萬聖節

萬聖節 去呢度!全港3大Halloween派對

親子好去處

廣告

每年一到9月,香港兩大主題公園就會開始宣傳 萬聖節 主題活動,海洋公園一如往年sell驚嚇,迪士尼玩恐怖傳說,仲有個已經連續4年舉辦過 萬聖節 免費鬼屋活動嘅樂富廣場,今年大玩心理戰!咁到底邊個好玩?邊個啱你玩?今次有圖有片有真相,試玩晒3個Halloween派對俾你睇!

海洋公園「8間鬼屋,10種體驗」

每年哈囉喂的必去熱點,當然唔少得 海洋公園 !適逢今年十五周年,梗係要搞搞新意思!除咗有「H15」極端恐怖鬼屋之外,今年最特別嘅係「8間鬼屋.10種體驗」,朝早刺激好玩,但一入夜就變得好恐怖,總之由「合家歡」到「嚇你一驚」都應有盡有。立即去晒咁多間鬼屋睇吓先!

「十五年驚異回魂」 匯集歷年最驚嚇場景

驚嚇度 ★★★★☆
值得排隊指數 ★★★★☆

海洋公園 今年特別將過往十四年的驚嚇場景集結,全部放入呢個「十五年驚異回魂」鬼屋,屋內每一間房都是依照當年最驚嚇主題打造,包括有2008年「厲鬼村」猛鬼電梯、2009年的13號差館、2012年「鬼魅冥婚大殿」的心寒婚禮等等,幕幕都令人膽戰心驚!

去片!

下頁有:甜心蘿莉大宅 日夜極端驚嚇

日夜不同體驗 甜心蘿莉大宅

驚嚇度 ★★☆☆☆
值得排隊指數 ★★★☆☆

今 年「海洋公園哈囉喂全日祭2015」和上年一樣,繼續有日夜鬼屋大變身,好似這個甜心蘿莉大宅,白天大宅內的蘿莉會化妝扮靚和大家玩自拍影相,相片可以在 ASUS的Facebook下載返,仲有機會贏手機o添。日頭屋內燈火通明,人物都係行可愛路線,笑臉迎人,小朋友一齊入來玩都唔驚!不過這個大宅到了夜 晚,同一個地方變得伸手不見五指,一眾美少女亦變成邪惡蘿莉,樣貌恐怖,隨時嚇你一跳。

逃出陰屍路 現實版Walking Dead

驚嚇度 ★★★★☆
值得排隊指數 ★★★★☆

呢間鬼屋唔玩鬼玩喪屍!有睇過美國劇集《The Walking Dead》嘅粉絲一定唔會對呢間鬼屋嘅場景感到陌生啦!鬼屋設計同劇集大綱一樣,由警察局走到巴士逃走,之後喪屍圍城、小鎮監獄等一幕幕似曾相識嘅場景,非常迫真!

下頁有:最恐怖鬼屋H15

「H15」終極驚嚇

驚嚇度 ★★★★★(好恐怖!好恐怖!連係旁邊跟住嘅小編都覺得好恐怖…)
值得排隊指數☆☆☆☆☆( H15 所有死亡籌都只設網上預約,唔洗排隊㗎!)

今年海洋公園繼續有「H」字頭鬼屋!上年「H14」以瘋人院做主題,玩前仲要簽生死狀,而今年的「H15」同樣只限一個人玩,主題就變咗更恐怖嘅死亡之旅! 一入到去會有專人幫你影車頭相,之後會出現喺你嘅靈堂入面,上面仲寫住「昊靝罔極」,老老實實,真係好大吉利是,如果唔係過咗農曆7月,真係唔多敢玩!

睇片啦!

想知佢係入面經歷咗啲咩?Click入嚟睇啦!

