林海峰與彭羚補位教女

林海峰與彭羚補位教女

全能藝人 林海峰(Jan)一向只談工作,絕少談及家人,盡量保護一屋女人,包括其家傭。今次Jan為慈善推動青少年及兒童繪本創作比賽,罕有談及家庭生活。最近他準備升太太彭羚做林家「CEO」,讚揚她多年來把頭家打理妥當,「再升就主席,地位好高。」又形容太太似觀音,有如李嘉誠於大埔建的觀音像般,一出現就發光,帶領全家向善。
Jan與彭羚1998年結婚,育有兩女15歲林泳及11歲林清,開始步入青春期,兩女與媽媽的關係依然親密,行街會搭膊頭拖手仔,會傾少女心事,反而對爸爸比較內斂,Jan坦言屋企好靜,女兒早有自己世界,「當細蚊仔知清楚原來你係我老竇,或者你係我阿媽之後,就開始唔會同你分享任何嘢,大概長大到咁上下,佢哋就有自己嘅世界。屋企除咗工人我叫得郁之外,其他人叫唔郁㗎喇。」

{"IPTC-DATA":"NMG","data":{"photoID":2037381}}
林泳長得很高大,就快與爸爸平頭。

彭羚每周做義工

自細女林清於2004年出世後,彭羚決定退出樂壇專心湊女,外界紛指Jan大男人禁止太太拋頭露面,其實退下來是彭羚的決定,Jan一直支持她做喜歡的事,但她覺得做全職媽媽才對孩子的成長最好,沒有復出的打算。不過女大女世界,她開始有時間做喜歡的事,現全心投入做善事,每周都會做義工,偶爾會帶女兒同行。
一家經濟支柱Jan,沒因為要出外搵食,就少關心女兒成長,一有時間都會分擔湊女工作,盡量抽時間陪伴家人,一家四口經常被影到外出食飯、行街。談到與太太在家中的角色,Jan覺得兩人是互相補位,只要全心支持對方,就能互補不足,「我哋冇話一個做晒,因為每個人都唔係完美,都會有缺憾,如果互相支持對方嘅話,無論咩形式嘅支持,其實都係互相補位,當你自己有咩做得唔好,對方就可以填補,所以冇一定嘅角色,係不斷走位。」

4_233K_family_
每年開學日,彭羚都親自帶囡囡返學。

亂作故事氹女瞓

與女兒的溝通,相信是兩人要互補的地方。女兒小時候,Jan有如大部分父母講bedtime story,口才了得的他當然不是照書講,而是天馬行空作故事與女兒溝通,並非為教育而講。「我唔係教育佢哋,唔好咁講,係佢哋教緊我啫,我每日都被教緊。我都會講吓一般嘅書,而另一類型每個屋企都有,就係冇類型,意思就係個老竇亂kel咁講,見乜講乜,作啲古仔以為好好笑,最後自己瞓着咗嗰啲,正所謂真係亂kel咁講,唔可以用第二個字形容,好多老竇都係瞓喺度同細蚊仔亂作古仔,都係創作嚟嘅,創作一啲天馬行空嘅古仔,無無聊聊,好得意咁,都係為咗氹細蚊仔笑啫,不過第一個瞓先永遠係父親。」

{"IPTC-DATA":"NMG","data":{"photoID":1876850}}
球場上彭羚把握時間輔導大女的功課,難怪女兒能取得好成績。
{"IPTC-DATA":"NMG","data":{"photoID":2037379}}
彭羚與兩個女經常被影到出街shopping,三人溫馨拖手有講有笑。

女兒長大少溝通

Jan日頭要開工,夜晚的bedtime story時間都留給他,太太就少講,「太太就用另外一啲時間溝通,我哋會分布唔同崗位,大家互相補位,因為張床好窄,冇理由三四個人迫埋一堆,你迫埋去,我就搞第二啲嘢;我走咗之後,佢咪上位囉,我又去做第二啲嘢,哈哈!」
兩個女逐漸成長,已經沒再聽爸爸亂作的bedtime story,如大部分青少年一樣,轉投電子世界,與爸爸的溝通日漸減少,Jan也無可奈何:「以往家長可能為搵食造成問題,再遠啲講緊打仗冇飯食,依家唔擔心冇飯食啦,不過唔知啲飯邊度嚟啫,依家只係擔心呢樣嘢(電子產品)咋嘛,屋企成員多咗呢個先係最大問題。」

