胎盤前置高危 梁政珏剖白 堅信會母子平安

胎盤前置高危 梁政珏剖白 堅信會母子平安

2_229K_family
兩夫婦都認為生BB一定要非常恩愛才能做到,Jeanette慶幸今次有丈夫全力支持,才能安穩養胎,「住院期間心情好不穩,瞓唔到食唔落,又成日喊,老公每日跑來跑去照顧我飲食,連佢都病咗無數次,擔心我之餘仲要返工忙到一頭煙,我諗佢對我嘅支持係beyond love。」

丈夫 何思源 John

34歲「咪神」梁政珏(Jeanette),今年一月低調嫁飲食界商人何思源(John),立即一索得男,預產期11月初。不過Jeanette陀B以來一直寢食難安,其胎盤前置(Placenta Previa)問題,已達最嚴重的第四期,程度比台灣藝人徐若僅輕一點。
懷孕廿多周時,本刊與Jeanette已相約訪問,到27周她在家中休息期間,下體忽然見紅急送醫院,足足住院整個星期,筆者亦一直緊貼其情況。出院後她每日留在家中,出入醫院需坐輪椅,現時已留院待產,情況穩定。雖然陀B過程艱鉅,但樂觀的她覺得這是BB給予的考驗,相信母子一定會平安。「其實過去八個月, BB係我嘅老師,本來我冇乜耐性,係佢教識我做人要有耐性,我相信我哋一定會冇事。」

4_229K_family
今年一月Jeanette低調下嫁飲食界商人John,婚後立即造人成功。
5_229K_family
「無綫咪神」嫁人後收起性感,專心相夫教子。
6_229K_family
懷孕初期她一直胃口欠佳,約五個月後才開始正常飲食。

提早至37周剖腹

訪問當日在梁政珏寓所附近進行,她精神尚好,出入全程由丈夫攙扶,小心翼翼。她撐着肚子接受訪問,希望把今次的陀B經歷與同路媽咪分享。
「27周喺屋企見紅嗰日,當時唔係緊張、唔係驚,但嗰個星期瞓得唔好。懷孕初期我嘔得好犀利,頭五個月冇乜出街,成日暈暈吓食唔到好多嘢,到六個月就擔心,我冇準備過買BB衫同用品,所以嗰個星期突然間freak out(驚慌)!如果我準備唔切點算呀?日日喺屋企諗呢啲嘢。」
懷孕初期,Jeanette的孕吐情況嚴重,試過嘔足一整日食不下,頭四個半月最少要睡13小時,晚飯前已經撐不住入睡,「我每日一定準時5:58am起身,瞓醒就係暈船浪咁,暈咗四個半月。我一直只食水果同乳酪,試過因為聞到煮早餐嘅味道,匿喺房一日一夜,冇食嘢只係嘔,又試過約咗老公買碗碟廚具,一上車就瞓,去到目的地覺得條街好臭落唔到車,又繼續瞓,返到屋企唔記得自己喺邊。呢段時間因為唔舒服好少講嘢,老公應該覺得我好奇怪、好寂寞又好擔心,每日同一個淨係識嘔同瞓嘅啞巴生活,心裏面覺得好對佢唔住。」

原本她打算到英國產子,連梁爸爸也為她去了倫敦一趟見醫生,參觀醫院設施,香港醫生當時已懷疑她有胎盤前置第四期問題,就在準備好一切,包括醫生、醫院、陪月機票及BB用品之時,就出事入院了,最後醫生不建議乘飛機,為安全計決定留港,並由11月預產期提前至10月下旬剖腹,希望撐到37周,比徐若瑄的32周長。「37周開刀唔算早產,已經好成熟,肺部已經好強壯,早過36周就會擔心啲。」

3_229K_family

胎盤前置知多啲

胎盤前置指胎盤在子宮的下半部分,程度分一至四期,第四期最嚴重,正常胎盤的邊緣距離子宮頸五厘米以上,但隨着胎盤愈來愈接近子宮頸,胎盤前置的程度會愈來愈嚴重。第四期屬於整個胎盤蓋住子宮頸,子宮頸在胎盤的中間,在生產時有大機會出血,亦難以順產。孕婦如有胎盤前置,產前要多留意有否出血,如出血需盡快入院。

胎盤前置沒法預防,需定期作詳細檢查,但孕婦不一定透過臥床休息或針藥控制情況,在20周照結構性超聲波發現胎盤前置很常見,不過當中八至九成孕婦在懷孕後期,胎盤會慢慢往上升轉為正常,孕婦毋須過分擔心。

7b_229K_family
Jeanette坦言過去八個月,腹中的「人生老師」Johnson Ho一直偷偷地教育她,令她練得堅忍、有耐性,「我為自己嘅覺悟感到高興。」

斥私院欠監管

胎盤前置具高風險,大多成因不明,今次Jeanette的情況純粹巧合,精子與卵子在不理想的位置着床,並非如報道所指因為天生子宮後屈。一般來說,在26至28周見紅屬普遍現象,胎盤等如嬰兒的營養包,換言之也是血液所在位置,最差情況會出現血崩、胎盤撕裂,危害母子生命。故現時她會一直留院待產,接受觀察。