 

「H15」預約網址:http://h15.oceanpark.com.hk

*最後一輪「死亡籌」將於9月25日中午12時起接受網上登記
*不設walkin

下頁有充氣競技賽鬼屋

「生化突變大暴走」 戶外充氣競技賽

驚嚇度:一啲都唔驚
值得排隊指數 ★★☆☆☆

橫睇掂睇,「生化突變大暴走」都唔似一間鬼屋喎!今年 海洋公園 搞搞新意思,首度引入充氣障礙賽道「生化突變大暴走」,屬於一家大細都啱玩嘅戶外遊樂設施,唔好睇佢好似好簡單咁啊!其實場內機關處處,唔知要跌幾多次先去到終點!一到夜晚,呢到就會變身成恐怖版嘅「異種突襲大屠亡」,不過基於安全問題,現場的嘩鬼演員只會匿埋喺一角嚇你!要玩就記住唔好著裙啦!

去片!

 

魔偶凶靈工坊 恐怖洋娃娃

驚嚇度:★★★☆☆
值得排隊指數 ★★★☆☆

布偶原本係小朋友好鍾意玩嘅玩具,但係呢到真係好令人心寒……呢間鬼屋以木偶師工作坊為背景,屋內有好多染血玩具同公仔佈置,耳邊不斷傳出:「唔好走啦!陪我玩啦!」嘩!真係毛管戙!

下頁有:2大兒童王國

小南瓜糖果遊 小兒科Trick or Treat

驚嚇度:一啲都唔驚
值得排隊指數 ★★☆☆☆

自從海洋公園哈囉喂實行全日祭之後,除了大人嚇餐死之外,園區都開始照顧小朋友的Halloween體驗,行可愛路線迎合不同人,就好似海濱廣場內的小南瓜糖果遊,並非一間鬼屋而係一堆戶外攤位遊戲,大人和小朋友一齊行,沿途有打扮趣乖可愛的南瓜姐姐同大家合照兼玩遊戲送小禮物,贏o左就可以拎糖果,似兒童王國多過鬼屋。

多啦A夢哈囉喂影城 合家歡影相派對

驚嚇度:一啲都唔驚
值得排隊指數 ★★☆☆☆

同上年一樣,今年多啦A夢又嚟咗海洋公園!整個影城內外都以萬聖節的裝扮的多啦A夢、大雄、小夫、胖虎與靜香等角色,小朋友可以來到這個製片廠來拍攝屬於自己的電影。另外,影城區還有幫小朋友準備一些可以玩樂的遊戲設施。

「海洋公園 哈囉喂 全日祭2015」詳情

日期:2015年10月2日-11月1日
時間:10am-11pm(周末及公眾假期);10:30am-11pm(平日)
普通票價:成人$345;3-11歲小童$173
哈囉喂 優越門票:成人$690;小童(3-11歲)$345

下頁有:迪士尼黑色世界3詭城

迪士尼黑色世界 勇闖詭城

今年迪士尼同往年唔同,之前係部分園區設有鬼屋,不過今年就變成詭城,仲要遍佈三個園區。呢個十月,一到指定日子的晚上,迪士尼樂園就化身成詭影處處的黑色世界, 充滿童真嘅地方立即變得好陰森!

迷離莊園 白色恐怖

驚嚇度:★★★☆☆

詭影迷離莊園有一道時空裂縫令困於迷離大宅的怨魂邪靈,一班高貴淑女在莊園裡跌蕩游離。而這群亡靈都是由「計時人」操控活動時間,當時候一到,任何邪靈,都要回歸時空裂縫,等待時機再四出勾魂!成個迷離莊園入夜後就完全無燈,漆黑一片,而暗角處有一啲全身白色的「亡魂」,佢哋會若無其事咁出現在你面前,然後飄過,心都寒埋,加上周圍咁黑,真係唔知幾時會有嘢出嚟嚇你!

灰熊山谷 亡靈同你玩過山車

驚嚇度:★★★★☆

灰熊山谷流傳著一個恐嚇的傳聞,話說山谷內綠色的泉水隱藏了邪惡力量,更曾經引發一班礦工同牛仔互相殘殺,最後無一生還。所以一入夜,灰熊山谷內就會有好多礦工同牛仔亡魂等緊你!而園區內的過山車都暗藏驚嚇!樂園會安排「亡靈」上車,邉個都有可能同「亡靈」一齊玩過山車,但最恐怖嘅係「亡靈」全程木無表情,視急彎如無物,佩服!

