冰場,有長頸鹿、大象、馬及老虎4款溜冰輔助器,唔識溜冰都唔怕跌親!(5個代幣)
魔靈小學
魔靈小學是最場最貴遊樂設施,以香港靈異校園故事為主題,玩家要下載app用「降靈符」收伏校園亡靈。(8個代幣)

下頁:機動遊戲

6項機動遊戲包括淘氣小木馬、快樂叮叮船、翠華咖啡杯、盞鬼碰碰車、鬼馬飛天椅及新巴城巴 <開心列車>。

木馬
大人小朋友都啱玩嘅淘氣小木馬,每節最多36個人。(4個代幣)
叮叮船
快樂叮叮船,船頭設有經典叮叮鐘,每艘可乘坐2名成人或4名小朋友。(4個代幣,6歲以下2個代幣)
碰碰車
盞鬼碰碰車,有12台碰碰車,每輛可載2人。(13歲或以上6個代幣;8至12歲3個幣)
開心列車
新巴城巴 <開心列車>,路軌長度196米,共6卡車箱,每卡可載4人。(2個代幣)

下頁:經典遊戲攤位、快證套票優惠

22個遊戲攤位當中,掟階磚、四色夜光杯、無敵風火輪最為經典,其餘天降傘兵、幪面超人打怪獸、快手夾波子等攤位遊戲都幾懷舊。

掟階磚
經典掟階磚,拋出代幣落在階磚上,並且不「擲界」,可以拎條綠箭cushion返屋企。(1個代幣掟2次)
夜光杯
四色夜光杯,把球投進不同顏色杯內,即可贏取禮物。(2個代幣)
天降傘兵
天降傘兵,傘兵成功降落至顏色區內為之勝出。(2個代幣)
無敵風火輪
無敵風火輪,將手上的UFO環拋出,成功完全套進樽頸內,即有禮物。(3個代幣)
幪面超人打怪獸
幪面超人打怪獸,將手上豆袋擲向怪物,擊中愈多獎品愈吸引。(3個代幣)
逃學威龍
逃學威龍,成功把粉刷掟中人型鐵板上的指定部位,即有獎品。(2個代幣)

快證套票
荔園免費入場但攤位遊戲、機動遊戲等需要使用代幣(每個$10),如果要玩晒都幾重皮,好彩荔園都推出咗套票,重要係快證嗰隻,唔駛排咁隊!價錢好抵玩,二人套票$680,有40個代幣同兩份小禮物,仲可以唔駛排長籠,快玩12項遊樂設施,包括6項機動遊戲(淘氣小木馬、快樂叮叮船、翠華咖啡杯、盞鬼碰碰車、鬼馬飛天椅、新巴城巴<開心列車>)及6個趣味景點(滑稽恐龍屋、吹漲動物園、夏日溜冰場、佻皮城堡、百厭滑梯、魔靈小學)。計過條數,一人$320,每人有20個代幣($200),再用多$120買時間,抵唔抵就見仁見智,不過,快證數量有限,要買趁早,喺正門專屬窗口就可以買到。

荔園
日期:6月26日到9月初(確實日期容後公布)
時間:11am-11pm
地點:香港中環龍和道 9號「中環海濱活動空間」(入口近香港摩天輪)
收費:免費入場 (攤位遊戲、機動遊戲等需要指定數量的遊戲代幣,每個HK$10)

荔園點去?
港鐵:香港站–步行約5分鐘;中環站–步行約10分鐘
天星小輪:由中環碼頭步行約1分鐘
泊車:國際金融中心二期及香港大會堂附近分別設有公眾停車場

撰文:Heidi Lau
攝影:黃大立

更多精選內容