索媽陳爽：囝囝鍾意睇靚女
##embed-label-0##
前華姐陳爽去年一索得男，可愛囝囝Adrian（梁駿彥）轉眼十個月大。爽爽產後極速修身，唯獨上圍升cup，被大讚索爆人妻！初期她亦面對奶水不足問題，現經營海味店的她試驗谷奶進補配方後，發現白花膠湯能即時上奶，效果一流！坐月後她覺得身體像重生一樣，體能比以前強壯，建議媽媽們坐月一定要坐得好！
Adrian兩個月大已懂得欣賞媽媽的美，有日睡在床上，眼甘甘望實媽媽一個鐘，爽爽甜笑說：「佢用好神奇嘅眼神望住我，好似成世未見過靚女咁，佢一路望住我微微笑，嗰種感覺我係從未感受過，老公都唔會咁樣。」
囝囝最冧李亞男
囝囝是媽媽的前世情人，Adrian自出世就好黐媽媽，氹得媽媽好冧豬，不過男仔始終較活躍，Adrian愈大愈百厭，起身不再望媽媽，一支箭爬出去玩，「冇晒細細個好sweetheart嘅感覺喇。」
囝囝不再冧媽媽，可能因為眼界擴闊了，爽爽有班華姐好姊妹，個個樣靚身材正，她笑謂囝囝最喜歡李亞男，「囝囝唔怕生保，之前五個月大邊個抱都得，依家淨係俾靚女抱，有日朱璇同Leanne（李亞男）嚟探我哋，兩個都爭住抱佢，跟住佢就衝去Leanne嗰度，佢真係識揀呀！有次劉俐（藍莓）嚟我屋企，囝囝淨係望住佢，劉俐話佢發生咩事呀，哈哈！」
未識行先追女
這班靚姐姐只可遠觀，將來搵女友最好搵個啱年紀，小小的Adrian返playgroup，已經開始撩女仔，爽爽笑說：「喺playgroup佢鍾意女仔多過男仔，有次無端端爬過去抱女仔！都未識行，已經喺度媾女？可能佢想表達鍾意一樣嘢，熱情咗啲，不過人哋冇睬佢。」小朋友一般3歲懂得分辨兩性有別，現今小孩愈來愈早熟，爽爽或有需要提早展開兩性教育！
爽爽現時讓他返兩間不同類型playgroup，看看他的學習進度，再決定行本地或國際學校路線。一間以英語教學、玩遊戲為主；一間中英教學、講古仔，着重紀律訓練，因Adrian性格活躍難以坐定定，坐一會就四圍爬，老師要訓練他坐好，不能隨便爬向女同學抱抱！
白花膠谷奶最有效
爽爽產後帶了囝囝去過峇里島及宿霧等地旅行，穿上泳裝大晒產後索爆身段，她透露keep fit過程絕不容易，雖然懷孕期間只重了13公斤，但坐月不斷進食令磅數飆升，之後要靠清淡飲食及積極做機，才回復苗條身段，加上產後谷奶，身材比之前更有睇頭！
坐月雖然好易肥，但非補不可，有助恢復體力及促進血液循環，「我推介冬蟲夏草，有助加強個人體能同免疫力，其次就係海參，可以幫助腦部發展，另外仲有燕窩，幫助人嘅機能，同埋皮膚細膩啲。」
眾所周知餵母乳對BB健康最好，但好多媽媽不夠奶水，又不想太快轉用奶粉，爽爽坦言自己奶量也是剛剛好，因Adrian比較大食，出世未夠一個月已日食一公升，需急忙尋找谷奶方法，試過多種補品後，發現白花膠最有效。「食完幾個鐘後即增加50%奶量，嘩寶貝呀！不過keep住食效果未必咁好，邊日追奶辛苦先食，大約一星期食一兩次就夠。」
補品大多所費不菲，惟白花膠價錢相宜，5,000多元有100塊，平均50元一塊，每次煲湯落兩塊，「當然大塊質量同口感好啲，但細都有用，呢種魚係有啲功效。」如果想再慳一點，她推介「章魚木瓜湯」，一樣有谷奶效果！
