李霖恩 林子博 爸B澳門遊

李霖恩 林子博 爸B澳門遊

04_234K_family
子博一對仔女開始大個,去旅行都不難照顧,最煩是要安排稱心行程滿足所有人,好似太太鍾意shopping,但仔女會覺得悶,要多安排適合小朋友的活動平衡一下。

經過兩輯TVB親子節目《爸B也Upgrade》後,李霖恩和林子博出晒名做惡爸,對仔女呼喝絕不留情!霖恩大女李清宜(Gianna)和子博細仔林卓楠亦因節目成為好友,大家6歲咁高咁大好啱傾,今次兩位爸爸就約埋一齊帶仔女參加 澳門 旅遊局《童遊.澳門》三日兩夜旅程,一齊發掘 澳門 新鮮親子景點。經過三日相處,清宜和卓楠關係竟變得糖黐豆,互相叫大家老公老婆,看來霖恩和子博好快對親家!

03_234K_family
霖恩曾經歷過一次沒有太太的旅行,簡直是一場噩夢,「有次去沖繩,太太因為工作第一日嚟唔到,我就一個人帶住仔女去先,點知細仔發高燒要送去醫院,同醫生護士雞同鴨講,出動埋Google translate,折騰到凌晨三點幾先返酒店,小朋友有病真係唔好去旅行。」
05_234K_family
Gianna和卓楠分別有學跆拳和國術,在喜來登酒店功夫熊貓學堂耍功夫有板有眼!

惡父齊撇老婆去旅行

霖恩和子博都並非首次帶仔女去 澳門 玩,不過卻是首次撇甩老婆去旅行,透過三日兩夜旅程好好改善父子父女關係。霖恩坦言自己是非常嚴父,個女一唔聽話就發父威,「喺屋企我會做惡嗰個,太太做慈母,平時我會發揮老竇威嚴喝佢,就會即刻聽話。」Gianna投訴爸爸惡起上來會兜巴星!「鍾意同媽咪玩多啲,媽咪善良,爹哋好惡,我一做錯事爹哋會一巴升埋嚟,唔會錫番。」Gianna又埋怨平時爸爸安排太少活動,今次難得與爸爸去旅行,覺得好刺激,「因為唔知有咩冒險,又驚佢整蠱我,我會喊囉。」

子博就覺得與囝囝卓楠在平日溝通上,只集中學業、知識方面,好少深入了解個仔,「好多時自己忙工作,佢又要做功課,溝通都係圍繞呢啲。去旅行我唔接電話,可以專心同個仔溝通,講吓呢個地方嘅風土人情。好似今次去澳門,佢返去學校寫周記,可以寫番大三巴歷史,係世界文化遺產,而唔係寫酒店泳池。」子博覺得父子檔出遊比一家四口更輕鬆,「唔使遷就老婆去shopping,淨係滿足個仔就得。」
有時女人在場,有些「男人經」不方便傾談,透過今次旅行可以暢所欲言,「我好enjoy同個仔一齊沖涼,屋企廁所細,去旅行酒店夠大可以一齊沖,男人都有好多男人經,『咦,爹哋點解你呢度同我唔同嘅?』呢啲密偈離開洗手間係唔會講㗎嘛。」子博感到最窩心是囝囝主動替自己擦背,是難忘的父子溫馨時刻。

10_234K_family
Gianna不斷叫爸爸擺pose讓她影相,不過Gianna話爸爸擺pose麻麻哋,「冇叫佢擺靚啲,由得佢。」

霖恩女:阿爸無膽鬼

兩個小朋友都有少少功夫底,卓楠學國術、Gianna學跆拳,就快考紅帶好威水!所以霖恩和子博便去了 澳門 喜來登酒店功夫熊貓學堂學功夫,順便放一放電,子 博說:「佢除咗瞓晏覺,長時間係要玩!佢始終係一個男仔,會周身郁,要一路搵地方俾佢放電,呢啲室內活動就最啱,有職員睇住唔驚危險。」霖恩就話個女本身 好粗魯,甚至過度活躍,但她最需要改善是過強的好勝心,「頭先喺入面玩遊戲都輸咗,以前3、4歲佢唔輸得㗎,一輸咗就發脾氣同喊,我就同佢講爸爸都成日 輸,無所謂㗎,下次做好啲咪贏番囉,佢依家明喇。」

