新一代小朋友鍾意玩手機、iPad,減少了閱讀,但書中自有黃金屋,陳芷菁自女兒一歲起,便利用圖書與女兒溝通,灌輸人生道理,慢慢女兒都愛上閱讀,書不離手,
她希望將快樂閱讀的風氣,推廣給其他家長及小朋友。

閱讀建橋樑 陳芷菁教女講道理

育兒

廣告

金牌司儀陳芷菁予人一種女強人感覺,教導家中12歲的女兒張珈瑋(Antonia),也是嚴母一名,那種嚴厲並非怪獸惡媽,而是嚴謹教育、好好保護女兒那種,芷菁為了保護她,不會公開女兒現貌,但樂於分享對女兒的教育之道。 為人母親後,芷菁不斷進修做個好榜樣,除了幕前工作外,另具備認可的Mind Mapping、 Memory Reading、Personal Trainer及皮紋分析師等認證,幫到自己,亦幫到女兒。口才了得的她,自女兒出世後已不停與女兒說話,分享每日所想,之後透過講故事、講人生道理,令女兒也變成一個理性、愛講道理之人,兩人有商有量,令芷菁更了解女兒所想。

講故事有助小一面試

陳芷菁與大狀丈夫張錦榮2003年結婚,同年誕下女兒Antonia,芷菁原本覺得自己身體欠佳,沒想過有機會懷孕,結果在沙士年上天賜她一個女兒,故她對女兒非常愛惜。芷菁對女兒教育嚴謹,但非虎媽式栽培,重點利用圖書建立溝通橋樑。「佢喺手抱時期我已經不停同佢講嘢,講我自己或者我對每一件事嘅感受,到佢歲幾坐得定,我就開始攞圖書俾佢睇,因為圖書嘅顏色可以刺激到細路仔嘅視覺同感受。另外你演繹童話故事時,佢會好鍾意聽,可能由細開始我就不停用故事書解釋原因同做法,依家佢會自動自覺搵書睇。」

從小培養閱讀習慣,對小一面試都有幫助,毋須參加洗腦式面試班,芷菁解釋:「透過講故事,你可以問番細路仔你點睇呀?可以講番俾我聽,如果係你會點做呀?個結局會唔會改變呢?你點睇啲角色呢?可以recall番佢嘅記憶。原來依家好多學校都係咁,你自細培訓佢有好嘅記憶同表達感受,係好重要。」近年她積極推動親子講故事,開班授課之餘,近日亦擔任了領匯童話故事演講比賽評判,親自給予孩子意見。

糾正英文朗讀技巧

Antonia已經12歲大,不再是床邊聽故事的小女孩,母女轉換了方式交流,變成閱讀分享會,「依家我會俾一啲書佢睇,我話媽咪覺得呢本書好好睇呀!不如你睇完我哋傾吓,睇吓你又鍾唔鍾意吖!有時佢睇到一啲書話好好睇,會問番我有冇睇過,不如你都睇吓吖!」
閱讀有閱有讀,睇完書後,更可透過朗讀去訓練口才,「我唔會教佢去演繹,除非有時佢要做presentation,我會教佢做Cue card,唔好死背,當你投入咗文字,你就唔會驚,我做司儀都係,你係想話俾觀眾聽你讀過嘅嘢嘛,你就要消化咗先。」
書中有汪洋字海,芷菁亦借機會教好女兒英文,尤其是糾正朗讀技巧,「我會叫佢讀英文俾我聽,教佢去到full stop (.)你要停,去到comma (,)點解你要停頓少少呢?同埋語氣位你覺得咁樣讀係咪好聽啲呢?我會將順讀同有感情去讀,分別俾佢聽,教過兩三次之後就唔使教喇,佢已經掌握到。」

阿女跟父母出街嫌悶

Antonia或多或少都有遺傳父母口才,媽媽是金牌司儀,爸爸是大狀,惟她不喜歡在人前表演,即使喜歡說話、唱歌、跳舞。芷菁覺得女兒遺傳最多是她講道理的性格,叫父母做一件事前,都要先講一輪道理,「例如佢會話:『我唔想同你哋出街,因為你哋同uncle傾偈,個內容唔係我呢個年紀啱聽,有冇諗過我會好悶㗎?有冇諗過我嘅感受㗎?』佢呢個方式我好接受,唔係就咁話『好悶呀,唔想同你哋出去!』」