六個月大Adrian就斷奶，改食粥仔，爽爽有加少許海參入粥仔中，「海參零膽固醇同零脂肪，仲有好多氨基酸，可以幫助BB腦部發展。」不過小朋友並非能承受各種補品，例如冬蟲夏草這類大補品只適宜體弱人士，小朋友應以自然為主。
陳爽坐月六寶
蟲草：具調節內分泌、抗菌消炎、氣血雙補及滋陰養顏等作用，助產婦恢復元氣。
燕窩：滋陰補肺、合中開胃、緩解勞累，助產後恢復苗條，減少妊娠斑，抑制產後色素，更令乳汁營養豐富，提高BB免疫力、智力及皮膚細嫩程度。
高麗參/花旗參：高麗參含34種人參皂苷成分，有益智健腦、防癌抗菌、增強免疫力、抗氧抗衰老、補元氣及美容等功效，亦可從母乳傳給BB。但高麗參藥性屬燥熱，配上下火安神補氣補血的頂級野生花旗參使用為佳。
花膠/海參：野生白花膠加快骨膠原更新，提升母乳產量及質素。而海參含多種維生素及氨基酸，有助媽媽體質恢復及BB腦部發展。
神奇上奶白花膠湯
材料：
100頭白花膠 4-6塊
淮山 1-2條
杞子 20-30粒
圓肉 8-10粒
陳皮 1塊
紅棗 4-5粒
黨參 1-2條切細
去皮雞胸肉 1件
放入二人分量燉盅
（容量約600ml）
做法：白花膠浸開水一晚，毋須泡發，清洗乾淨後即可清燉；放入淮山、杞子、圓肉、陳皮、紅棗、黨參及去皮雞胸肉，大概燉半小時便可。
產後每星期燉白花膠湯一至兩次，第一胎產後四小時就上奶，到第十天日產一公升以上。想聽爽爽教你更多谷奶良方，即刻去片學吓！
講國語男人有魅力
來自中國東北的爽爽，與囝囝日常對答以普通話為主，老公梁梓軒講英文，廣東話就讓他慢慢從生活及校園中學習，爽爽覺得她的母語很有魅力，講國語的男人能打動她，「我覺得男仔講國語好charming！」全中國男人都好charming？「要冇口音，台灣嗰種我好鍾意，好溫柔好冧呀！東北話都好man，有啲特定詞語，好似『男人』，東北人會講『老爺兒們』，好有霸氣，好正呀！」有霸氣唔夠，要有腦才吸引到她，老公就正合心意！至於灌輸囝囝的普通話，就是標準國語加少少東北話，希望他將來又charm又帶點霸氣！
識講仲要識寫，爽爽希望囝囝學好中文，多看中文書認識國家古今文化，「如果佢成個鬼仔咁，會學少好多知識，雖然依家啲人少睇書，多數上網睇facebook、微訊、微博，我覺得facebook就多人share生活旅行相，而微博就較多文章，會有詩詞、故事轉發，雖然唔係好長，但都吸收到好多優美文字，我希望佢都可以咁。」
想囝囝長命啲
一向溫柔的爽爽，為人母親後變得更溫和，對人顯得有耐性及寬容，為了囝囝安全，對身邊事物亦提高警覺，「之前電梯事件（內地母親捲入電梯亡）好慘，個心好stressed，如果發生喺自己身上會點呢？媽媽本能都會咁做，一定保護小朋友先。」連近日「鉛水事件」，自己屋苑不在鉛水名單，她也搶購蒸餾水飲用以防萬一，「新聞一出我就去超市買水，依家開始長期訂水，為咗小朋友同家人健康，做足防範。」
對於囝囝期望，爽爽簡單直接：「老公話想佢做個對社會有貢獻嘅人，使乜講到咁大呀？我淨係想佢健康，長命過我就得！」