下頁有:漆黑森林河流

探險世界 漆黑森林河流

驚嚇度:★★★★☆

森林河流之旅漆黑一片,船長會帶領賓客尋找擁有神秘法力的「咒石」,旅程中,故事發展會投射於岸上螢幕、「咒石」會隨時出現,非常驚喜!

迪士尼黑色世界」活動詳情
日期:2015年10月2日-10月31日(逢星期五至星期日舉行)
時間:6pm-11pm
夜間票價:$399

下頁有:樂富廣場免費鬼屋

樂富廣場免費 鬼屋 「恐懼心戰室」

除咗海洋公園同迪士尼之外,都有其他選擇o架!由2011年開始,樂富廣場都設有免費 鬼屋 玩,有別於往年,今年玩挑戰心魔,由7個相連貨櫃組合而成,集黑暗、幽閉、血腥、怪異、骯髒於一屋,驚嚇度拍得住其他鬼屋 !話明免費,一定好多人排隊啦!唔洗擔心,只要係指定領展商場或街市*累積消費滿 $400 或以上,就可以換領「心慌慌套票」一套。除咗有「恐懼心戰室特快門票」2 張之外,仲有「勇字當頭巾」1 條、及「慌失失樂園遊戲劵」2 張。

關卡一:荒廢堆填區 曱甴老鼠通地走

驚嚇度:★★★☆☆

呢間屋雖然無鬼,但環境夠晒驚嚇,一入到去,曱甴周地走,周邊仲有好多昆蟲同老鼠,污糟邋遢,挑戰潔癖者底線。想避?Sorry!一入咗就無退路啦!

關卡二:鏡子迷宮 迷魂漩渦

驚嚇度:★★☆☆☆

入到去又黑又暈,前後左右都係自己,行步路都要小心翼翼,如果唔係就撞鏡o架啦!

關卡三:黑暗森林

驚嚇度:★★☆☆☆

又係一個伸手不見五指嘅地方,玩家一邊行,一邊聽到來自四方八面兄音效,一個唔留神,成條蛇就會出現係你面前,都咪話唔驚!

下頁有:變態實驗室

關卡四:變態實驗室 最驚嚇!

驚嚇度:★★★★☆

一入到去就有一個血淋淋嘅演員等緊你!玩家先要估中圓筒入面嘅味道,然後在限時30秒內,喺18個小櫃入面搵出鎖匙,每格都有唔同道具,到底係咩?就要自己摸啦!

關卡五:黑鼆鼆 幽閉凶間

驚嚇度:★★★★☆

玩 鬼屋 最驚就係黑鼆鼆咩都睇唔到,一步一驚心,因為唔知隻鬼會匿埋喺邊度嚇你o架!

關卡六:方程迷陣

驚嚇度:★☆☆☆☆

一睇就知呢關係玩數獨啦!唔識玩唔緊要,因為識玩都未必可以係限時30秒入面,解開數獨之謎,逃出貨櫃,計算期間,仲有隻嘩鬼吱吱喳喳騷擾你,真係好難完成!

樂富廣場「恐懼心戰室」

日期:即日起至10月31日(逢星期五至日及公眾假期)
時間:5pm – 10pm
地點:樂富廣場B區露天平台
門票:免費入場

只要到指定領展商場或街市*累積消費滿 $400 或以上,並出示該消費商場內商戶發出之機印發票正本(同一商場及街市 2 張至 4 張由不同商戶發出的機印發票正本,每張發票金額須為 HK$100 或以上),即可換領「心慌慌套票」一套。套票包括:「勇字當頭巾」1 條、「恐懼心戰室特快門票」2 張及「慌失失樂園遊戲劵」2 張。

*樂富廣場及樂富街市、頌富廣場、H.A.N.D.S、長發廣場、禾輋廣場、厚德商場、尚德廣場、鯉魚門廣場、啟田商場

 

撰文:Fiona Fong、李永釗

相片:Paul Choi、部分由相關機構提供

拍攝:Chiu、Anthony Leong、Ming

剪接:Candy

※如欲率先接收資訊,請讚好我們的FB專頁並於「已讚好/Liked」選單設定「搶先看/See First」,多謝支持。