荔園

荔園實景多面睇 究竟點玩先最抵?

親子好去處

廣告

荔園重現香港,講咗成個月,睇來睇去都係啲舊相或者繪圖,聽日6月26日下午6點,荔園終於開幕喇! 開幕前夕,我哋到中環實地採訪,捐窿捐罅,揭開「荔園」真面目。全個荔園共50個景點,包括有16個趣味景點、6項機動遊戲、22個經典遊戲攤位、4間餐廳及2間禮品店,等我哋率先為大家介紹下啦!

現場直擊精華片段
[youtube id=”EbmyHEEcvKs”]

免費位不容錯過
荔園$10個代幣其實一啲都唔平,但勝在可以免費入場,50個景點中有6個唔駛錢,包括荔園城堡、好時光收集箱、xbox one激fun遊園地、小露寶蛋糕、電子哈哈鏡及卡通大尋寶,入去齋影相就最抵。仲有最正嘅免費節目就係荔園大舞台,有「摺盞燈」工作坊、朱咪咪演唱會、爵士舞及小丑表演等,大部分節目都係免費。

16個景點中,最吸睛當然係吸蕉大笨象、滑稽恐龍屋、荔園城堡同小露寶蛋糕,其他如吹漲動物園、百厭滑梯、夏日溜冰場,不過最令人期待都係全場最貴的魔靈小學,唔好講咁多,即刻睇相先。

下頁:機動遊戲

6項機動遊戲包括淘氣小木馬、快樂叮叮船、翠華咖啡杯、盞鬼碰碰車、鬼馬飛天椅及新巴城巴 <開心列車>。

下頁:經典遊戲攤位、快證套票優惠

22個遊戲攤位當中,掟階磚、四色夜光杯、無敵風火輪最為經典,其餘天降傘兵、幪面超人打怪獸、快手夾波子等攤位遊戲都幾懷舊。

快證套票
荔園免費入場但攤位遊戲、機動遊戲等需要使用代幣(每個$10),如果要玩晒都幾重皮,好彩荔園都推出咗套票,重要係快證嗰隻,唔駛排咁隊!價錢好抵玩,二人套票$680,有40個代幣同兩份小禮物,仲可以唔駛排長籠,快玩12項遊樂設施,包括6項機動遊戲(淘氣小木馬、快樂叮叮船、翠華咖啡杯、盞鬼碰碰車、鬼馬飛天椅、新巴城巴<開心列車>)及6個趣味景點(滑稽恐龍屋、吹漲動物園、夏日溜冰場、佻皮城堡、百厭滑梯、魔靈小學)。計過條數,一人$320,每人有20個代幣($200),再用多$120買時間,抵唔抵就見仁見智,不過,快證數量有限,要買趁早,喺正門專屬窗口就可以買到。

荔園
日期:6月26日到9月初(確實日期容後公布)
時間:11am-11pm
地點:香港中環龍和道 9號「中環海濱活動空間」(入口近香港摩天輪)
收費:免費入場 (攤位遊戲、機動遊戲等需要指定數量的遊戲代幣,每個HK$10)

荔園點去?
港鐵:香港站–步行約5分鐘;中環站–步行約10分鐘
天星小輪:由中環碼頭步行約1分鐘
泊車:國際金融中心二期及香港大會堂附近分別設有公眾停車場

撰文:Heidi Lau
攝影:黃大立