張致恒老婆被嘲學歷低唔識教仔 網民：唔識避孕連累下一代

撰文：Clara | 資料及圖片來源：雯雯instagram、張致恒instagram

張致恒去年宣布奉子成婚後捲入桃色風波，被揭發一腳踏幾船，被一班受害女仔鬧爆。後來張致恒於社交平台道歉，最終形象插水，演藝工作大受影響。早前張致恒為了養家做過廚房炒散、兼職經紀，如今成為一名YouTuber。空餘時間，張致恒負責煮飯、做家務，同湊住兩個囝囝張天寶、張生牧，又常常大曬幸福全家幅，努力從賤男洗底變顧家男形象。

網民對雯雯窮追猛打

惟雯雯近日因為腦中思考太多事而失眠，於是她在instagram動態大玩「你問我答」，希望同網民談天、互動。當中有網民批評雯雯：「你講到大細仔出世係連累佢哋，你做人沒計劃嗎？不懂避孕嗎？」，雯雯就表示有很多事情都無法預知：「其實好多事情，冇人會預知一樣嘢，當我決定帶佢黎呢個世界嘅時候，當然我唔會預計到會發生咁多我不知情的事情」有網民嘲笑她學歷低：「你學歷咁低有冇諗過點樣教小朋友呀遲啲？例如中學？」雯雯就大方回應，承認自己雖然可能無法教授書本上的知識，但可以教兒子內心修養：「書本嘅嘢我教唔到，可以搵補習，至少我可以肯定答你，我可以教到佢哋做一個善良嘅人。」

另外，有網民很關心張致恒是否能否撐起一家四口的生活使費，問雯雯：「冇錢嘅愛情，係咪真係維持到？」雯雯就指自己打從一開始就沒要求另一半是否有錢人：「如果你選擇男人，要求佢好有錢佢又係一個好窮嘅人，當然會維持唔到，結論係每個人需要嘅嘢都唔同。」有網友問到如果張致恒再偷食，雯雯會否埋兩個囝囝離開，她迴避問題：「呢個問題，我只會同自己同兩個仔交代」。

兩子之母雯雯高EQ回應

其實雯雯前後答了幾十個問題，即使面對網民不友善的態度，她也沒有反鬧對方，非常高EQ同有耐性。有網民就讚她態度成熟，好奇問她的年齡，她大爆自己91年出世，僅29歲就成為兩子之母，坦言一點也不成熟，也有脆弱的一面，只是因為為母則強：「做咗兩個小朋友媽媽，就只可以堅強，我一定會繼續努力學習去做一個媽媽」，被問到會否再生多個BB，雯雯坦言想生個女，不過現在並非合適的時候。

不離不棄兼力撐張致恒

雯雯一直都是很高EQ的人， 早前她在instagram動態玩「你問我答」時，有網民重提張致恒出軌舊事:「你點忍受佢當初有正印，仲同佢一齊？」又問雯雯如何包容老公，當時雯雯表示：「要睇你本身有幾愛呢個男人，同埋同得呢個男人生小朋友，就有責任畀一個完整家庭小朋友。」有網民指張致恒不定性，不明白為何雯雯要再生仔，問她會否覺得對個仔不公平，雯雯反駁指囝囝現在好幸福：「你又知我老公依家冇改變、好唔定性？我諗我個仔會答你，佢依家好幸福，亦好愛佢爸爸。」

總之雯雯每次回答都會為張致恒護航，不離不棄，張致恒真的要好好珍惜她！