好勝心強的Gianna,更勇於向難度挑戰,一去到 澳門 旅遊塔,即嚷着要玩「空中漫步X版」,在距離地面233米高的高空戶外繞塔漫步,霖恩見狀大驚,被 Gianna笑細膽,「如果爹哋唔出去,我自己都會出去。」兩父女邊行邊做高難度動作,Gianna更叫爸爸行快些,「爹哋唔勇敢,成日都好冇膽。」 Gianna覺得空中漫步好安全,完全不擔心爸爸有危險,「有條繩吊住上面㗎嘛。」
兩個小朋友最期待是去新景點十六浦3D奇幻世界,與場內的恐龍畫影相,和迫爸爸做model在畫前擺各種pose,霖恩和子博覺得仔女都影得不錯,總算有 頭有手有腳,子博說:「我有買部小單反相機俾仔女學影相,發掘佢哋對攝影興趣,卓楠天生仲係一個甫士王,叫佢擺十個pose即刻擺到!」

09_234K_family
Gianna一路笑爸爸無膽,霖恩為陪女都豁出去,「教練開頭見我好驚,猛話好安全叫我放心,搞到我好似懦夫咁,加上咁多人望住我,唔衰得!」
11_234K_family
卓楠本身是chok爆甫士王,爸爸都無咁叻。

 

親子旅遊必睇動物

計劃親子旅行,必須要讓小朋友有得着,學習到外地文化,霖恩和子博都同意,動物園、科學館和博物館,應盡量納入行程之中。霖恩覺得有小朋友之後,自己去旅行 的心態亦改變了,「後生嗰陣鍾意玩機動遊戲,依家老咗幾年反而唔敢玩,驚個心負荷唔到,有咗小朋友就會一齊去睇大自然,有益身心。」
兩家人去了熊貓館探「開開」、「心心」,是澳門去年回歸15周年,中央送贈給 澳門 的一對大熊貓。小朋友見到可愛熊貓最開心了,子博稱每次去旅行必去動物園,「去四川有熊貓、山東有老虎、澳洲有袋鼠,唔同地方都有自己嘅特色動物。」

卓楠的興趣多多,喜歡動物之外,亦喜歡天文科學,最近常叫爸爸買望遠鏡睇星星,子博怕他三分鐘熱度未買,今次先帶他去 澳門 科學館體驗一下,「佢話將來想做 太空人,我就叫佢要讀好多書。」卓楠聞言改口說:「我想做科學家多啲,想發明竹蜻蜓同隨意門!」做科學家之路遙遠漫長,但肯定研究科學有助改善學習態度, 霖恩都話囡囡最近有學做小實驗,性格專注了不少,「佢個人好易分心,但佢做實驗嗰陣好專注,畫畫都係,會俾佢繼續發掘呢兩方面興趣。」

18_234K_family
即將開幕的新濠影滙有多個嶄新娛樂設施,其中設有首個蝙蝠俠數碼動感遊戲,小朋友必會為之瘋狂。
17_234K_family
子博帶囝囝去媽閣廟解釋Macau名字的來源。
15_234K_family
卓楠將來想做科學家,子博覺得課本學習太被動,所以去澳門旅行都會到科學館寓教於樂。
16_234K_family
自女兒出生起,霖恩已為她影了過萬張相,抓緊成長的每分每秒。

 

澳門 這片彈丸之地滿布歷史遺產,近年更大力開發親子景點,集歷史及教育於一身,成為親子假日短線熱選。霖恩父女和子博父子的 澳門 三日兩夜旅程,將剪輯成五集短片盡show親子好去處,片段中Gianna和卓楠更大爆好多爸爸趣事,讀者萬勿錯過!
「童遊.澳門」專頁:http://campaign.nmg.hk/2015/mgto/superkids/

 

●撰文:Ling

●攝影:黃大立 (部分相片由受訪者提供)

更多精選內容