7_233K_family_
林海峰透露以往都會畫媽媽、彭羚和兩女兒的畫像,留在畫簿紀念。

 

全家靜做低頭族

面對電子產品入侵每個家庭,詭計多端的他也沒辦法,沒因此起家庭衝突已經算好彩,「我諗呢個係整體地球趨勢,唔關佢係咪大個咗事,係手機同電腦進步得好犀利,係我哋嘅強敵,你冇辦法擊敗佢㗎,呢樣嘢太龐大,基本上每日都要面對,總之唔好搞到有家庭慘劇,已經算過到一日。幾多人為咗叫仔女『好擺低喇!』然後擘面擘成日,或者好耐冇偈傾,都係因為呢部機。」林家沒有因此鬧交,不知是好事或壞事,「我哋屋企好靜,一返到去大家都係對住部機,冇機會鬧交。」咁咪好少溝通?「唔係呀,依家全世界都溝通得好密吖!」

話雖如此,Jan與外界緊密溝通,但與女兒的說話十隻手指數得晒,「我哋差唔多可以記低每個月大家對話嘅字數,如果我問佢嘢,答超過五個字已經係突破極限,無反應係正常;點頭我已經覺得,都幾尊重你爸爸媽媽喎;答一個字呢,嘩!皇帝呀!」可能誇張化了一點,但現今父母確實面對同樣問題,仔女與電腦電話的關係,還親密過父母,「地球根本係咁樣,一係就搬去外星住。」

12_233K_family_
筆者提議林海峰即席揮毫展創意,他竟反提議繪畫筆者,更笑言︰「你側身企喺度就得。」他畫人像有一手,不消兩分鐘就畫起,「我畫瘦咗你㗎 !」真係畫得幾似,瘦咗少少啦!

女拔轉讀國際學校

現今想遠離多媒體是不可能,連學校都用電腦做功課、做research,做學生都要與時並進。林泳和林清皆讀拔萃女小學,但家姐已轉讀至漢基國際學校,始終傳統名校讀書壓力大, 林海峰 及彭羚希望女兒讀得輕鬆點,即使學費由女拔的每年38,000元,暴增至超過20萬,也在所不計,召開家庭會議後決定轉校,性格開朗的林泳好快就適應新學校。

國際學校風氣自由,衣着都開始西化,長得高大的林泳都愛短褲出街,Jan覺得女兒高大,但對長腿有保留,「望佢要抬高少少頭,遲啲要用尊敬眼光。長腿唔知係唔係,但褲好短。」
Jan即使想阿女多穿長褲,阿女都唔會聽佢支笛,已決定放手由她們自由發展,「我已經開始唔諗佢哋啲嘢,真係好鬼死煩,屋企除咗工人我叫得郁做嘢之外,其他都叫唔到,你叫佢坐佢就企,你叫佢企佢就坐,所以你問我親子嘢我真係答唔到你,有啲家長連工人都叫唔到,所以我點分享?見步行步㗎咋,所以你問我係一個點樣嘅爸爸,就係見一步行一步。」

對上一個問題,就是請Jan形容自己是一個怎樣的爸爸,他想了良久,都答不到,「好難答……其實每日遇到一啲事,我哋都係盡量做好佢,我哋都唔知自己係咪做到最好,但只要抱着呢個態度嘅話,我想總會做到一件事,令自己覺得今日冇白過。所以點樣做一個好爸爸,有時未必你想做就做得到,通常想嘅時候係做唔到,所以我覺得唔好想太多,呢一秒個小朋友肯聽你講故事你就講,呢一秒佢唔聽,你就唔好講囉。」

15_233K_family_
林海峰將會為慈善出兒童繪本,預計明年春季推出,「一聽到無錢收覺得一流,又有得揸紙筆玩吓,就應承去做。」

林海峰 的屋企英雄
林海峰 百足多爪,讀設計出身的他將踩入繪本界,為「青少年及兒童繪本比賽2016」擔任評審,明年會推出親自撰畫的繪本,義賣收益將捐助黑暗中對話(香港)基金會,支持殘疾人士成為人才。比賽主題為「超能英雄」,以殘疾人士為主角,鼓勵青少年及兒童透過畫繪本,了解社會上殘疾人士的生活及需要,10月15日截止報名。每人心目中都有英雄,林海峰屋企幾個女人,誰是他的英雄?你萬萬都想不到,他的屋企英雄竟然是……

 

●撰文:Ling

●攝影:黃大立

更多精選內容