因為公院設施較完善,故選擇了公院留醫,就住院問題,她亦有感而發,「醫管局真係應該監管私營醫院嘅設備,例如嬰兒深切治療部NICU,公院NICU使用率已達160%,私院本來有紓緩公院嘅作用,但醫管局冇要求私院幫手不特止,而且將95%要執手尾嘅嬰兒送去公院。八間公立NICU仲爭50個護士,但養和三年前用咗保守估計八億去擴建,之後多咗800個床位去做生意,NICU點貴都唔使一億啩?」

10_229K_family
很多父母對下一代充滿期望,但兩人不希望因而給予兒子壓力,令他的成長不開心,「我哋唔應該批評孩子破壞佢自尊心,應該學習聆聽佢哋心聲,培養佢哋成為有自信嘅人。」
8_229K_family
七夕時收到老公送贈一部胎教機,住院都能教育BB,刺激其腦部發展。

囝囝是我的老師

Jeanette一直行動不便,連上廁所、從地上執拾物品都需要別人幫忙,令急性子的她顯得無能為力,但她一直堅信自己與BB會挺得過去。「其實我從來都冇負面諗法,醫生一直好擔心我嘅情緒,有搵專家同我傾偈,佢好似好擔心我會擔心小朋友嘅生命,但我就不斷同佢講,冇啊,我從來都冇思考過呢個問題,因為我相信我哋最終會無事。」
兩母子經歷了一個大考驗,她急不及待想與囝囝分享,讓他知道他的出現改變了媽咪。「我知道呢個係小朋友俾我嘅考驗,佢好似我嘅老師,我個人好心急,成日想準備BB嘢,或者自己行動不便好多嘢做唔到,有時跌咗啲嘢,冇人幫我執就byebye,或者喺屋企臥床嘅時候,想去洗手間又個個瞓晒覺,就會覺得無助……係佢教識我要耐性啲做人,將來佢出世我好想話俾佢聽,以前媽咪本來唔夠耐性㗎,係因為你嚟到教識咗媽咪。」

11_229K_family
休養期間Jeanette經常閱讀育兒文章,去思考將來的育兒方向,「不能否認知識決定命運,大家都有同年紀父母,點解一個做醫生,一個做廢青?父母花時間心血栽培、學校提供知識,就係孩子將來嘅命運。有一日John又教我︰孩兒自有孩兒福,叫我放心,做人最緊要開心。」

沒被嚇怕想再追女

Jeanette一直以來未至於好恨有B,但中學時期每年暑假都會到兒童院、保良局等機構做義工,亦曾修讀有關兒童發展的課程,直到家姐誕女後,開始渴望有自己小孩。「直到遇到John,就知道佢就係孩子嘅爸爸,所以能夠如願喺雙春閏月做馬年新娘,而且結婚後酒都未擺就馬上懷孕,我點能夠埋怨自己辛苦呢?其實每人成長都有經歷,呢個考驗肯定係暫時性,我覺得自己最幸福,依家根本係我人生最快樂嘅時候。」
所以今次懷孕經歷未有嚇怕她,希能盡快追多個女,湊成一個「好」字。「生一個好悶,驚佢太自我中心,唔識同人分享。其實我好恨生女,家姐都生咗兩個女,原本由細到大我冇恨生BB,亦都冇好似其他女仔咁,讀完書做兩年嘢就想結婚,婚後幾多年就生BB,好多女仔心目中有個plan,但我一路都冇,直至見到家姐大女,覺得佢好得意呀!睇其他BB都覺得好得意,但唔會想要,但家姐個女就唔同,當正佢係自己個女咁,我希望自己仲可以生到個女。」

她亦有感自己年紀漸長,再不趕快生多個就沒精力與小朋友玩,而且高齡產婦易出問題,有仔應該趁嫩生。「有啲美國人鍾意19歲就生BB,因為佢哋想同小朋友年紀近啲,但我唔算好近,我驚我冇精力同佢哋玩咁多,唔想佢哋覺得寂寞。」

14_229K_family
Jeanette其實不喜歡住院的孤單感覺,令她難以入睡,但現在都要乖乖留院養胎。
13_229K_family
John生日要在醫院與老婆慶祝,還為她奔波準備食物及生活用品,非常體貼。

擇日剖腹為兒子鋪路

「贏在起跑線」是很多家長的心願,Jeanette以前都不喜歡怪獸家長,但將為人母後,深深明白到媽媽的想法,怪獸家長都是千方百計為孩子計劃最好的未來。「唔為孩子打算先係怪獸,等於我會搵算命師傅為BB擇好日子開刀,我一直認為喺好時辰出世就唔怕啦,呢個係我最小能為個仔安排嘅。我好難想像將來嘅安排,但需要搵個平衡,凡事唔好太極端,身教就係對孩子最直接嘅教育,我比較注重德育品德,再好嘅學校都有壞學生,再壞嘅學校都有好學生,最緊要教識孩子分辨是非黑白,做個大大方方嘅人。」

●撰文:Ling
●攝影:Paul Choi(部分相片由受訪者提供)

更多精選內容