芷菁自小都是講道理式教女,Antonia只是潛移默化學足阿媽,「由細到大我唔俾佢做一啲事,好似唔俾佢食煎炸嘢、junk food,我會解釋點解唔食得,甚至我會搵資料俾佢睇,例如油不停再翻炸,係有機會致癌,我係幾煩嘅!就算食糖會蛀牙,我都搵晒爛牙嘅相佢睇,所以依家佢對待我,一樣都係咁!」

IB貼近社會需求

習慣了閱讀、搜集資料及講道理,正正可以活用在學業上。Antonia自K3起讀國際學校IB課程(International Baccalaureate,國際文憑課程),芷菁回想當初決定有點冒險,現在覺得行啱路,「佢冇本地學校紮實根基,本地學校學好多生字,亦好多默書測驗,你會知道佢去到咩standard。但我做過一啲調查後,其實全球有好多間學校行IB system,同埋我鍾意IB嘅方式好統一,喺世界各地讀緊邊間IB學校,去到外國已經知道你咩standard。」

IB課程着重訓練學生的理解能力及邏輯思維,多projects,貼近社會需求,「佢六年班嘅畢業功課係做展覽,題目係《中國貧窮情況》,佢要搵晒相同資料解釋中國貧困情況同香港分別,另要做一個模型勞作反映一個貧窮家庭,仲有接受其他學校同家長來參觀答問題,我覺得好厲害!好多大公司都係做緊呢啲嘢,我覺得佢哋教育比較融入社會。」

想讀IB睇兩大點

IB在港愈來愈普及,近年不少傳統學校也相繼開辦課程,更出產多名IB狀元,出國前途一片光明,令不少家長對IB趨之若鶩。芷菁以過來人身份教路,家長要認清兩大點才決定仔女是否適合讀IB。「第一係睇小朋友性格,佢容唔容易抵受壓力,同埋佢性格係好自由,定係肯坐定定等你俾壓力佢、被你管束;第二係睇父母性格,我喺國際學校都遇到有家長問點解冇功課、冇測驗,點解有錯字唔改?你要問吓自己接唔接受到,唔係本地學校會俾到你嘅結果,如果你係想學校好準確話你聽學到邊,當你都搞唔清自己要求時,你係決定唔到小朋友讀邊間。」

好多家長有錯覺以為,IB比傳統學校輕鬆易讀,因為少功課,其實IB將會愈來愈難讀,因為考試沒有固定答案,課程亦會因應社會發展而調節,芷菁覺得如果小朋友喜歡按guideline讀書,應選讀本地課程,相反可以一試IB課程。

女兒讀到小三時,芷菁受到她開心讀IB啟發,創辦了一間活學活用的創意教育中心,並及早為孩子發掘多一個技能,故相繼開辦時裝設計、首飾製作、創意漫畫班等等。一向喜歡藝術的Antonia,都有參加時裝設計班,「佢係咪畫畫好靚呢,我覺得佢係比較獨特,唔可以用一般審美眼光睇,我尊重佢鍾意嘅嘢。」她愈學愈喜歡時裝設計,但沒打算做設計師,「佢話或者可以做fashion magazine呢?佢鍾意嘅嘢,我都會俾佢試,佢唔鍾意嘅,唔會因為我鍾意而迫佢做,我要尊重每個人嘅才華同喜好。」

三大講故事好書

家長講故事絕不能hea講,與孩子互動亦好重要,家長首先要提起精神,另外要注意聲線,投入角色。洋洋書海要揀本啱講的書,新手父母都會感到困難,芷菁推介了三本易睇易講,亦包含易明人生道理的故事書,非常適合新手父母,即入短片參考其推介!

●撰文:Ling
●攝影:黃大立(部分相片由受訪者提供)
●場地: 甲一創意教育(tel: 2388 5998)